Salamo 83:1-18
O le Salamo. O le pese a Asafo.+
83 Le Atua e, aua e te fifilemu;+Lē e Malosi e, aua neʻi e lē fetalai mai, ma aua foʻi neʻi e lē tali mai.
2 Auā faauta! ua vāvāō ou fili;+O ē e ‘ino‘ino iā te oe ua gaoioi ma le faasausili.*
3 Ua faatogafiti ona latou faufau faalilolilo faasaga i lou nuu;Ua latou taupulepule foʻi faasaga i ē e pele iā te oe.*
4 Ua latou faapea ane: “Inā ō mai ia, ia tatou faaumatia i latou o se nuu,+Ina ia lē toe manatua ai lava le igoa o Isaraelu.”
5 Ua latou faufau ma le autasi se togafiti;*Ua latou osia se feagaiga e faasagatau ai iā te oe,+
6 O faleʻie o Etoma, o le fanauga a Isamaeli, o Moapi,+ o le fanauga a Hakara,+
7 O Kavali, o Amoni,+ ma Amaleka,O Filisitia+ faatasi ma tagata o Turo.+
8 Ua aufaatasi atu foʻi Asuria+ iā i latou;Ua latou lagolagoina* le fanauga a Lota.+ (Selā)
9 Ia e faia iā i latou e pei ona e faia iā Mitiana,+E pei fo‘i ona e faia iā Sesera ma Iapino i le ālia o Kisona.+
10 Na faaumatia i latou i Enetoro;+Na avea i latou ma otaotavale i le laueleele.
11 Ia e faia o latou tamālii ia pei o Oreva ma Seeva,+Ma o latou perenise* ia pei o Sepa ma Salemuna,+
12 Auā na latou faapea ane: “Ia fai ma o tatou tofi le nuu e afio ai le Atua.”
13 Loʻu Atua e, ia e faia i latou ia pei o vao tuitui ua lelea,+E pei o tagutugutu o saito ua lelea i le matagi.
14 E pei o le afi ua mū ai le vaomatua,E pei foʻi o le afi ua mū ai mauga,+
15 Tau ina ia e tuliloa i latou i lou afā+Ma ia faamata‘u i latou i lou matagi malosi.+
16 Ia ufiufi* o latou foliga i le māsiasi,Ina ia latou saʻili atu ai i lou suafa, Ieova e.
17 Tau ina ia faamāina i latou ma matata‘u e faavavau;Tau ina ia māsiasi ma fano foʻi i latou;
18 Tau ina ia iloa e tagata o oe e ou le suafa o Ieova,+E na o oe lava o Lē e Silisili Ese i le lalolagi uma.+
Faamatalaga Pito i Lalo
^ Po o le “ea i luga o latou ulu.”
^ Epe., “i ē ua natia.”
^ Epe., “Ua latou taupulepule ma le lotogatasi.”
^ Epe., “tuu atu o latou lima i.”
^ Po o “taʻitaʻi.”
^ Epe., “Ia tumu.”
