Skip to content

Skip to table of contents

O le ā o le a Faataunuuina e le Malo o le Atua?

O le ā o le a Faataunuuina e le Malo o le Atua?

Na aʻoaʻo e Iesu ona soo ina ia tatalo mo le Malo ia oo mai. Na ia silafia o tulaga leaga ua iai le lalolagi e lē o le finagalo lea o le Atua, ma e na o le Malo o le Atua e mafai ona toe faaleleia. O le ā o le a faataunuuina e le Malo o le Atua?

O MEA UA UMA ONA FAIA E LE MALO O LE ATUA

I le mataupu ua mavae atu, na tatou iloiloina ai faailoga ia na taʻua e Iesu. O na faailoga ua faamaonia ai le faavaeina e le Atua o le Malo i le lagi ma avea ai Iesu Keriso ma Tupu.

Ua taʻua i le Tusi Paia, na tuliesea e Iesu Satani ma ana temoni mai i le lagi ina ua amata lana pule. Ua taulaʻi atu nei gaoioiga a Satani ma ana temoni i le lalolagi, ma o le māfuaaga lenā o le matuā leaga o le tulaga o mea talu mai le 1914.​—Faaaliga 12:7, 9.

E ui o loo faasolo ina leaga le tulaga o mea i le lalolagi, ae ua saunia e Iesu, le Tupu o le Malo o le Atua le fesoasoani mo tagata i le lalolagi atoa. E faafetaia le galuega tauaʻoaʻoga faale-Tusi Paia i le lalolagi atoa, e pei ona folafola mai e Iesu ua mafai ai e le toʻatele ona aʻoaʻoina ma faatatauina mataupu silisili faale-Tusi Paia i o latou olaga. (Isaia 2:2-4) E faitau miliona ua mafai ona atiaʻe ni tomai e fai ai galuega, faaleleia o latou olaga i le aiga ma iai se latou vaaiga paleni i meafaitino. O i latou nei ua aʻoaʻoina i aogā e latou te maua i le taimi nei ma ua faaagavaaina e avea ma tagatānuu o le Malo.

 O LE Ā LE ISI MEA O LE A FAIA E LE MALO O LE ATUA?

E ui ua pule Iesu i le lagi, ae o loo iai pea pulega faaletagata i le lalolagi. Peitaʻi, na faatonuina e le Atua Iesu: “Inā alu ia ma pule i totonu o ou fili.” (Salamo 110:2) E lē o toe umi ona faaumatia atoatoa lea e Iesu o ē e tetee ma aumai le mapusaga mo ē lotomalilie e usiusitaʻi i le Atua.

A o faagasolo lenā taimi, o le a gaoioi le Malo o le Atua e

  • Faamuta tapuaʻiga sesē. O le a aveesea tapuaʻiga na aʻoaʻoina manatu pepelo e faatatau i le Atua ma faafaigatā le olaga o tagata. Na faatusaina e le Tusi Paia tapuaʻiga sesē i se fafine talitane. O le a matuā faateʻia le toʻatele i lona faaumatiaga.​—Faaaliga 17:15, 16.

  • Faamuta pulega faaletagata. O le a gaoioi le Malo o le Atua e “faaumatia malo uma, ae e tumau lea malo e faavavau.” O le mutaaga lenā o pulega a tagata.​—Tanielu 2:44.

  • Faaumatia tagata amioleaga. Ae faapefea i latou o loo maumauaʻi e faia mea leaga ma mumusu e gauaʻi i le Atua? “E faaumatia o ē e amioleaga mai i le lalolagi.”​—Faataoto 2:22.

  • Aveesea Satani ma ana temoni. O le a lē mafai e Satani ma ana temoni ona toe ʻfaasesēina atunuu.’​—Faaaliga 20:3, 10.

O le ā le iʻuga o nei mea uma mo i latou e talia le Malo o le Atua?

 MEA O LE A FAIA E LE MALO O LE ATUA MO TAGATA

I le pule ai o Iesu o se Tupu i le lagi, o le a ia faia mea e sili atu nai lo o mea e faia e se pule faaletagata. O le a fesoasoani le 144,000 o ē ua filifilia mai i tagata e pule faatasi ma Iesu. (Faaaliga 5:9, 10; 14:1, 3) O le a ia faamautinoa ua faia le finagalo o le Atua i le lalolagi. O le ā o le a faia e le Malo o le Atua mo ona tagatānuu i le lalolagi?

  • Aveesea maʻi ma le oti. “E lē fai mai foʻi se tasi ua nofo ai: ʻOu te maʻi,’” ma “e lē toe iai se oti.”​—Isaia 33:24; Faaaliga 21:4.

  • Aumaia le Filemu ma le Saogalemu. “E matuā tele lava le filemu o lau fanau,” ma “e taʻitoʻatasi ma nofo i lalo o lona vine ma lalo o lona mati, e leai foʻi se tasi e faamataʻu iā i latou.”​—Isaia 54:13; Mika 4:4.

  • Saunia galuega aogā. “O le a matuā fiafia uma oʻu tagata ua filifilia i galuega a o latou lima. O le a lē galulue fua i latou.”​—Isaia 65:22, 23.

  • Foʻia faafitauli i le siʻosiʻomaga. “O le a olioli le toafa ma le laueleele ua leai se vai, o le a fiafia foʻi le fanua laugatasi o le toafa ma e fua mai e pei o le lili.”​—Isaia 35:1.

  • Aʻoaʻoina tagata i mea e manaʻomia ina ia ola ai e faavavau. “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.”​—Ioane 17:3.

E finagalo Ieova ia e olioli i na faamanuiaga. (Isaia 48:18) O le a faamatalaina i le mataupu o loo sosoo mai mea e mafai ona e faia i le taimi nei, ina ia avea ai oe ma vaega o lenei lumanaʻi matagofie.