Ninke wole ammaˈno ledo karsammummokki alame woˈmate heeˈneemmo dirijjiteeti. Qara biironke Ameerikaho nooha ikkirono, rooriiditi Yihowa Farciˈraasine heedhannohu wole babbaxxitino gobbuwaraati. Isinni sette miliyoone aleenni ikkineemmori Yihowa Farciˈraasine 230 saˈanno gobbuwara mannaho Qullaawa Maxaafa rosiinseemmo. Konne assineemmohu Yesuusi togo yee hajajino daafiraati: “Daga baalantera naqaashe ikkanno gede, kuni Mangistennihu danchu duduwi uulla woˈmate sabbakamanno.”—Maatewoosi 24:14.

Heeˈneemmo gobba ikkitutano ikkituro, hatti gobba fushshitino higgera hajajammeemmo. Hakkoyeno ikkiro, poletiku hajora anga diwodhineemmo. Hatto assineemmokkihu Yesuusi Kiristaanu “alamete wido ikkannokki” gede kulinohuraati. Konni daafira poletiku coyira dikarsammeemmo, hattono olu giddora dieˈneemmo. (Yohaannisi 15:19; 17:16) Layinkihu Alamete Oli yannara Yihowa Farciˈraasine poletiku hajora anga wodha gibbinohura usurroonninsa, gannoonninsa, hattono hakkiinni sainore assinoonninsa. Albihu Jarmanete qeesichi togo yiino: “Sayikki rayike [woy Hitileri gashshooti] yannara olaho dikarsammoommo yite coyiˈra dandiitannori Yihowa Farciˈraasine callaati.”

Hatto yaa kayinni ninke mannu ledo dixaandeemmoreeti yaa diˈˈikkino. Yesuusi harunsaanosi daafira Magano togo yee huuccino: ‘Huucciˈreemmohehu alamete giddonni fushshattonsara diˈˈikkino.’ (Yohaannisi 17:15) Konni daafira ninke loosiˈnanna, dikkiˈnanna hattono qooxeessinkera noo rosi mine ronsanna afattonkera dandaatto.