MIINJA WOYYEESSA

Mixo: Mannu heeshsho woyyaabbanno gede assa. Tini, buxichunna dureessu mereero noo badooshshe hoolate woy ajishate kaaꞌlitara dandiitanno. Kipho kalaqantanno gede assannohu mittu qaru coy, togoo badooshsheeti.

Guficho ikkannore: Tini qinaabbannohu, gashshootubba woxe fushshitanno gara soorriturooti. Coy gedera 2022, keere agarsiisatenna mannu heeshsho woyyeessate kalqoomu deerrinni 34.1 biliyoone Ameeriku doolaare ikkanno woxi fulino yine hendanni. Ikkollana, hakko dironni olantotenna bagadaasinete fushshinoonni woxe hendiro, kuni lowo geeshsha shiima woxeeti.

“Kipho kaꞌannota hoolatenna keere kalaqate fushshineemmo woxinni, kiphotenni gawajjantinore kaaꞌlate fushshineemmo woxi rooranno.”—Halantino Gashshootubbahu qaru borreessaanchi Antooniyo Gutireezi.

Qullaawu Maxaafi yaannore: Alamete gashshootubbanna uurrinshubba buxane kaaꞌlitara dandiitanno; ikkirono, buxima woꞌmunni woꞌma huna didandiitanno.—Marro 15:11; Maatewoosi 26:11.

 DIPPILOOMAASE

Mixo: Gaꞌlabbi yine hasaawatenninna lamenka wido horaameessa assanno coyira sumuu yaatenni gibbo hoola woy araara kara.

Guficho ikkannore: Mittu woy lamunku widi shiqqi yee hasaawa, sumuu yaa woy sheemaate ea giwara dandaanno. Qoleno keeru sheemaate mulluri gede assine diinganna laꞌneemmo.

“Dippiloomaase hasiꞌnoonni guma abbitannokki woyiti no. Ola uurrisate eꞌnoonni sheemaati xeꞌne nooha ikkaranna roorino oli kaꞌꞌanno gede doogo fanannoha ikkara dandaanno.”—Reymond F. Ismiiz, Ameeriku Dippiloomaate.

Qullaawu Maxaafi yaannore: Mannu ‘keere hasiꞌra’ hasiissanno. (Faarso 34:14) Ikkirono, xaa yannara duuchu manni “ammanaminokkiha, . . . sumuu yaa giwannoha, . . . kaadaasincho” ikkino. (2 Ximootewoosi 3:1-4) Togoo akatta, fayyo giddonni loossanno gashshaasine sumumme kalaqqannokki gede guficho ikkitannonsa.

OLU BAGADO AJISHA

Mixo: Olu bagado hakko iso niyukileerete, kemikaaletenna bayolojete bagado ajisha woy huna.

Guficho ikkannore: Gashshootubba wolqa baꞌneemmo woy siammeemmo yite waajjitanno daafira, olu bagadonsa fushshe hunate duucha woyite maahoyye diyitanno. Olu bagado huna olaho kora ikkino qarra ditirtanno.

“Qiidadu oli waro, olu bagadonsa hunate sheemaattino gashshootubba giddo batinyu yitinore diassitino; insa hakkawoyite dano abbannore ajishate, kalqoomu hobbaate hunannore hoolatenna baalunku sumummenna mittimma noo alamera keere heeꞌneemmo gede assate qaale eꞌino.”—“Albillitte Baalunku Hobbaate Agara: Olu Bagado Ajishate Kaaꞌlanno Hasaawa.”

Qullaawu Maxaafi yaannore: Mannu olu bagado hunanna ‘bisensa maarashaho soorra’ hasiissannonsa. (Isayaasi 2:4) Kay, tini calla diguddanno; mayira yiniro, gibbo hanaffannohu manchu wodani giddooti.—Maatewoosi 15:19.

 GUTAMME LOOSA

Mixo: Gashshootubba keere huntannorenna cancishshannore ittisate, gutante loosate sumuu yitanno. Insa yitanno garinni, duucha gashshootubba halante mimmito agartannoha ikkiro, keere huntannori insa ledo olama waajjitanno.

Guficho ikkannore: Mimmitoho halantanno gashshootubba qasa shota ikkitannokki daafira calla keeru woꞌmanno yaa diꞌꞌikkino. Gashshootubba eꞌino qaale wonshitannokki woyiti no; qoleno insa, keere huntannori aana ma garinninna mamoote qaafo adha hasiissannoro sumuu yaa hooggara dandiitanno.

“Gashshootubbannihu Qaalu Gondoori Maamarinna Halantino Gashshootubba Uurrinsha, addi addi daga halantenna gutante mimmito kaaꞌlitanno gede assate lowo geeshsha sharrantinoha ikkirono, togoo gutama ola uurrisa didandiitino.”—“Insaykilopiidiya Biritaanika.”

Qullaawu Maxaafi yaannore: Haammatu manni kaaꞌlame loosa, callu buxxuuꞌlantenni woyyitanno. (Rosiisaancho 4:12) Ikkollana, mannu uurrinshubba hegeraamo keerenna gaꞌlabbo abbitanno yine agadha didandiineemmo. “Mannu gatisara didandaannona, albisoota addaxxitinoonte. Insa reyitanno woyite bushsha eꞌanno; hakku barri hedonsa baalate gawalote.”—Faarso 146:3, 4.