1, 2. Σόσκε ο Ντεβέλ να μανγκλάς τι ατσσόλ βασιλιάς ο Σαούλ; (Ντικχ ι φωτογραφία σο ισί κι αρχή.)

ΟΤΑΝ ο Ιεχωβά τραμπιντάς τον Σαούλ για τι αβέλ βασιλιάς, ο Σαούλ ισινέ μετριόφρων. (1 Σαμουήλ 9:1, 2, 21· 10:20-24) Αλλά όταν αβιλό βασιλιάς, αβιλό εγωιστής. Εκ φαρ, χιλιάδες Φιλισταίοι γκιλέ για τι πολεμίνεν ι Ισραηλιτέν. Ο προφήτης Σαμουήλ βακερντάας κο Σαούλ ότι κα τζάλας για τι κερέλ εκ θυσία κο Ιεχωβά. Όμως, πριν τι ερεσέλ ο Σαμουήλ, ο Ισραηλίτες νταρασάλε ντα μπουτ λένταρ μουκχλέ τον Σαούλ. Ο Σαούλ να σικαντάς υπομονή ντα, αντίς τι μπεσέλ για τον Σαμουήλ, κερντάς κορκορό θυσία. Ο Σαούλ να τθερέλας ο δικαίωμας τι κερέλ θυσία, ντα ο Ιεχωβά να μπεϊντιντάς-λες ανταβά.—1 Σαμουήλ 13:5-9.

² Όταν ο Σαμουήλ ερεσλό, ντινάς βίκος οπράλ κο Σαούλ επειδή να ντινάς καν ι Ιεχωβάς. Αλλά ο Σαούλ πακιάλας ότι να κερντάς τίποτα λάθος. Προσπαθιντάς τι αρακχέλ δικαιολογίες ντα κατηγοριντάς γιαβερέν για το λάθος σο κερντάς. (1 Σαμουήλ 13:10-14) Από αζομάν, ο Σαούλ κερντάς γιαβερά-ντα πράγματα από εγωισμός. Οτθάρ ο Ιεχωβά να μανγκλάς τι ατσσόλ ο Σαούλ βασιλιάς. (1 Σαμουήλ 15:22, 23) Η ζωή του Σαούλ αρχισάλι λατσσές αλλά τελειωσάλι με μπουτ μπέτι τρόπος.—1 Σαμουήλ 31:1-6.

3. (α) Σο πακιάνα μπουτ τζενέ αντιβές για τη μετριοφροσύνη; (β) Καλά ερωτήσεις κα ντικχάς;

 ³ Μπουτ τζενέ αντιβές πακιάνα ότι, άμα κα αβέν μετριόφρονες, να κα τθερέν επιτυχία πουμαρέ ζωγιάτε ντα πουμαρέ μπουτιάτε. Ισαρένα-πες για τι ντικχίντιβεν πιο λατσσέ κατά γιαβερά. Για παράδειγμας, εκ διάσημος τζενό σο ισινέ ηθοποιός ντα πολιτικός βακερντάς: «Η λέξη μετριοφροσύνη να ταιριάνελα μάνγκε, ντα να μανγκάβα τι ταιριάνελ ποτές». Όμως σόσκε ισί σημαντικός εκχέ Χριστιανόσκε τι αβέλ μετριόφρων; Σο ισί η μετριοφροσύνη, ντα σο νανέ; Ανταλέ μαθημάστε, κα απαντίνας ανταλέ ερωτησιέντε. Ντα κο γιαβέρ μάθημας, κα ντικχάς σαρ μπορίνασα τι ατσσάς μετριόφρονες ατζέ-ντα όταν ισί δύσκολος ανταβά.

4. Σο κα μπορίναας τι κεράς άμα ισινάμ εγωιστές;

⁴ Η Γραφή σικαβέλα ότι ο εγωισμός ισί αντίθετος κατά μετριοφροσύνη. (Διαβάνεν Παροιμίες 11:2) Ο Δαβίδ μολιντάς ι Ιεχωβάς: «Αράκχαβ τι υπηρετής για μα τι κερέλ κάτι από εγωισμός». (Ψαλμός 19:13) Σο κα μπορίναας τι κεράς άμα ισινάμ εγωιστές; Μπορεί τι κεράς κάτι σο να τθεράσα ο δικαίωμας ή ι εξουσία τι κεράς-λες, επειδή μπορεί μα τι τθεράσα υπομονή ή επειδή μπορεί τι ισινάμ μπαρικανέ. Σαρέ κερντάμ μερικές φορές κάτι από εγωισμός επειδή ισινάμ ατελείς. Αλλά ο παράδειγμας του Βασιλιά Σαούλ σικλιαρέλα-αμέν ότι, άμα ανταβά κα αβέλ συνήθεια, ο Ιεχωβά να κα χαιρίνελ. Ο εδάφιος Ψαλμός 119:21 βακερέλα ότι ο Ιεχωβά κα “ντελ βίκος οπράλ οντουλέντε σο ισί εγωιστές”. Σόσκε κα κερέλ-λες ανταβά;

5. Σόσκε ισί μπαρό λάθος τι κεράς κάτι από εγωισμός;

⁵ Πρώτον, όταν κεράσα κάτι από εγωισμός, σικαβάσα ότι να σεβάνασα ι Ιεχωβάς, σο ισί αμαρό Ντεβέλ ντα αμαρό Βασιλιάς. Δεύτερον, όταν κεράσα πράγματα σο να τθεράσα ο δικαίωμας τι κεράς-λεν, μπορεί τι χας-αμέν ι γιαβερέντζαρ ντα τι τθεράς προβλήματα λέντζαρ. (Παροιμίες 13:10) Ντα τρίτον, μπορεί τι λατζάς όταν ο γιαβερά κα αγαβέν ότι κερντάμ κάτι από εγωισμός. (Λουκάς 14:8, 9) Ντικχάσα ξεκάθαρα σόσκε ο Ιεχωβά μανγκέλα αμένταρ τι αβάς μετριόφρονες.

6, 7. Σο σχέση τθερέλα η μετριοφροσύνη με την ταπεινοφροσύνη;

⁶ Η μετριοφροσύνη ντα η ταπεινοφροσύνη ισί ιδιότητες σο μοιάζενα μπουτ. Εκ ταπεινός Χριστιανός νανέ υπερήφανος αλλά πακιάλα ότι ο γιαβερά ισί πιο σημαντικοί λέσταρ. (Φιλιππησίους 2:3) Εκ τζενό σο ισί ταπεινός συνήθως ισί μετριόφρων. Αγαβέλα ότι τθερέλα όρια ντα δεχτίνελα ταπεινά πο λάθη. Μανγκέλα τι ασουνέλ ι γιαβερέν ντα τι σικλιόλ λένταρ. Εκ τζενό σο ισί ταπεινός κερέλα μπουτ χαρούμενος ι Ιεχωβάς.

⁷ Η Γραφή σικαβέλα ότι εκ τζενό σο ισί μετριόφρων τζανέλα πο νεαυτός ντα αγαβέλα ότι να μπορίνελα τι κερέλ κάποια πράγματα ή να τθερέλα ο δικαίωμας τι κερέλ-λεν. Ανταβά βοηθίνελα-λες τι σεβάνελ ι γιαβερέν ντα τι σικαβέλ λένγκε λατσσιπέ.

8. Για τι ατσσάς μετριόφρονες, καβά τρόπος σκέψης δεν πρέπει τι τθεράς;

⁸ Όμως, κα μπορίναας τι αρχίνας τι σκεφτίνας με εγωιστικός τρόπος χωρίς τι  αγαβάς-λες. Σαρ μπορίνελα τι αβέλ-πες ανταβά; Μπορεί τι αρχίνας τι πακιάς ότι ισινάμ πιο σημαντικοί κατά γιαβερά επειδή αμέν ή αμαρέ αμαλά τθερένα ευθύνες αντρέ κι εκκλησία. (Ρωμαίους 12:16) Ή μπορεί τι αρχίνας τι ντας μπουτ προσοχή αμαρέ νεαυτόστε. (1 Τιμόθεο 2:9, 10) Μπορεί ατζέ-ντα τι αρχίνας τι βακεράς ι γιαβερένγκε σο πρέπει ή σο δεν πρέπει τι κερέν.—1 Κορινθίους 4:6.

9. Σόσκε μερικά τζενέ αβιλέ εγωιστές; Βακερέν εκ παράδειγμας κατά Γραφή.

⁹ Αμαρί συμπεριφορά κα μπορίνελας τι αβέλ εγωιστική άμα να κεράσα κουμάντος ο λάθος πράγματα σο μανγκάσα. Μπουτ τζενέ αβιλέ εγωιστές επειδή μανγκένας τι τθερέν δόξα, ζηλίνενας ι γιαβερέν ή ναστί ατσσικιαρένας πουμαρί χολί. Ανταβά αβιλό-πες μερικέ τζενέντε σο διαβάνασα λένγκε κι Γραφή, σαρ ισί ο Αβεσσαλώμ, ο Οζίας ντα ο Ναβουχοδονόσορ. Ο Ιεχωβά σικαντάς λένγκε ξεκάθαρα ότι έπρεπε τι αβέν ταπεινοί.—2 Σαμουήλ 15:1-6· 18:9-17· 2 Χρονικών 26:16-21· Δανιήλ 5:18-21.

10. Σόσκε δεν πρέπει τι κρίνας ι γιαβερέν; Βακερέν εκ παράδειγμας κατά Γραφή.

¹⁰ Μπορεί τι αβέν γιαβερά-ντα λόγοι σο νανέ μερικές φορές μετριόφρονες ο τζενέ. Σκεφτίνεν ο παράδειγμας του Αβιμέλεχ ντα του Πέτρου. (Γένεση 20:2-7· Ματθαίος 26:31-35) Ισινέ οντουλά τζενέ εγωιστές; Ή μήπως να τζανένας σαρέ ο πράγματα σο αβιλέ-πες ή κερντέ πράγματα χωρίς τι σκεφτίνεν; Αφού αμέν ναστί αγαβάσα σο ισί αντρέ κο γκι κι κάθε τζενέσκο, δεν πρέπει τι κρίνας ι γιαβερέν.—Διαβάνεν Ιακώβου 4:12.

11. Σο ισί σημαντικός τι αγαβάς;

¹¹ Εκ τζενό σο ισί μετριόφρων αγαβέλα πι θέση κι οργάνωση κι Ντεβλέσκι. Ο Ιεχωβά Ντεβέλ μανγκέλα τι αβέν ο πράγματα με εκ σειράς. Ντινάς κάθε τζενέστε αντρέ κι εκκλησία εκ θέση. Σαρέ ισινάμ χρήσιμοι. Ο Ιεχωβά ντινάς-αμέν διαφορετικά χαρίσματα, ταλέντα ή ικανότητες ντα μουκχέλα-αμέν τι τραμπίνας σαρ κα χρησιμοποιήνας-λεν. Αν ισινάμ μετριόφρονες, κα χρησιμοποιήνας ο χαρίσματα σο λιντάμ σαρ μανγκέλα ο Ιεχωβά. (Ρωμαίους 12:4-8) Αγαβάσα ότι ο Ιεχωβά μανγκέλα αμένταρ τι χρησιμοποιήνας ανταλά χαρίσματα για τι ντας-λες δόξα ντα τι βοηθίνας γιαβερέν.—Διαβάνεν 1 Πέτρου 4:10.

12, 13. Σο πρέπει τι ντας-αμέν γκοντί άμα αβένα-πες αλλαγές κι υπηρεσία σο ντάσα κο Ιεχωβά;

¹² Καζόμ νακχένα ο μπρεσά, οντουλά σο κεράσα για τι υπηρετίνας ι Ιεχωβάς μπορεί τι αλλάνεν. Για παράδειγμας, σκεφτίνεν ο μπουτ αλλαγές σο αβιλέ κι Ιησούσκι ζωή. Κι αρχή ισινέ κορκορό πι Νταντέσαρ. (Παροιμίες 8:22) Σοράν, βοηθιντάς ι Ιεχωβάς τι κερέλ ι αγγελόν, ο σύμπαν ντα ι τζενέν. (Κολοσσαείς 1:16) Πιο σοράν, μπουτσσάντιλο κι πφουβ. Μπιάντιλο σαρ χουρντό μαξίμι, μπαριλό ντα αβιλό μπαρό τζενό. (Φιλιππησίους 2:7) Αφού μουλό, ο Ιησούς βουρτισάλο κο ουρανός ντα αβιλό Βασιλιάς κι Βασιλεία κι Ντεβλέσκι κο 1914. (Εβραίους 2:9) Επίσης κο μέλλον, αφού κα κυβερνίνελ σαρ Βασιλιάς για χίλια μπρεσά, ο Ιησούς κα ντελ ι Βασιλεία κο Ιεχωβά για «τι αβέλ ο Ντεβέλ τα πάντα σαριλένγκε».—1 Κορινθίους 15:28.

¹³ Μπορεί αμαρέ ζωγιάτε-ντα τι αβένα-πες μπουτ αλλαγές. Μπάζιμ αμαρέ ευθύνες μπορεί τι αλλάνεν κατά αποφάσεις σο λάσα. Για παράδειγμας, μπορεί τι ισινάμας εργένια ντα σοράν τι παντρισάλαμ. Ή μπορεί τι τθεράσα τσσαβέν. Σοράν, μπορεί τι αποφασιντάμ τι κεράς μερικές αλλαγές για τι μπορίνας τι υπηρετίνας ι Ιεχωβάς  κι ολοχρόνια υπηρεσία. Γιαβερά φορές, αμαρέ ευθύνες μπορεί τι αλλάνεν επειδή αλλαξάλε μερικά πράγματα αμαρέ ζωγιάτε. Μπορεί τι τθεράσα ι ευκαιρία τι κεράς πιο μπουτ πράγματα ή μπορεί μα τι μπορίνας τι κεράς αζόμ μπουτ πράγματα. Αλλά είτε ισινάμ τερνέ είτε πφουρέ, είτε τθεράσα λατσσί υγεία είτε να τθεράσα, ο Ιεχωβά τζανέλα σο μπορίνελα τι κερέλ ο κάθε εκ αμένταρ για τι υπηρετίνελ-λες πιο λατσσές. Να μπεσέλα αμένταρ τι κεράς πιο μπουτ πράγματα οντουλένταρ σο μπορίνασα. Ντα ισί μπουτ χαρούμενος σαρέ ι πραγματέντζαρ σο κεράσα λέσκε.—Εβραίους 6:10.

14. Σαρ μπορίνελα η μετριοφροσύνη τι βοηθίνελ-αμέν τι αβάς ικανοποιημέ ντα χαρούμενοι σο-ντα τι αβέλ-πες;

¹⁴ Ο Ιησούς αρακχέλας χαρά σαρέ κο διορισμούς σο ντέλας-λες ο Ιεχωβά, ντα μπορίνασα αμέν-ντα τι αρακχάς χαρά κο διορισμούς σο τθεράσα. (Παροιμίες 8:30, 31) Εκ τζενό σο ισί μετριόφρων ισί ικανοποιημέ με το διορισμοί ντα με το ευθύνες σο τθερέλα αντρέ κι εκκλησία. Να ντικχέλα ο πράγματα σο κερένα ο γιαβερά, αλλά ισί ικανοποιημέ με τη θέση σο τθερέλα αντρέ κι οργάνωση κι Ντεβλέσκι. Ντικχέλα πι θέση σαρ τι αβιλίας κατά Ιεχωβά. Εκ τζενό σο ισί μετριόφρων επίσης σεβάνελα ι γιαβερέν ντα χαιρίνελα τι στηρίνελ-λεν. Αγαβέλα ότι ο Ιεχωβά ντινάς λέντε-ντα εκ θέση κι οργάνωση.—Ρωμαίους 12:10.

15. Σο σικλιάσα κατά παράδειγμας του Γεδεών;

¹⁵ Ο Γεδεών ισί εκ μπουτ λατσσό παράδειγμας μετριοφροσύνης. Όταν ο Ιεχωβά διοριντάς-λες τι σώνελ ι Ισραηλιτέν κατά Μαδιανίτες, ο Γεδεών βακερντάς: «Μι φαμιλί νανέ ιτς σημαντική κι φυλή του Μανασσή ντα με ισινόμ ο πιο ασήμαντος μι νταντέσκε κχερέστε». (Κριτές 6:15) Όμως  ο Γεδεών τθερέλας εμπιστοσύνη κο Ιεχωβά ντα δεχτιντάς οντουβά διορισμός. Σοράν ο Γεδεών κερντάς προσπάθεια για τι αγαβέλ λατσσές σο μανγκέλας λέσταρ ο Ιεχωβά ντα κερντάς προσευχή για τι οδηγίνελ-λες. (Κριτές 6:36-40) Ο Γεδεών ισινέ ζουρανό ντα μπίνταρανο μουρς, αλλά ισινέ επίσης σοφός ντα προσεκτικός. (Κριτές 6:11, 27) Σοράν, όταν ο λαός βακερντάς λέσκε τι κυβερνίνελ, βοβ να μανγκλάς. Αφού κερντάς οντουβά σο μανγκλάς λέσταρ ο Ιεχωβά, γκιλό πέσκε πι κχερέστε.—Κριτές 8:22, 23, 29.

16, 17. Σαρ μπορίνελα εκ μετριόφρων τζενό τι κερέλ πρόοδος;

¹⁶ Άμα εκ τζενό λέλα εκ νεβό διορισμός ή μανγκέλα τι κερέλ πιο μπουτ κι εκκλησία, ανταβά να μανγκέλα τι βακερέλ ότι νανέ μετριόφρων. Η Γραφή βακερέλα ότι ισί λατσσό για εκ υπηρέτη του Ιεχωβά τι μανγκέλ τι υπηρετίνελ πι πφραλέν πιο μπουτ ντα τι κερέλ πρόοδος. (1 Τιμόθεο 4:13-15) Αλλά πρέπει τι λας εκ νεβό διορισμός για τι κεράς πρόοδος; Όχι. Σαρέ μπορίνασα τι συνεχίνας τι κεράς πιο λατσσί αμαρί Χριστιανική προσωπικότητα ντα ο ικανότητες σο ντινάς-αμέν ο Ιεχωβά για τι μπορίνας τι υπηρετίνας-λες πιο λατσσές ντα τι βοηθίνας γιαβερέν.

¹⁷ Πριν τι δεχτίνελ εκ διορισμός, ο μετριόφρων τζενό ρόντελα τι αρακχέλ σο κα χρειαζίντιβελ τι κερέλ. Κερέλα προσευχή ανταλέσκε ντα σκεφτίνελα προσεκτικά άμα κα μπορίνελας τι κερέλ οντουβά διορισμός. Κα συνεχίνελ τι τθερέλ χρόνος ντα δύναμη για τι κερέλ γιαβερά-ντα σημαντικά πράγματα; Αν όχι, κα μπορίνενας γιαβερά τζενέ τι κερέν μερικά κατά πράγματα σο κερέλα βοβ ακανά; Αφού κα σκεφτίνελ-λες ανταβά, εκ μετριόφρων τζενό μπορεί τι αποφασίνελ ότι να μπορίνελα τι δεχτίνελ ανταγιά νεβί ευθύνη. Άμα ισινάμ μετριόφρονες, μπορεί τι χρειαζίντιβελ τι βακεράς όχι.

18. (α) Σο κα κερέλ εκ μετριόφρων τζενό όταν ντιντιόλα-λες εκ νεβό διορισμός; (β) Σαρ βοηθίνελα-αμέν ο εδάφιος Ρωμαίους 12:3 τι αβάς μετριόφρονες;

¹⁸ Ο Ιεχωβά μανγκέλα αμένταρ “τι πφιράς με μετριοφροσύνη” λέσκε ντρομέστε. (Μιχαίας 6:8) Οτθάρ, όταν ντιντιόλα-αμέν εκ νεβό διορισμός, ρόντασα σαρ κα οδηγίνελ-αμέν ντα μανγκάσα λέσταρ τι βοηθίνελ-αμέν, σαρ κερντάς ο Γεδεών-ντα. Χρειαζίντιβελα τι σκεφτίνας λατσσές σαρέ οντουλά σο βακερέλα αμένγκε ο Ιεχωβά αντράλ κατά Γραφή ντα κατά οργάνωση σο τθερέλα. Πρέπει τι ντας-αμέν γκοντί ότι, σο-ντα κεράσα για τι υπηρετίνας-λες, να κεράσα-λες επειδή τθεράσα ο ικανότητες αλλά επειδή ο Ιεχωβά ισί ταπεινός ντα μανγκέλα τι βοηθίνελ-αμέν. (Ψαλμός 18:35) Εκ μετριόφρων τζενό να κα «σκεφτίνελ πι νεαυτόσκε πιο μπουτ πράγματα από ό,τι πρέπει τι σκεφτίνελ».—Διαβάνεν Ρωμαίους 12:3.

19. Σόσκε πρέπει τι αβάς μετριόφρονες;

¹⁹ Εκ μετριόφρων τζενό τζανέλα ότι σάντε ο Ιεχωβά αξίνελα σαρί ι δόξα, επειδή Βοβ κερντάς-αμέν ντα ισί ο πιο Μπαρό σαρό κο σύμπαν. (Αποκάλυψη 4:11) Άμα ισινάμ μετριόφρονες, κα αβάς χαρούμενοι σαρέ οντουλέντζαρ σο μπορίνασα τι κεράς για τι υπηρετίνας ι Ιεχωβάς. Κα σεβάνας ο αισθήματα ντα ο απόψεις αμαρέ πφραλένγκε ντα πφενίνγκε ντα κα αβάς ενωμέ. Εκ μετριόφρων τζενό σκεφτίνελα προσεκτικά πριν τι κερέλ κάτι, ντα οντουλέσκε να κερέλα σοβαρά λάθη. Ο Ιεχωβά χαιρίνελα οντουλέντζαρ σο ισί μετριόφρονες. Οτθάρ, ισί μπουτ σημαντικός τι αβέν μετριόφρονες ο τζενέ σο ισί κι Ντεβλέσκο λαός. Κο γιαβέρ μάθημας, κα ντικχάς σαρ μπορίνασα τι ατσσάς μετριόφρονες ατζέ-ντα όταν ισί δύσκολος ανταβά.