Ο Χριστιανοί σο ισί παντριμέ πρέπει τι λεν εκ απόφαση σο κα κερέλ-λεν τι τθερέν πάκι συνείδηση. Για τι κερέν-λες ανταβά, πρέπει τι σκεφτίνεν μπουτ λατσσές σο μπουτί κερέλα ο σπιράλ ντα σο βακερέλα η Αγία Γραφή ανταλέ θεμάσκε.

Ο Ιεχωβά ντινάς ι εντολή κο Αδάμ ντα κι Εύα ντα, πιο σοράν, κο Νώε ντα λέσκε φαμιλιάτε: «Τι κερέν μπουτέ τσσαβέν ντα τι αβγατίντιβεν». (Γένεση 1:​28· 9:1) Η Αγία Γραφή να βακερέλα ότι ο Χριστιανοί πρέπει τι ακολουθίνεν ανταγιά εντολή. Άρα, ο αντρόγυνα σο να μανγκένα τι κερέν τσσαβέν ή σο μανγκένα τι τραμπίνεν βον κάνα ντα καζομέ τσσαβέν κα κερέν πρέπει τι αποφασίνεν άμα κα λεν μέτρα για μα τι ατσσόλ κχαμνί η τζουβέλ. Καλά πράγματα πρέπει τι ντικχέν;

Ο Χριστιανοί πρέπει τι βασίντιβεν κο εντολές κι Γραφιάκε όταν αποφασίνενα κάνα ή άμα κα κερέν τσσαβέν. Οτθάρ, να κα χρησιμοποιήνενας ποτές ο περαβκιαριπέ σαρ λύση. Όταν εκ τζενί περαβκιαρέλα-πες ο αποτέλεσμας ισί ότι να μπιάντιβελα εκ μαξίμι. Ο περαβκιαριπέ τζάλα κόντρα οντουλέντζαρ σο βακερέλα η Γραφή για το σεβασμός σο πρέπει τι τθερέλ κάποιος ι ζωγιάκε. (Έξοδος 20:​13· 21:​22, 23· Ψαλμός 139:​16· Ιερεμίας 1:5) Σο κα βακεράς λοιπόν για το σπιράλ;

Η Σκοπιά 15 Μαΐου 1979, σελίδες 30, 31 (1 Σεπτεμβρίου 1979, σελίδες 29, 30, κι μπαλαμανί τσσιπ) βακερντάς ανταλέ θεμάσκε. Ο σπιράλ σο τσσουβένας αζομάν ισινέ πλαστικά ντα τζάνας αντρέ κι μήτρα για μα τι ατσσόλ κχαμνί εκ τζουβέλ. Οντουβά θέμας βακερέλας ότι ο τζενέ να τζανένας ακριβώς σαρ λειτουργίνενας. Μπουτ επιστήμονες βακερντέ ότι ο σπιράλ εμποδίνενας ο σπερματοζωάρια τι ερεσέν κο ωάρια ντα αντικάς τι ατσσόλ κχαμνί εκ τζουβέλ. Άμα να ντινάας εκ σπερματοζωάριος αντρέ σε εκ ωάριος, να αρχίνελας εκ νεβί ζωή.

Όμως, μερικές φορές εκ σπερματοζωάριος μπορίνελας τι ντελ αντρέ σε εκ ωάριος. Οντουβά ωάριος μπορεί τι μπαριόλας κι σάλπιγγα (έκτοπη κύηση) ή τι ερεσέλας κι μήτρα. Άμα ερεσέλας κι μήτρα, ο σπιράλ κα μπορίνελας τι εμποδίνελ οντουβά ωάριος τι τζαλ αντρέ κο ενδομήτριος ντα αντικάς τι μερέλας. Ανταβά κα αβέλας σαρ περαβκιαριπέ. Ο θέμας βακερέλας κο τέλος: «Ο σωστοί Χριστιανοί σο σκεφτίνενα άμα ισί λατσσό τι τσσουβέν εκ ασακό σπιράλ πρέπει τι ντικχέν μπουτ λατσσές ανταλά πληροφορίες σύμφωνα οντουλέντζαρ σο βακερέλα η Γραφή για το σεβασμός σο πρέπει τι σικαβέλ κάποιος ι ζωγιάκε».​—Ψαλμός 36:9.

Από αζομάν όμως σο νικίστιλο ανταβά θέμας κο 1979 η επιστήμη ντα η ιατρική προχωρισάλι μπουτ.

Νικίστιλε ντούι νεβέ σπιράλ. Ο εκ τθερέλα χαλκός ντα αρχισάλε τι χρησιμοποιήνεν-λες κο Ηνωμένες Πολιτείες κο 1988. Ο γιαβέρ μουκχέλα εκ ορμόνη ντα μπικίντιβελα κατά 2001. Σαρ λειτουργίνενα ανταλά ντούι σπιράλ;

Σπιράλ από χαλκός: Σαρ βακερντάμ πιο οπρέ, ο σπιράλ εμποδίνενα ο σπερματοζωάρια τι τζαν κι μήτρα για τι ερεσέν σε εκ ωάριος. Επίσης, ο σπιράλ σο τθερένα χαλκός, μάλλον κερένα κακός κο σπερματοζωάρια ντα μουνταρένα-λεν. * (Ντικχ ι υποσημείωση) Επίσης, ανταλά συγκεκριμέ σπιράλ βακέρντιβελα ότι σανιαρένα ο ενδομήτριος.

Σπιράλ με ορμόνη: Εκ γιαβέρ σπιράλ τθερέλα εκ ορμόνη σαρ οντιά σο τθερένα ο αντισυλληπτικά χάπια. Ανταλά σπιράλ λειτουργίνενα σαρ ο προηγούμενα, αλλά μουκχένα επίσης ι ορμόνη-ντα κι μήτρα. Ανταβά μερικέ τζουβλίντε εμποδίνελα ο ωάρια τι ελευθερώντιβεν. Φυσικά, άμα να ελευθερωσάλο εκ ωάριος, να μπορίνελα τι ατσσόλ κχαμνί εκ τζουβέλ. Ανταλά σπιράλ  σανιαρένα ο ενδομήτριος. * (Ντικχ ι υποσημείωση) Επίσης, κερένα πιο πηχτή ι βλέννα, δηλαδή ο υγρά κο τράχηλος ντα ανταβά τθερέλα σαρ αποτέλεσμας μα τι μπορίνελ ο σπέρμας τι νακχέλ για τι τζαλ κι μήτρα.

Σαρ βακερντάμ πιο οπρέ, ο ντούι-ντα σπιράλ μάλλον σανιαρένα ο ενδομήτριος. Ανταβά μανγκέλα τι βακερέλ ότι άμα εκχέ τζουβλιάτε ελευθερώντιβενα ωάρια ντα εκ σπερματοζωάριος ντινάς αντρέ σε εκ ωάριος, κα μπορίνελας τι τζαλ κι μήτρα αλλά να κα μπορίνελας τι ασταρέλ η τζουβέλ επειδή ο ενδομήτριος δυσκολίντιβελα τι δεχτίνελ-λες. Ανταβά κα κερέλας ι τζουβλιά τι περαβέλ κατά πρώτα ντιβεσά. Όμως, ο επιστήμονες πακιάνα ότι ανταβά αβέλα-πες σπάνια, ντα μπορίνελα επίσης τι αβέλ-πες με τα αντισυλληπτικά χάπια-ντα.

Οντουλέσκε, καέκ ναστί μπορίνελα τι βακερέλ με σιγουριά ότι ο σπιράλ σο τθερένα χαλκός ή σο μουκχένα εκ ορμόνη κα κερέν σίγουρα εκ ωάριος μα τι ασταρέλ εκ σπερματοζωάριος. Όμως, ο στοιχεία σο τθερένα ο επιστήμονες σικαβένα ότι, οντουλά σπιράλ σο βακερντάμ λένγκε πιο οπρέ εμποδίνενα εκ ωάριος τι ασταρέλ εκ σπερματοζωάριος, οτθάρ σπάνια ατσσόλα κχαμνί εκ τζουβέλ.

Ο Χριστιανοί σο ισί παντριμέ ντα μανγκένα τι τσσουβέν σπιράλ κα μπορίνενας τι συζητίνεν πουμαρέ γιατρόσαρ. Βοβ ή βόι μπορεί τι βακερέλ λένγκε καλά σπιράλ υπαρχίντιβενα λένγκε τθεμέστε ντα για το λατσσέ αποτελέσματα ή για το κίνδυνοι σο μπορεί τι αβέν ι τζουβλιάκε. Ο αντρόγυνος δεν πρέπει τι μπεκλεντίνελ ή τι μουκχέλ εκχέ γιαβερές, ατζέ-ντα άμα ισί γιατρός, τι αποφασίνελ λένγκε. (Ρωμαίους 14:​12· Γαλάτες 6:4, 5) Ανταγιά ισί εκ προσωπική απόφαση σο πρέπει τι λεν-λα σαρ αντρόγυνος. Οντουβά σο πρέπει τι τθερέν πρώτα πουμαρέ γκοντιάτε ισί τι ευχαριστίνεν ι Ντεβλές ντα τι τθερέν πάκι συνείδηση.​—Ντικχ 1 Τιμόθεο 1:​18, 19· 2 Τιμόθεο 1:3.