Ο μπουτιαρνέ τζενέ να νταρένα τι κερέν μπουτί. Οκιά μπάνταρ, μπεϊντίνενα τι κερέν μπουτί σκληρά για τι νικαβέν πουμαρό μαντρό ντα τι βοηθίνεν γιαβερέν​—ατζέ-ντα άμα η μπουτί σο κερένα ισί ταπεινή.

Είτε μπεϊντίνασα-λες, είτε να μπεϊντίνασα-λες, η ζωή ισί πφερντί ευθύνες. Ανταλέ ντουνιάστε, ο πο μπουτ τζενέ να μπεϊντίνενα τι κερέν μπουτί σκληρά, οντουλέσκε άμα ισινάν μπουτιαρνό ανταβά ισί μπουτ λατσσό.​—Εκκλησιαστής 3:13.

«Τθεράβα αγαντό ότι κάνα κερέσα μπουτί σκληρά, ανταβά κερέλα-τουτ τι νιωθίνες πφερντό. Κι πραγματικότητα επειδή νιωθίναβας αντικάς, ανταβά βοηθιντάς-μας τι μανγκάβ ι μπουτί. Επίσης, άμα ισινάν υπεύθυνος τι μπουτιάτε, τθερέσα λατσσό ναβ».​—Ρέιαν.

ΑΡΧΗ ΚΑΤΑ ΓΡΑΦΗ: «Η κάθε προσπάθεια σο κερντιόλα ανέλα λατσσιπέ».​—Παροιμίες 14:23.

Ανταλά σο κα ντικχές πο τελέ κα βοηθίνεν-τουτ τι μπεϊντίνες ι μπουτί.

Τι χαιρίνες κάνα σικλιόσα τι κερές κάτι λατσσές. Είτε κερέσα ο μπουτιά κο κχερ είτε ο μαθήματα ι σχολειόσκε είτε κερέσα μπουτί κάπου γιαβερτθέ, κερ ο πο λατσσό σο μπορίνεσα. Άμα κα σικλιός τι κερές εκ μπουτί σωστά, προσπάθινε τι αρακχές τρόπους για τι κερές-λα πο σουγκό ή πο λατσσές. Καζόμ πο λατσσό κα αβές τι μπουτιάτε, αζόμ πο μπουτ κα μπεϊντίνες-λα.

ΑΡΧΗ ΚΑΤΑ ΓΡΑΦΗ: «Ντικχλάν τζενές σο ισί μπουτ λατσσό πι μπουτιάτε; Βοβ κα ατσσόλ ανγκλάλ κο βασιλιάδες· να κα ατσσόλ ανγκλάλ απλέ τζενέντε».​—Παροιμίες 22:29.

Τι ντικχές ο λατσσίματα. Σχεδόν σαρέ κο περιπτώσεις, κάνα κερέσα λατσσές το μπουτιά, βοηθίνεσα ι γιαβερέν. Για παράδειγμας, κάνα ισινάν μπουτιαρνό κο κχερ, κερέσα πο εύκολη ι ζωή ι γιαβερένγκι κι φαμιλί.

ΑΡΧΗ ΚΑΤΑ ΓΡΑΦΗ: «Ισί πο ευτυχισμέ εκ τζενό κάνα ντέλα παρά κάνα λέλα».​—Πράξεις 20:35.

Κερ ατζέ πο μπουτ. Προσπάθινε μα τι κερές σάντε οντουλά σο πρέπει, αλλά κερ ατζέ πο μπουτ. Ανταλέ τροπόσαρ κερέσα τούι κουμάντος τι ζωή​—κερέσα πο μπουτ όχι επειδή ζορισκιαρένα-τουτ, αλλά επειδή τραμπίνεσα-λες τούι.​—Ματθαίος 5:41.

ΑΡΧΗ ΚΑΤΑ ΓΡΑΦΗ: «Ο λατσσιπέ σο κα κερές μα τι αβέλ ζορίσαρ, αλλά επειδή μανγκέσα-λες».​—Φιλήμονα 14.

Τι αβές ισορροπημέ. Ο μπουτιαρνέ τζενέ νανέ τεμπέληδες, αλλά νανέ κολλημέ-ντα κι μπουτί. Ισί ισορροπημέ—μπεϊντίνενα τι κερέν σκληρή μπουτί, αλλά τι ξεκουράντιβεν-ντα.

ΑΡΧΗ ΚΑΤΑ ΓΡΑΦΗ: «Πο λατσσές τι μπεσές χάνικ παρά τι κερές μπερεκέτι πφαρί μπουτί ντα τι κουλαντίνες ι μπαρμπάλ».​—Εκκλησιαστής 4:6.