Кеда геле песке тари градина Еден, о Адам хем и Ева сине лен бут чхаве. Ленгоро прво чхаво, о Каин, уло земјоделцо, а ленгоро дујто чхаво, о Авел, аракхела сине бакхрен.

Јекх диве о Каин хем о Авел денѓе жртве е Јеховаске. Џанеа ли сој адава жртва? Адава тано поклон со дела пе е Девлеске. О Јехова радујнѓа пе баши жртва е Авелескири, ама на радујнѓа пе баши жртва е Каинескири. Адалеске о Каин бут хољанѓа. О Јехова вакерѓа е Каинеске ма те овел понадари хољамо соске ка шај те керел нешто лошно. Ама, о Каин на шунѓа ле.

Наместо адава, о Каин вакерѓа е Авелеске: „Ава манцар ко поле“. Кеда ресле адари, о Каин нападинѓа пле пхрале хем мударѓа ле. Со керѓа о Јехова башо акава? О Јехова  казнинѓа ле аѓаар со палдинѓа ле дур тари лескири фамилија. О Каин на смејнела сине те иранел пе више палал.

Со сикљоваја таро акава? Шај ка почмина те хољана ако нане са сар со мангаја амен. Ако дикхаја кај амари холи овела побари, или некој авела те вакерел аменге кај сием бут хољаме, тегани ваљани одма те попрајна амен, хем те почмина те контролирина амаре чувствија англедер ола те контролиринен амен.

Адалеске со о Авел мангела сине е Јехова хем керела сине шукар буќа, о Јехова на бистерѓа ле. О Јехова ка иранел е Авеле ко живото кеда и пхув палем ка овел рај.