Bibliaqa manan aborto simitachu utilizan wijsallapiraq kaq wawata wañuchiymanta rimaspaqa. Ichaqa Bibliapi askha textokunapin rimashan imaynatachus Dios kausayta qhawarisqanmanta, manaraq naceshaq wawaq kausayninta imayna qhawarisqanmantapas.

 Kausaytaqa Diosmi qowanchis (Génesis 9:6; Salmos 36:9). Diospaqqa lliu kausaypas ancha valorniyoqmi, wijsallapiraq kaq wawaq kausayninpas. Chhaynaqa pipas wijsallapiraq kaq wawata manaraq wawayoq kayta munaspa abortanman chayqa jatun juchatan ruwashan.

 Kamachikuykunata Dios israelitakunaman qosqanpin kayta nirqan: “Runakunachus maqanakushaspa juj onqoq warmita takanqaku, chay warmitaqchus manaraq tiempopi onqokunqa chayqa, chay warmiq qosanpa imachus mañakusqantan juchayoq runaqa paganqa; manaña pipas wañurqanchu chaypas. Ichaqa juezpa nisqanman jinan chay pagoqa kanqa. Ichaqa chay warmipas otaq wawapas wañunqa chayqa, wañullanqataqmi chay wañuchiq runapas. Kausaymantan kausayninwan paganqa”, nispa (Éxodo 21:22, 23, La Biblia,Traduccion del Nuevo Mundo). a

•  ¿Jayk’aqmantapachan juj runaq kausaynin qallarin?

•  ¿Perdonanmanchu Dios wijsallapiraq kaq wawata abortaq warmita?

•  ¿Allinchu kanman abortay sichus onqoq warmiq kausaynin otaq wawaq kausaynin peligropi tarikuqtin?

 Diospaqa kausayqa qallarin warmiq onqoq rijurisqanmantapachan. Chaymi Bibliapi nisqan jina Diosqa manaraq naceq wawata juj runata jinaña qhawarisqanta. Qhawasunchis wakin ejemplokunata imaynatas Diospaqqa wijsallapiraq kaq wawaq kausayninpas chayraq naceq wawaq kausayninpas kaq valorniyoq kasqanmanta.

•   Rey Davidmi Diosta nirqan: “Wijsallapiraq kashaqtiymi rikuwarqankiña”, nispa (Salmos 139:16) b. Chhaynaqa Davidtaqa manaraq naceshaqtinpas Diosqa juj runata jinañan qhawarirqan.

•   Juj ejemplomantañataq yachasun. Diosmi profeta Jeremiasta ajllarqan juj llank’ayta ruwananpaq manaraq naceshaqtin. Diosmi Jeremiasta nirqan: “Mamaykiq wijsanpi manaraq kashaqtiykin ajllakurqayki, manaraq nacemushaqtiykin t’aqakurqayki, jatun suyukunapaq profeta kanaykipaqmi churarqayki”, nispa (Jeremías 1:5).

•   Chaymantapas Bibliata qelqaq Lucas sutiyoq doctorpas griego rimaypi qelqasqanpin kaq simita usarqan wijsapi kaq wawamanta rimaspa chaymantapas chayraq nacesqa wawamanta rimaspapas (Lucas 1:41; 2:12, 16).

 Arí, Jehová Diosqa perdonanmanmi wawa abortaqta sichus Dios jina kausayta valoraqtinqa, chaymantaqa manañan ñaupaqpi jucha ruwasqanmanta juchachakunanñachu. Bibliapin nin: “Señor Diosqa khuyapayakuqmi sumaq sonqoyoqmi [...]. Imaynan inti lloqsimuyta inti jaykuytawan karunchan, ajinatan juchanchiskunata karunchawanchis”, nispa c (Salmos 103:8-12). Pipas ima juchataña ñaupaqpi ruwarqan, wawataña abortarqan chaypas Jehová Diosqa perdonanqan sichus cheqaqtapuni arrepientekuqtinqa (Salmos 86:5).

 Bibliapi nisqan jina manaraq naceq wawaq kausayninqa Diospaqqa ancha valorniyoqmi, chaymi onqoq warmiq kausaynin peligropiña kaqtinpas otaq wawanpa kausaynin peligropiña kaqtinpas wawa abortayqa manan allinchu.

 Sichus juj warmi onqokushaqtin wawanpas otaq paypas wañupushanmanña chayqa, ¿pitan salvankuman? ¿Wawatachu otaq paytachu? Manaña sapa kutinchu chaykuna pasan chaypas, chaypiqa qosanmi otaq juj familianmi decidinan mayqenpa kausayninta salvanankuta.