Llapallanchismi hamuq tiempomanta yachayta munanchis, chaymi tapukunchis: “¿Aswan allin kawsaychu kanqa wawaykunapaq? ¿Chinkachisqachu kanqa kay hallp’a? ¿Imatan ruwayman hamuq tiempopi aswan allin kawsayniyoq kanaypaq?”, nispa. Chaykunataqa tapukunchis thakpi, mana manchakuspa kawsayta munaspan. Hamuq tiempopi imachus kananta yachaspaqa, chayman hinan imatapas ruwasunman.

¿Yachanmanchu pillapas hamuq tiempopi imakuna kanantapas? Hamuq tiempomanta willakuqkunaq nisqanqa iskay kinsallan hunt’akurqan. Diospa willasqanmi ichaqa llapanpuni hunt’akun. Biblian nin: “Qallariymantapachan willani qhepaman imaynachus tukukunanta, qhepaman imachus kanantan ñawpaqmantaña willani”, nispa (Isaías 46:10). ¿Diospa ima profeciankunan hunt’akurqan?

¿Yanapawasunmanchu ñawpa tiempopi Diospa willachisqan profeciakuna imayna hunt’akusqanmanta yachay? Arí yanapawasunmanmi. Chaypaq kaywan rikch’anachisun. Tiempomanta yachaq runa sapa kutilla willasqan hunt’akunman chayri, ¿iskayasunmanchu paymanta? Manapunichá, aswanchá sapa tutamantan uyarisunman chay p’unchay parananpaq otaq ruphayananpaq willasqanta. Diospa willachisqan profeciakuna hunt’akusqanmanta yachasqanchispas yanapawasunmanmi hamuq tiempomanta profeciakunapi confiananchispaq.

HUK HATUN LLAQTA THUNISQA KAPURQAN:

¿Ima niwaqmi huk hatun llaqta thunichisqa kananmanta profetaq willasqan qhepaman hunt’akuqtin?  ¡Anchatachá admirakuwaq! Chay hinatan Diospas huk profetanwan willachirqan Nínive llaqta thunichisqa kananta (Sofonías 2:13-15). ¿Hunt’akurqanchu chay profecía? Huk qelqakuna nisqan hina, qanchis pachak watakuna ukhupin, manaraq Jesús hamushaqtin, Babilonia, Media llaqtakunamanta soldadokuna Nínive llaqtaman phawaykurqanku, chayqa sucederqan chay profecía 15 wata willakusqan qhepamanmi. Diosmi willachisqaña Nínive llaqtata ‘ch’inneqta hina ch’akiman tukuchinanta’. Chay llaqtaqa 518 kilómetro hinan karqan, chaywanpas manan hap’ikapurqankuchu aswanmi thunispan q’ara pampaman tukuchipurqanku. Chaytaqa manan mayqen tanteaq runapas yachayta atinmanchu karqan.

“QAN PATAPI RUNA TULLUTA RUPHACHINQA”:

Diospa huk profetanmi 300 wata ñawpaqta willarqan huk runa altar patapi runakunaq tullunta ruphachinanta, willarqantaqmi chay runaq sutinta, mayqen familiamanta kananta, ima llaqtapi ruphachinan kasqantapas. Chay willasqanqa llapallanmi hunt’akurqan. ¡Kay tiempopi chay hina profeta kanman chayqa, ancha allin reqsisqachá kapunman! Diosmi willachirqan Davidpa mirayninmanta Josías, Betel llaqtapi runakunaq tullunta ruphachinan kasqanta (1 Reyes 13:1, 2). ¿Hunt’akurqanchu chay profecía? Arí, 300 wata qhepamanmi Davidpa mirayninmanta Josías nacerqan. Paymi “kamachirqan aya tulluta horqomunankupaq. Chaytataq [Betelpi kaq] altar patapi ruphachirqan” (2 Reyes 23:14-16). ¡Manan runallaqa chayta yachanmanchu karqan!

HUK ATIYNIYOQ LLAQTA THUNISQA KAPURQAN:

Sichus pipas willanman huk atiyniyoq llaqta thunisqa kananta, chay llaqtata thuniq manaraq nacemushaqtin chayqa, anchatachá admirakusunman. Chay hina willakuytan profetanwan Dios willachirqan. Willachirqanmi huk runa Ciro sutiyoq huk atiyniyoq llaqtata thunichipunanta, judío runakunata kamachi kasqankumanta kacharichipunanta, Dios yupaychana wasi yapamanta hatarichisqa kananpaq yanapakunantawan. Hinaspapas enemigonta atipananpaq mayuta ch’akichinan  kasqanta, enemigokunaq llaqta punkun kicharparisqa kanantapas (Isaías 44:27-45:2). ¿Hunt’akurqanchu chay willachisqan? Huk librokuna nisqan hina hunt’akurqanmi. Rey Ciron Babilonia llaqtata atipananpaq llaqtaq qayllanpi mayuta huk ladoman kichaspa ch’akichirqan. Hinaspapas punku kicharayasqa kasqanraykun soldadokuna haykurqanku. Qhepamanmi rey Ciro, Diosta mana reqsishaspa, judiokunata kacharipurqan kamachirqantaq Jerusalenpi yupaychana wasita allichanankupaq (Esdras 1:1-3). Chay hina willakuykunataqa Diosllan willachinman karqan.

Kaypin yacharunchis kinsa profeciakuna hunt’akusqanmanta, ichaqa manan chayllachu hunt’akurqan. Ñawpaq tiempopi Israel llaqtata umalliq Josué runan llaqtata nirqan: ‘Qankunan tukuy alma, tukuy sonqo Señor Diospa sumaq nisqasuykichista llapanta hunt’asqanta reqsinkichis, payqa llapantapunin rimarisqantaqa hunt’arqan’, nispa (Josué 23:1, 2, 14). Arí, chay tiempopi Israel runakunaqa paykuna kikinkun rikurqanku Diospa lliw rimasqan hunt’akusqanta. ¿Imaraykun Diospa lliw rimasqan hunt’akun? Mana runakunaq willasqan hinachu kasqanrayku. Chayta yachasqanchismi anchata yanapawanchis hamuq tiempopaq profeciakunapi confiananchispaq.

Runakunaqa cienciamanta yachasqankuman hina, tanteasqankuman hina otaq atiyniyoqpaq yuyaykusqankuman hina imatapas willanku. Willasqanku qhepamantaq suyanku imachus sucedenanta (Proverbios 27:1).

Diosmi ichaqa tukuy imatapas yachan. Yachanmi runakuna imayna kasqankuta, ima ruway munasqankutapas. Chaymi yachanña huk runa otaq huk nación imaynapi tarikunanta. Hinaspapas Diosqa munayninman hinan imatapas ruwachinman otaq cambianman. Pay kikinmi nin: “Rimasqay simiyqa manan hinallachu kutimuwanqa, aswanpas imachus munasqaytan ruwanqa”, nispa (Isaías 55:11). Wakin profeciakunan willashan hamuq tiempopi imakuna ruwananmanta, chaytan Diosqa hunt’anqa.

¿Kashanmanchu allin willakuykuna ñoqanchispaq wawanchiskunapaqpas? Arí, kashanmi. Kaypi yuyaykusun: ¿Imatan ruwasunman lloqlla kananta yacharqospa? Kaqratochá tukuy atisqanchista ruwasunman llaqtamanta ayqenapaq. Chay hinatan ruwananchis hamuq tiempopaq Diospa willachisqanta yachaspapas. Arí, Diosmi willachiwashanchis hamuq tiempopi imachus sucedenanta, chayqa manan runakunaq willasqanwan tupanchu. (Qhaway “ ¿Imatan Dios willachiwanchis hamuq tiempomanta?” nisqa recuadrota.)

Biblian willashan imachus hamuq tiempopi kananta, llapallanchistaqmi chaytaqa yachasunman. Dios kikinmi niwanchis: “Qallariymantapachan willani qhepaman imaynachus tukukunanta [...]. Ñoqan nini: Yuyaykusqaykunan hunt’akunqa, tukuy ima munasqaytan ruwasaq”, nispa (Isaías 46:10). Llapallanchismi sumaq kawsayman aypasunman. Chaymanta astawan yachanaykipaq Jehová Diospa testigonkunata tapukuy. Paykunaqa manan watuqchu, espiritukunawan rimaqchu, nitaq imatapas willanankupaq atiyniyoqchu kanku. Paykunaqa Bibliatan estudianku, chaypi yachasqankuman hinataqmi willasunkikuman hamuq tiempomanta.