Jehová Diospa testigonkunawan rimaspa ¿Hanaq pachamanchu allin runakuna rinku?

JEHOVÁ DIOSPA TESTIGONKUNAQA anchatan munanku Bibliamanta runakunawan rimayta. ¿Bibliaq imapas yachachisqantachu mana entiendeshanki? ¿Testigokunaq imapas creesqankumantachu yachayta munanki? Chhayna kaqtinqa, paykunata tapuy. Anchatan kusikunqaku qanwan rimaspa.

Qhawarisun imaynatas Testigokuna runakunawan parlarinku chayta, chaypaqmi Marcos sutiyoq Testigo, wiraqocha Robertowan parlarinqaku.

¿Imatan ruwanqaku hanaq pachaman riqkuna?

Marcos: Hamuq tiempopi yuyaykuspa, ¿kawsayninchis allinyanqachu, aswan millaychu kanqa icha kaqllachu kanqa?

Roberto: Dioswan hanaq pachapi kasun chayqa allinyanqapunin, chaytan ñoqapas suyakushani.

Marcos: Chay suyakuyqa allinpunin. Biblia nin hanaq pachapi kawsayqa ancha sumaq kasqanta. Ichaqa yuyaykurqankichu, ¿imatan runakuna ruwanqaku hanaq pachaman rispa?

Roberto: Diostachá chaypiqa wiñaypaq yupaychasun.

Marcos: Chhaynapas kanmanmi. Biblian ichaqa mana hanaq pachapi ancha sumaq kawsay kanallantachu willan, aswanpas willallantaqmi imaymana ruwaykunata hunt’anankumanta.

Roberto: ¿Ima ruwanakunataq chayri?

Marcos: Apocalipsis 5:10 textopin khaynata nishan: “Diosniykupaqmi paykunamanta qhapaqsuyuta [otaq gobiernota] ruwarqanki, sacerdotekunata churarqanki, chaymi kay pachapi kamachikunqaku”, nispa. ¿Reparankichu imakunatan ruwanqaku hanaq pachaman riqkuna?

Roberto: Leesqayki hina, “kay pachapi kamachikunqaku”.

Marcos: Chayqa ancha allinmi riki.

¿Pikunatan kamachimunqaku?

Marcos: Reykunataq hanaq pachaman riqkuna kanqaku chayqa, ¿manachu kananpuni runakuna kamachimunankupaq? Pipas huk gobiernopi kamachimunanpaqqa kananpunin runakuna, ¿riki?

Roberto: Arí, chhaynapunin.

Marcos: Chhaynaqa, ¿pikunatan kamachimunqaku?

Roberto: Kay pachapi manaraq wañupuq runakunatachá riki.

Marcos: Chhayna kanman chayqa llapa runakunachá hanaq pachaman ripunanku  kanqa. Ichaqa, ¿wakin sumaq runakuna mana hanaq pachaman rinkumanchu chayri?

Roberto: Manachus hina mayqen cristianopas chaytaqa creenmanchu.

Marcos: Chaytaqa nishani Salmo 37:29 textopi willasqanta. Ama hina kaspa, ¿leeruwaqchu?

Roberto: Arí, ninmi: “Chanin runakunaqa kay hallp’atan hap’ikapunqaku, chaypin wiñaypaq tiyanqaku”, nispa.

Marcos: Gracias. Kay textopi nisqan hina, ¿maypin chanin runakuna tiyanqaku?

Roberto: Kay Hallp’api.

Marcos: Arí, ichaqa manan iskay kinsa watakunallapaqchu. Qhawariy, kaypi nishan: “Chaypin wiñaypaq tiyanqaku”, nispa.

Roberto: Chayqa nishanchá kay pachapi allin runakuna kashanallankumanta. Hukkuna wañukapuspa hanaq pachaman rinqaku hukkunataq nacespa kaypi kanqaku.

Marcos: Yaqapaschá hukkuna chhaynata yuyaykunkuman. ¿Llapa allin runakuna kay pachapi wiñaypaq kawsanqaku, nispa ninman chayri?

Roberto: ¿Ima? Mana entiendeykichu.

Kay pachaqa sumaq paraisomanmi tukupunqa

Marcos: Llapa runakunapaq imakuna hamuq tiempopi kananmanta Apocalipsis 21:4 textopi nishan: “Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku”, nispa. Chaytan Bibliaqa nishan kay pachapi kawsaq runakunapaq. ¿Manachu chay ancha sumaq suyakuy?

Roberto: Arí, ¿ichaqa manachu hanaq pachapi kawsaymanta willashan?

Marcos: Hanaq pachaman riqkunapas chaskikunqakun askha bendicionkunata. Ichaqa kaypi leesqanchis hina, ¿imataq pasanqa wañuywanri?

Roberto: Chaypin nishan “manan wañuypas kanqañachu”, nispa.

Marcos: Imapas chinkapunanpaqqa ñawpaqta kananraqmi ¿riki?

Roberto: Arí, chhaynapunin.

Marcos: ¿Nisunmanchu hanaq pachapi wañuy kananta? ¿Manachu kay pachallapi chayqa pasan?

Roberto: Manan hayk’aqpas chaypiqa piensarqanichu.

Marcos: Biblian ichaqa yachachin wakin runakuna hanaq pachaman rinankuta, yachachillantaqmi askha runakuna kay pachapi wiñaypaq tiyanankuta. Jesusmi nirqan: “Kusisamiyoqmi llamp’u sonqoyoqkunaqa, paykunaqa kay pacha hallp’atan herenciapaq chaskinqaku”, nispa. ¿Chayta uyarirqankichu? (Mateo 5:5.)

Roberto: Arí, chaytaqa sapa kutinmi Iglesiapiqa nillankupuni.

Marcos: Apocalipsis libropi nisqan hina, allin runakunaqa kay Hallp’atan hap’ikapunqaku. Chay kawsayqa hukniraymi kanqa, chaypiqa Diosninchismi tukuy millaykunata wañuytapas tukuchipunqa.

Roberto: Entiendeshanin imachus yuyaykusqaykita; ichaqa manan pipas iskay kinsa textokunallawanqa ninmanchu, chhaynapunin nispaqa.

Marcos: Arí, ichaqa kanmi askha textokuna kay pachapi hamuq tiempopi imayna kawsay kananmanta willakuykuna. Sichus tiempoyki kashanraq chayqa leepuykimanmi kay sumaq textotawan.

Roberto: Arí, kashanraqmi tiempoyqa.

Manañan millay runakuna kanqañachu

Marcos: Salmo 37:29 textotan leerqanchisña riki, kunanqa 10, 11 versiculokunatañataq leesunchis. ¿Leeruwaqchu?

 Roberto: Kaypin nishan: “Pisi tiempomantaqa chinkapullanqan millay runakunaqa, maskhaspaykipas manañan tarinkichu. Llamp’u sonqokunan ichaqa kay hallp’ata chaskinqaku, sumaq thak-nisqataq tiyakunqaku”, nispa.

Marcos: Kusa, 11 versículo nisqan hina, ¿maypin ‘llamp’u sonqokuna’ otaq allin runakuna tiyanqaku?

Roberto: Chaypin nishan: “Kay hallp’ata chaskinqaku”, nispa. Chayqa hunt’akushanñan riki, icha, ¿manachu kay pachapi kan allin runakuna?

Marcos: Arí, kanmi, ichaqa nillantaqmi chay versiculopi ‘sumaq thak’ kawsay kananmanta. ¿Chaypas hunt’akushanchu?

Roberto: Chayqa manan hunt’akunchu.

Marcos: Chhaynaqa, ¿imakunan pasanan chay promesa hunt’akunanpaq? Kaypi yuyaykuy, huk hatun wasimanta dueño kashaspa, wakin inquilinoyki sumaqta wasiykipi tiyan, tiyasqan cuartotapas sumaqta cuidan vecinokunawanpas allinpi tarikun. Hukkunataq wasiykita dañota ruwan huk vecinokunawanpas ch’aqwaypi tarikun. ¿Imatan ruwawaq chay inquilinoyki mana cambiayta munaqtin?

Roberto: Wasiymantan qarqopuyman.

Marcos: Chhaynallatataqmi Jehová Diospas ruwanqa mana kasukuq runakunawan. Hukmanta 10 versiculota qhawarisun; chaypi nishan: “Chinkapullanqan millay runakunaqa”, nispa. Chhaynallapin allin runakunaqa kay pachapi kusisqa thakpi kawsanqaku. Manapaschá hayk’aqpas chay hinataqa yachachirqasunkikuchu.

Roberto: Arí, manan hayk’aqpas chaytaqa Iglesiaypi uyarirqanichu.

Marcos: Nisqayki hina manan ratollaqa iskay kinsa textollawanqa creeyta atisunmanchu. Chaytaqa allintan t’aqwirinanchis, chaypaqqa Bibliatan qhawarinanchis imatawanmi nishan chayta yachananchispaq. Chay textokunapi qhawarimusqanchis hina, ¿nisunmanchu: “Wakin allin runakuna hanaq pachamanmi rinqaku, wakintaq kay Hallp’api qhepanqaku”, nispa?

Roberto: Imaynachá kanpas, ichaqa leesqanchiman hina yaqachus hina chhayna kanman. Chaytaqa allintaraqchá t’aqwinay kanqa.

Marcos: Yaqapaschá chaymanta t’aqwisqaykiman hina huk tapuykuna rikhurinqa. Kay hina tapuy: “Manataq hanaq pachamanchu rinku chayqa, ¿maypin allin runakuna wañupuspa kashanku?” nispa.

Roberto: Chaymanta yachayqa allinmi kanman.

Marcos: Kay textokunata qelqapusqayki t’aqwishanaykipaq. * Hinaspa munaymanmi kutimuspa chaymanta rimashanallanchispaq, ¿imaninki?

Roberto: Allinmi kanman.

[Uranpi willakuy]