Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Pikunan angelkuna kanku?

Angelkunaqa espiritukunan kanku, runakunamantaqa aswan atiyniyoq kanku hanaq pachapitaqmi tiyanku. Paykunataqa cheqaq Diosmi kamarqan manaraq kay pachata ruwashaspa (Job 38:4, 7). Millonninpi angelkunan Jehová Diospa ladonpi kashanku. (Leey Salmo 103:20, 21; Apocalipsis 5:11.)

2. ¿Yanapawasunmanchu angelkuna?

Angelkunaqa yanaparqankun ñawpa tiempopi Lot-ta. Payqa mana allin runakunaq llaqtanpin tiyarqan, chaymi Diosqa paykunata ch’usaqyachinanpaq decidikurqan. Lotmanpas familianmanpas iskay angelkunan willarqanku chay llaqtamanta lloqsinankupaq. Huk runakunaqa chansapaq hinan qhawarirqanku chay willakuyta chaymi mana kasukurqankuchu. Lotmi ichaqa ususinkunapiwan kasukurqanku Dios angelninkunawan willachisqanta, chaymi salvakurqanku. (Leey Génesis 19:1, 13-17, 26.)

Biblia nisqan hina kay tiempopipas angelkunaqa yanapawanchismi. ¿Imaynatan chayta ruwanku? Diospa Gobiernonmanta predicaqkunata sumaqta pusarispa (Mateo 24:14). Kay allin willakuykunaqa makilla kananchispaqmi reparachiwanchis. Chay willakuykunataqa manan Lotpa tiemponpi runakuna hinachu chansapaq qhawarinanchis, Diosmi chay willakuykunata angelninkunawan willachiwanchis. (Leey Apocalipsis 1:1; 14:6, 7.)

Hinaspapas Diosqa angelninkunawanmi kallpachawanchis ima pruebapipas tarikuqtinchis, imaynan Jesuswan ruwarqan hinata. (Leey Lucas 22:41-43.)

Pisi tiempomantan Jehová Diosqa angelninkunawan millay runakunata ch’usaqyachinqa, chhaynapin manaña runakuna ñak’arinqakuchu. ¡Chayraqmi thak kawsay kanqa! (Leey 2 Tesalonicenses 1:6-8.)

  3. ¿Pikunan kanku supaykuna, imatan ruwanku?

Imaynan askha runakuna Dios contra huchallikurqanku, chay hinatan hanaq pachapi angelkunapas Dios contra huchallikurqanku (2 Pedro 2:4). Chay mana kasukuq angelkunaqa supaykunan kanku. Umalliqninkutaq Satanás, paykunan kay pachapi runakunata pantachishanku. (Leey Apocalipsis 12:9.)

Saqraqa kay pachapi hatun comerciantekunata, gobiernokunata, pantasqa religionta utilizaspan runakunata Diosmanta karunchashan. Satanasmi huchayoq kay pachapi tukuy mana chaninkuna, maqanakuykuna, ñak’ariykunapas kananpaq. (Leey 1 Juan 5:19.)

4. ¿Imaynatan supaykuna runakunata q’otunku?

Satanasqa khaynatan runakunata q’otun: “Wañupuqkunaqa espiritumanmi tukupunku paykunawanqa atisunmanmi rimayta”, nispa. Biblian ichaqa sut’ita willan wañuqkuna mana imatapas ruway atisqankuta (Eclesiastés 9:5). Saqran ichaqa supayninkunawan runakunata q’otun wañuqkunamanta pasachikuspa (Isaías 8:19). Q’otullantaqmi wañuqkunata rimachispa, watuqkunawan, layqakunawan ima. Biblian ichaqa kallpachawanchis chay millay ruwaykunamanta karunchakunanchispaq. (Leey Deuteronomio 18:10, 11; Hechos 19:19.)

Diosta munakusun chayqa, manan manchakusunchu chay millay espiritukunata. Diospa Siminta estudiaspa kasukuspa iman Saqramanta karunchakusun Diosmantaq asuykusun. Jehová Diosmi supaykunamantaqa aswan atiyniyoq, chaymi Dioslla angelninkunawan kallpachawasunman sasachakuykunata atipananchispaq. (Leey Salmo 34:7; Santiago 4:7, 8.)

Astawan yachayta munanki chayqa ¿Imatapunin Biblia yachachin? nisqa librota qhaway 10 capitulota, chaytaqa Jehová Diospa testigonkunan ruwan.