‘Manan kay pachamantachu kanku’

‘Runakunaqa paykunatan cheqnikunku, mana kay pachamantachu kasqankurayku.’ (JUAN 17:14.)

¿Imamantan Jesús rimasharqan? Jesusqa manan kay pachaq ruwayninkunawan nitaq política nisqawanpas chaqrukurqanchu. Pay kikinmi nirqan: “Qhapaqsuyuyqa manan kay pachamantachu, kay pachamanta kanman chayqa, serviqniykunachari maqanakunkuman, judío runakunaman mana entregasqa kanaypaq, aswanpas qhapaqsuyuyqa manan kay pachamantachu”, nispa (Juan 18:36). Hinaspapas qatikuqninkunatan kamachirqan ama kay pachaq yuyaykusqankunapi ruwasqankunapipas chaqrukunankupaq (Mateo 20:25-27).

Ñawpa cristianokunaq ruwasqanku. Jonathan Dymond runan ñawpa cristianokunamanta nirqan: “P’enqaypiña, carcelpiña wañuy patapiña kaspapas manapunin [guerramanqa] rirqankuchu”, nispa. Arí, paykunaqa Diosta kasukuspan tukuy imaymanata ñak’arirqanku. Hinaspapas Diospa kamachikuyninkunaman hinan kawsarqanku. Chaymi paykunamanta nikurqan: “Diospi mana iñiq runakunaqa musphaspan qhawasunkichis sinchi millay hucha ruwayninkupi mana paykunawan kuskachu ruwaysikusqaykichismanta, chaymi qankuna contrapas rimanku”, nispa (1 Pedro 4:4). Will Durant runaq nisqan hinapas, “[cristianokunaqa] sumaqta kawsasqankuwanmi sut’ita rikuchirqanku kay pachapi runakunaq mana allin kawsasqankuta”.

¿Pikunan chay hinata kay tiempopi ruwashanku? Cristianokunamantan huk revista nin: “Concienciankurayku mana imapas ruway munasqankuqa manan allinchu”, nispa (New Catholic Encyclopedia). Huk periodicopin lloqsimurqan, 1994 watapi Ruanda llaqtapi llapa religionkuna huk raza runakunata wañuchisqankumanta, “Testigokunan ichaqa mana chayta ruwaysikurqankuchu” (Reformierte Presse).

Huk profesormi llakikuspa nirqan: “Chhaynaniraqta runakunata wañuchishaqtinkupas manan pipas imanirqanpaschu, chhaynaniraq llullakusqankuta, mana ruwanakunata ruwasqankuta, qhepaman imaymana mana allinkunata ruwasqankutapas manan ima institucionpas denunciarqanchu”, nispa. Ichaqa Museo Conmemorativo del Holocausto de Estados Unidos nisqapi yachamuspan qelqarqan: “Manamá chhaynachu kasqa”, nispa. Paymi yacharqan sinchitaña Jehová Diospa testigonkunaqa ñak’arirqanku chaypas, hunt’arqankupunin imachus iñisqankupi.

¿Pikunan ñawpa tiempopi cristianokuna hina kawsashanku? U.S. Catholic nisqa revistan nin: “Yaqa llapa wayna-sipaskunan warmi-qhari kawsaymanta, mana casarakuspa warmi-qhari puñuymantapas Iglesiaq yachachisqanta mana allinpaq qhawarinku”, nispa. Huk sacerdotepas ninmi: “Casarakunankupaq yuyaychasqay runakunaqa yaqa llapankun mana casarakuspa tiyashankuña”, nispa. The New Encyclopædia Britannica nisqan, Jehová Diospa testigonkunamanta nin: “Paykunaqa ch’uyata kawsanankupaqmi kallpachakunku”, nispa.