Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Imaynatan Jesús munarqan wañusqanta yuyarinanchista?

Jesusmi qatikuqninkunata kamachirqan wañusqan p’unchayta huk cenawan yuyarinankupaq, chaypin t’antawan vinowan kanan karqan. T’antatan rikch’anachirqan cuerponwan vinotataq yawarninwan. (Leey Lucas 22:19, 20.)

Chay tuta Jesuspa t’anta mikhusqanqa mana levadurayoqmi karqan. Chaymi Jesuspa cuerponman allinta rikch’akurqan, Bibliaqa levaduratan huchawan rikch’anachin. Moisespa chaskisqan kamachikuykunaman hinaqa animalkunatan sacrificakurqan huchata pampachanapaq chaytan Jesús wañusqanwan tukuchirqan (Hebreos 10:5, 9, 10). Vinotaq Jesuspa yawarninman rikch’akurqan, chaywanmi huchanchiskunapaq pampachayta tarirqan. (Leey 1 Pedro 1:19; 2:24; 3:18.)

2. ¿Hayk’aqmi Jesuspa wañusqanta yuyarina?

14 Nisán Pascua p’unchaymi Jesusqa wañurqan. Judiokunapaqqa Inti haykuy qhepatan mosoq p’unchay qallariq. 14 Nisán ch’isintan Jesusqa apostolninkunawan Pascua cenata mikhurqan. Chaymantataq kamachirqan chay cenata ruwaspa wañusqanta yuyarinankupaq. (Leey Lucas 22:14, 15.)

Kay tiempopi Diosta serviqkunapas yuyarinkun Jesuspa wañusqanta, chaywanmi Diosqa kacharichiwarqanchis huchamanta wañuymantawan (Éxodo 12:5-7, 13, 17). Imaynan Pascua p’unchaypas watapi huk kutillata yuyarikuq, chhaynallataqmi Jesuspa wañusqantapas watapi huk kutillata yuyarikun Inti haykuy qhepata, judiokunaq almanaquenpiqa 14 Nisán p’unchaymi. (Leey Juan 1:29.)

  3. ¿Pikunan t’antata mikhunku vinotapas ukyanku?

Jesús vinoyoq vasota apostolninkunaman haywashaspan nirqan: “Kay vinoyoq vasoqa [...] mosoq rimanakuymi”, nispa (1 Corintios 11:25). Kay mosoq rimanakuyqa Israel llaqtawan Diospa rimanakusqan rantinpin kapurqan. ¿Imatan Dios israelitakunawan rimanakurqan? Israelitakuna kasukuq kaqtinkuqa llaqtan kananpaqmi prometerqan (Éxodo 19:5, 6). Ichaqa manan kasukurqankuchu, chaymi huk mosoq rimanakuyta ruwarqan. (Leey Jeremías 31:31.)

Chay mosoq rimanakuytan 144.000 runakunawan Dios ruwarqan. Paykunawanmi Diosqa askha runakunata bendecishan. Chaymi kay pacha paraíso kaqtin millonninpi runakuna kusisqa tiyanqaku. 144.000 runakunamantan wakin kay pachapiraq Diosta servishanku. Paykunan t’antata mikhunku vinotapas ukyanku Jehová Dios paykunawan mosoq rimanakuyta ruwasqanrayku. Jesuspa yawarninmi chay mosoq rimanakuyta chanincharqan. (Leey Lucas 12:32; Apocalipsis 14:1, 3.)

4. ¿Imaynapin allinninchispaq Jesuspa wañusqanta yuyariy?

Sapa watan Jesuspa wañusqanta yuyariyqa Diospa munakuwasqanchista ancha chaninpaq qhawarinanchispaqmi yanapawanchis. Munakuwasqanchisraykun Churinta kay pachaman kachamurqan huchanchiskunarayku wañunanpaq. Chay p’unchaypin yuyaymanananchis Jesuspa wañusqan ancha chanin kasqanpi, imaynatas Jehová Diostapas Jesustapas agradecekusunman chaykunapipas. (Leey Juan 3:16; 2 Corintios 5:14, 15.)

Astawan yachayta munanki chayqa ¿Imatapunin Biblia yachachin? nisqa librota qhaway 206-208 paginakunata, chaytaqa Jehová Diospa testigonkunan ruwan.