“Ñoqan paykunaman [sutiykita] yachachirqani”

“Kay pachamanta qowasqayki runakunamanqa ñan willaniña pichus kasqaykita [...] Ñoqan paykunaman pichus kasqaykita yachachirqani, yachachisaqraqtaqmi kanpas.” (JUAN 17:6, 26.)

¿Imamantan Jesús rimasharqan? Jesusqa predicaspan Diospa sutinta willarqan. Hebreo qelqa k’uyukunata sapa kutin leespapas rimarqanchá Diospa sutinmanta (Lucas 4:16-21). Qatikuqninkunatapas yachachirqanmi khaynata Diosmanta mañakunankupaq: “Yayayku, sutiyki yupaychasqa kachun”, nispa (Lucas 11:2).

Ñawpa cristianokunaq ruwasqanku. Jerusalén llaqtapi kaq umallikunaman rimaspan Apóstol Pedro nirqan: “[Diosmi nacionkuna] ukhumanta sutinpaq runakunata horqomurqan”, nispa (Hechos 15:14 Mosoq Rimanakuy). Jesuspa qatikuqninkunaqa kay hinatan predicarqankun: “Pipas Señorpa [Jehová Diospa] sutinpi waqyakuqqa qespichisqa kanqa”, nispa (Hechos 2:21; Romanos 10:13). Hinaspapas Diospa sutintaqa churaqkupunin qelqasqanku k’uyukunapi. Judiokunan qelqarqanku huk kamachikuykunata chaykunata huñuspankun suticharqanku Tosefta nispa. Chaypin nin: “Sectakunaq [judeocristianokunaq] qelqankuna [Evangelio qelqakunapas] kanaykusqan kananku, ima qelqapas Diospa sutin rikhuriqtinqa kanaykunankun”, nispa.

¿Pikunan chay hinata kunan ruwashanku? Revised Standard Version de la Biblia revistaq qallariyninpin nirqan: “Ima sutiña Diospaq kanman chaypas payllapunin Diosqa, chaymi manaña ima sutitapas utilizanachu huk dioskunamantapas t’aqashasunman hinataqa, chaymi Judiokunaq tiemponmantaraq Diospa sutintaqa manaña rimarqankuchu kunan tiempo iñiqkunapaqpas manan allinchu”, nispa. Chayraykun chay Bibliapiqa Diospa sutinpa rantinpi Señor nispa churarqanku. Qayna watakunallan Iglesia Católica Romana nisqapi umalliq Iglesiapi umalliqkunata kamachimurqan: “Hebreo rimaymanta t’ikrakuq YHWH Diospa sutinqa manan rimakunanchu huñunakuykunapi takikunapi nitaq rezokunapipas”, nispa. *

¿Kanchu Diospa sutinmanta waqyakuqkuna reqsichiqkunapas? Arí, kanmi. Kirguistán llaqtapi Sergey sutiyoq waynan huk peliculata qhawaspa Diospa sutinta uyarirqan. Chunka watan ichaqa manaña chay sutita uyaripurqanchu. Chaymantaqa Estados Unidos nacionmanmi ripurqan, chaypin iskay Testigonkuna predicaspa Diospa sutinta Bibliapi qhawachirqanku. Sergeyqa anchatan kusikurqan Diospa sutinta willaq religionta tarispa. Huk diccionariopin “Jehová Diosmanta” nin: “Jehová Diospa testigonkunaq yupaychasqanku Dios, paykunapaqqa sapallan cheqaq Diosmi”, nispa (Webster’s Third New International Dictionary).

[Uranpi willakuy]