Diosqa yachanmi llakikuyninchista
Diosman asuykuy
Diosqa yachanmi llakikuyninchista
“JEHOVÁ DIOSPA yuyaq testigonmi niran: “Hukkunaq imayna tarikusqankupi tarikuyqa, llakikusqankuta llakikuymi”, nispa. Hukkunaq llakikusqanta qhawarispa aswan llakipayakuqqa Jehová Diosmi. Payqa llakikunmi llaqtanpa ñak’arisqanta rikuspa. ¿Imaynata chayta yachanchis? Jehová Diospa llakipayawasqanchisqa allintapuni rikukuran Jesuspa imayna kawsasqanpi (Juan 5:19). Yachasunchis Juan 11:33-35 textopi nisqanta.
Jesusqa lazaroq wañusqanta yachaspa chay amigonpa tiyasqan llaqtaman riran. Martawan Mariawanqa sinchi llakikuypi tarikuranku, paykunaqa lazaroq pananmi karan. Jesusqa anchatan chay familiata munakuran, chaynaqa ¿imaynatan qhawariran llakikuyninkuta? (Juan 11:5.) Biblia nin: “Hinan Jesusqa Mariata waqashaqta rikuspa, judío runakunatapas paywan kuska hamuspa waqashaqllatataq rikuspa sonqon “ch’allaq” nirqan, hinaspan sinchita llakikurqan. Hinan nirqan: –¿Maymanmi p’amparqankichis? nispa. Chaymi nirqanku: –Señor, hamuy rikumunki, nispa. Jesustaq waqarqan” (Juan 11:33-35). ¿Imarayku waqaran? Amigon lazaron wañupuran Jesusmi ichaqa kawsarichiq riran (Juan 11:41-44). Ichaqa ¿Imapiwantaq llakichinman karan?
Chaymanta yachasunchis. Jesusqa Mariata waqashaqta rikuspa judío runakunatapas paywan kuska hamuspa waqashallaqtataq rikuspa ‘sonqonta ch’allaq’ nichikuran ‘sinchitataq llakikuran’. Chaykunan rikuchin sonqomanta llakikusqanta. Jesusqa waqasqankuta rikuspa sinchita llakikuran. Chaymi waqaran. * Arí, Jesustaqa hukkunaq llakikusqanmi llakichiran. Hayk’aqllapas waqarankichá munakusqayki runaq waqasqanta rikuspa (Romanos 12:15).
Jesuspa llakipayakuq kasqanwanmi yachanchis Jehová Dios imayna kasqanta. Jesusqa Taytan hinapuni imatapas ruwaran, chaymi niran: “Ñoqata rikuwaqqa Yayatan rikun”, nispa (Juan 14:9). ‘Jesuspa waqasqanpi’ yachanchis Jehová Dios llakipayakuq kasqanta, payqa anchatapunin llakikun kamachinkuna llakikuqtin. Chaytan wakin Biblia qelqaqkuna rikuchinku (Isaías 63:9, NM; Zacarías 2:8). Jehová Diosqa ¡ancha munakuqmi!
Llakipayakuq runakunamanqa k’askakunchismi. Chaymi pisi kallpayaqtinchis, llakiq ñit’isqan kaqtinchispas chay runakunata maskhanchis llakikuyninchista willananchispaq. Jehová Diosqa aswan llakipayakuqmi allintataqmi yachan imarayku waqasqanchistapas, chaymi Jehová Diosmanqa astawanraq k’askakunchis (Salmo 56:8).
[Uranpi willakuy]
^ párr. 3 Griego simipi Jesuspa ‘waqasqanmanta’ rimaspaqa “ch’inlla waqaymantan” rimashan, Mariaqmanta huk runakunaqmantawan waqasqanmanta rimaspan ichaqa “qaparqachaspa waqaymanta” rimashan.