Diospa yachayninqa kamasqankunapin sut’ita rikukun

“Paymi uywakunamantapas aswan yachaysapata ruwawanchis, paymi phalaq animalkunamantapas aswan yuyaysapata ruwawanchis.” (JOB 35:11.)

PHALAQ animalkunaqa otaq urpikunaqa imaymana ruwasqankuwanmi hatuntaraq qhawarichiwanchis. Avionta ruwaqkunapas hanllarayasparaqmi qhawanku urpikuna altonta phawaspa imaymana ruwasqankuta. Wakin urpikunaqa lamar-qochaq hawanta phawaspankun karukunata mana pantaspa rinku.

Chaymantapas urpikunaqa paykunapura imatapas willanakunankupaqmi waqanku, takinku ima. Chaykunan rikuchiwanchis Diosqa ancha yachayniyoq kasqanta. Kunan yachasunchis imaynatan wakin urpikuna willanakunku.

Urpikunaq “rimanakusqanku”

Wakin urpikunaqa runtullapiraq kashaspankun willanakuyta qallarinku. Codorniz urpimanta yachasunchis. Kay urpiqa pusaq runtuta hinan runtun, sapa p’unchay hukta. Sichus sapanka runtu tiempollanpi t’ohanman chayqa, manan kaq p’unchayllapichu llapanku t’ohankuman, aswanpas pusaq p’unchaypiraqmi. Chhayna kaqtinqa codornizpaqqa sasan kanman chiwchinkunaman mikhuchiy wakin manaraq t’ohamuq runtukunata oqllananraq kashaqtin. Ichaqa oqllasqan runtukunaqa kaq p’unchayllapin t’ohanku, soqta hora hinallapi. ¿Imaynapitaq kaq p’unchayllapiri llapanku t’ohanku? Chay urpikunata estudiaq runakunan ninku: “Yaqachus hina runtupi kaq chiwchichakunaqa willanakunku kaq p’unchayllapi llapanku t’ohanankupaq”, nispa.

Orqo urpikunan astawanqa takinku tiyasqanku cheqasta respetachinankupaq otaq china urpita waqyanankupaqpas. Sapanka t’aqa urpikunaq waqayninqa manan kaqllachu, chaymi china urpikunaqa yachanku mayqen urpikunachus t’aqanmanta kasqanta.

Urpikunaqa illarimuyta otaq inti haykuytan astawanqa takinku. ¿Imarayku? Chay horakunapiqa manan nishutachu wayramun, nitaq kanchu nishu bullapas. Urpikunata estudiaqkunan ninku: “Urpikunaq takisqanqa chawpi p’unchaypi takisqankumantaqa illarimuyta otaq inti haykuytan aswan allintaqa uyarikun, iskay chunka kuti aswan allintaraq”, nispanku.

Orqo urpikunan astawanqa takinku chinakunamantaqa, chaywanpas iskayninkuqmi kan askha clase waqayninku, chaywan imatapas willanakunankupaq. Pinzón nisqa urpichakunamanta rimasunchis. Kaykunaqa isqon clase waqaytan yachanku. Altonta ankapas otaq imapas muyupayashan chayqa hukniraytan  waqanku, ichaqa pampanta imapas paykunaman phawaykuqtinqa hukniraytañataqmi waqanku.

Aswan sumaq kamasqan kashanchis

Jehová Dios yachayniyoqta urpikunata kamasqanqa hatuntaraqmi qhawarichiwanchis. Ichaqa urpikunamantaqa runakunaq rimanakusqankun aswan hatuntaraqqa qhawarichiwanchis. Job 35:11 nin: “[Diosmi] phalaq animalkunamantapas aswan yuyaysapata ruwawanchis”, nispa. Runakunallan sasa entiendey yachaykunata willayta atinchis siminchiswan rimaspa otaq makinchiswan rimaspapas.

Lliw kawsaqkunamantaqa runakunallan wawa kasqankumantapacha atinku sasa rimaykuna yachayta. Huk revistan nin: “Manaña tayta mamanku rimapayankumanchu chaypas, wawakunaqa imaynamantapas yachankupunin rimayta. Mana uyariq wawakunapas familiankuwan rimanankupaqmi mana yachachisqalla makinkuwan rimayta qallarinku”, nispa.

Siminchiswan otaq makinchiswanpas imayna sientekusqanchista ima yuyaykusqanchistapas rimay atisqanchisqa Diospa sumaq regalonmi. Ichaqa aswan sumaqqa Dioswan rimasqanchismi, Dioswanqa rimanchis paymanta mañakuspan. Jehová Diospunin niwanchis paywan rimananchispaq. Biblian niwanchis: “Ama imamantapas llakikuychischu, aswanpas tukuy ima necesitasqaykichistapas Diosmanta mañakuychis, rogakuywan mañakuspaykichistaq Diosman graciasta qoychis”, nispa (Filipenses 4:6).

Imata ruwananchispaqpas sasachakushanchis chayqa, Bibliawan yanapachikunanchistan Diosqa munan, chaypin payqa ancha yachayninta qelqachiran. Chaymantapas Diosqa yachachiwanchismi Bibliaq nisqanman hina ruwayta. Cristoq qatikuqnin Santiagon niran: “Mayqenniykichispas pisi yachayniyoq kashan chayqa, mana phiñarispa lliwman askhatapuni qoq Diosmanta mañakuchun, hinan Diosqa payman yachayta qonqa”, nispa (Santiago 1:5).

¿Imaynan sientekunki chaykunamanta yachaspa?

¿Imaynan sientekunki urpikunaq takisqanta uyarispa otaq wawakuna chayllaraq rimayta qallarishasqankuta uyarispa? ¿Reparankichu Dios ancha yachayniyoq kasqanta?

Imayna kamasqa kasqanta qhawarikuspan Salmo takita qelqaq rey David Diosta niran: “Ancha musphana ruwasqa kasqaymantan yupaychayki, utirayanapaqmi ruwasqaykikunaqa, allintapunin chaytaqa yachani”, nispa (Salmo 139:14). Sichus tukuy kamasqankunapi Diospa yachayniyta qhawarispa agradecekusun chayqa, astawanmi Diospi confiasunchis, mana iskayaspataq paywan pusachikusunchis.

[4 paginapi willakuy]

Hukkunawan rimayta atiyqa Diospa regalonmi

[3 paginapi kaq fotota horqorqan]

© Dayton Wild/​Visuals Unlimited