1, 2. ¿Imatan wakin runakuna Diosmanta piensanku?

ASKHA runakunan piensanku Diosmanqa mana imapas qokusqanta. 2013 watapin noviembre killapi sinchi wayra lamar-qochamanta unuta apaykurqan Filipinas nacionpi askha llaqtakunaman. Chaymi huknin llaqtamanta alcalde nirqan: “Diosqa ocupasqachá kasharqan chaymi mana yanapawarqanchischu”, nispa.

² Wakintaq piensanku ima ruwasqankutapas Diospa mana rikunanpaq (Is. 26:10, 11; 3 Juan 11). Chaychá Pabloqa tiemponpi runakunamanta nirqan Diosmanta mana imatapas yachay munasqankuta, millaykuna, hillukuna, mana allinkuna kasqankuta (Rom. 1:28, 29).

3. ¿Imakunatan tapukunanchis?

³ Ñoqanchismi ichaqa sut’ita yachanchis tukuy ruwasqanchista Dios rikumushasqanta. Ichaqa tapukunanchismi: “¿Llakikunchu Dios ñoqamanta? ¿Reparanichu  yanapawasqanta?”, nispa. Biblian nin Jehová Diosqa “hatun atiyninwan” siervonkuna yanapasqanta, chay atiywan enemigonkuna contra hatarisqantapas (leey Deuteronomio 26:8). Jesusmi nirqan wakin runakunaqa Diospa yanapasqanta reparasqankuta (Mat. 5:8). Ñoqanchisri, ¿reparanchischu Diospa yanapawasqanchista? Biblian willan wakin runakuna Diospa yanapasqanta reparasqankuta wakintaq mana. Kay estudiopin paykunamanta yachasun, qatimuq estudiopitaq yachasun imaynatan iñiyninchiswan reparasunman Diospa yanapayninta.

4. Diosmi Israel llaqtanta yanaparqan, ¿imaraykun chayta enemigonkuna mana aceptayta munarqankuchu?

⁴ Ñawpa tiempopi llaqtakunaqa uyarirqankun Israel llaqtanta Dios yanapasqanmanta. Egiptomanta llaqtanta horqomushaspan Jehová Diosqa askha milagrokunata ruwarqan, prometesqa hallp’apipas askha guerrakunatan ganachirqan (Jos. 9:3, 9, 10). Askha reykunan yacharqanku Jehová Dios llaqtanta yanapasqanta, chayta yachashaspapas huk nisqallan huñukurqanku “Josuewan Israel runakunapiwan maqanakunankupaq” (Jos. 9:1, 2). Maqanakushaspan rikurqanku Jehová Dios intitapas killatapas kasqallanpi sayachisqanta “Israel runakuna awqankuta atipanankama” (Jos. 10:13). Ichaqa k’ulluchakuspan mana aceptarqankuchu llaqtanta Dios yanapashasqanta. Chaymi guerrapi wañurqanku (Jos. 11:20).

5. ¿Imatan Ahab mana aceptayta munarqanchu?

⁵ Unay tiempo qhepamanmi rey Ahabqa rikurqan llaqtanta Diospa yanapasqanta. Profeta Eliasmi nirqan: “Manan kay qhepa watakunapi paranqachu, manallataqmi pacha sullapas kanqachu ñoqaq ninaykama”, nispa (1 Rey. 17:1). Chaykunaqa hunt’akurqanmi, chaywanpas Ahabqa manan aceptayta munarqanchu Diospa nisqanrayku chaykuna pasashasqanta. Hinaspapas Eliasmi Diosman mañakurqan hanaq pachamanta ninata kachaykamunanpaq, Diostaq kutichimurqan mañakusqanman. Chaymantapas Eliasqa nirqanmi yapamanta paramunanta, chaytaqmi pasarqan (1 Rey. 18:22-45). Ahabmi ichaqa mana aceptayta munarqanchu chay milagrokuna Diospa ruwasqan kasqanta. Chay iskay ejemplokunan rikuchiwanchis Diospa yanapayninta reparanapaqqa makilla kashananchista.

6, 7. ¿Imatan repararqanku Gabaón runakuna, Rahab warmipas?

⁶ Ñawpa tiempopi Gabaón llaqtaqa hukniraymi wak llaqtakunamanta karqan.  Paykunaqa repararqankun llaqtanta Jehová Dios yanapasqanta. Chaymi mana Israel llaqtawan maqanakuyta munarqankuchu, aswanpas allinpi kaytan maskharqanku (Jos. 9:3, 9, 10). Ancha allinmi karqan Israel llaqtanrayku Diospa maqanakushasqanta reparasqankuqa.

⁷ Rahab warmipas repararqanmi Jehová Dios llaqtanta yanapashasqanta. Payqa manan Israel llaqtayoqchu karqan, ichaqa uyarirqanmi Egiptomanta Israel llaqtanta Dios horqomusqanta. Israel llaqtamanta iskay qhamiyaqkuna wasinman chayaqtinkun nirqan: ‘Ñoqaqa yachanin kay hallp’ata Señor Dios qopunasuykichista’, nispa. Chhaynata piensasqanrayku llaqtamasinkuna wañuchinkumanña karqan chaypas, payqa confiarqanmi paytapas familiantapas Diospa salvananpi (Jos. 2:9-13; 4:23, 24).

8. ¿Imatan wakin Israel runakuna aceptarqanku?

⁸ Eliaspa nina mañakusqanman Diospa kutichimusqanta rikushaspapas, Ahabqa manan aceptayta munarqanchu Diospa atiyninwan chay milagro ruwakusqanta. Wakin Israel runakunan ichaqa Diospa atiyninta aceptarqanku. Chaymi nirqanku: “¡[Jehová] Señormi Diosqa!”, nispa (1 Rey. 18:39).

9. ¿Imatan ruwananchis Diospa yanapayninta reparanapaq?

⁹ Yachamurqanchismi Diospa yanapayninta reparaq runakunamanta mana reparaqkunamantapas. Kay tiempopipas  kanmi Diospa yanapayninta reparaq iñiqmasikuna. Ñoqanchisqa paykuna hinan kayta munanchis. ¿Imatan chaypaq ruwananchis? Imayna Dioschus kasqantan astawan yachananchis. Ichaqa, ¿imakunan rikuchin kay tiempopi siervonkunata Diospa yanapashasqanta?

10. ¿Iman rikuchiwanchis runakunata Dios yanapashasqanta? (3 paginapi fotota qhaway.)

¹⁰ Askha runakunan willakunku Diosman orakuqtinku paypa yanapasqanta (Sal. 53:2). Filipinas islapin Allan iñiqmasinchis wasin-wasinta predicashaspa huk warmiwan rimarqan, hinan chay warmiqa waqaspa willakusqa Testigokunawan tupananpaq chay tutamantan Diosmanta mañakusqanta. Payqa sipasllaraq kashaspas Testigokunawan Bibliata estudiasqa, ichaqa casarakuspas huk islaman ripusqa hinaspa manaña Testigokunawan tupapusqachu. Chaysi anchata Diosta agradecekusqa mañakusqanman ratulla kutichimusqanmanta. Manaraq watamanmi chay warmiqa bautizakurqan.

11, 12. a) ¿Imaynatan Jehová Dios siervonkunata yanaparqan? b) ¿Imaynatan Jehová Dios Amy cristianata yanaparqan?

¹¹ Wakin cristianokunaqa manaraq Testigo kashaspan cigarrota pitaqku, drogata mikhuqku, qhelli ruwaykunatataq qhawaqku. Anchatas kallpachakusqaku chaykunata saqepunankupaq ichaqa manas atiqkuchu. Jehová Diosta reqsispankus yanapayninta mañakusqaku chaysi payqa ‘hatun atiyta’ paykunaman qosqa, chhaynapitaq chay viciokunata saqepusqaku (2 Cor. 4:7; Sal. 37:23, 24).

¹² Jehová Diosqa siervonkunatan yanapallantaq problemankuta atipanankupaq. Amy cristianatan kachasqaku Pacífico ladopi islachaman, chaypi huñunakuna wasita, misionerokunapaq wasitawan hatarichiypi yanapakunanpaq. Chaypiqa sapa kutillansi electricidadpas unupas mana kaqchu, callekunataq para unuwan hunt’a kaq. Hinaspapas huch’uy cuartochapis tiyaq familiantataq sinchita extrañaq. Huk kutinsi llank’aqmasin cristianata qapariyusqa, hinas wasinman kutipuspa chay ruwasqanmanta llakisqa kasqa. Chay ratoqa manas luz kasqachu, chaysi tutayaqpi Diospa yanapayninta mañakusqa. Yapamanta luz hap’iqtinsi Qhawaq revistata rikurusqa, hinas chaypi willashasqa misionerokunapaq yanapaykunata. Chaysi yanapasqa llakikuyninta atipananpaq, hukkunawan problemakunata allichananpaqpas. Chaymi Amyqa repararqan Jehová Diospuni yanapashasqanta, chaytaq kallpata qorqan llank’ashanallanpaq (Sal. 44:25, 26; Is. 41:10, 13).

13. ¿Imakunan rikuchiwanchis llaqtanta Jehová Dios defiendesqanta?

¹³ Chaymantapas Jehová Diosqa siervonkunatan yanaparqan predicacionta  defiendenankupaq (Filip. 1:7). Askha gobiernokunan hark’akunku predicananchista, chaymi tribunalkunaman rirqanchis defiendekunanchispaq. 2000 watamantapachan hatun tribunalkunapi ganarqanchis 244 juiciokunata hinaña, Tribunal Europeo de Derechos Humanos nisqapitaq 24 juiciokunataña ganarqanchis. Chaymi rikuchiwanchis llaqtanta Jehová Dios yanapananta mana pipas hark’ay atisqanta (Is. 54:17; leey Isaías 59:1).

14. ¿Imakunapiwanmi rikuchiwanchis Diospa yanapawasqanchista?

¹⁴ ¿Imakunapiwanmi rikuchiwanchis Jehová Diospa yanapawasqanchista? Hukninmi mundontinpi predicasqanchis (Mat. 24:14; Hech. 1:8). Chaymantapas maymantaña kaspanchispas llapallanchismi huk nisqalla kashanchis. Manan ima religionpas ñoqanchis hinaqa huk nisqallaqa kankuchu. Chaymi Diosta mana serviq runakunapas ninku: “Cheqaqtapunin Diosqa qankunawan kashan”, nispa (1 Cor. 14:25). Rikusqanchis hina, imaymanan rikuchiwanchis Diospa yanapawasqanchista (leey Isaías 66:14). ¿Qanpas reparankichu Diospa yanapayninta?

15. ¿Imaynapin mana reparasunmanchu Diospa yanapayninta?

¹⁵ Yaqapaschá mayninqa mana reparanchischu Diospa yanapawasqanchista. ¿Imaynapin chay pasawasunman? Sinchita problemanchiskunallapi piensasqanchisraykun. Chayta ruwaspaqa  qonqasunmanmi ñawpaqkunapi Diospa yanapawasqanchista. Chaymi Eliaswanpas pasarqan. Payqa manan imatapas manchakuqchu ichaqa Jezabel reina wañuchiyta munaqtinmi qonqapurqan ñawpaqpi Diospa yanapasqanta. Sinchita mancharikuspan wañuyllataña munarqan (1 Rey. 19:1-4). Ichaqa Diospa yanapayninwanmi yapamanta kallpachasqa karqan (1 Rey. 19:14-18).

16. ¿Imatan ruwananchis Diospa yanapawasqanchista reparananchispaq?

¹⁶ Jobpas problemankunawanmi sinchi llakisqa kasharqan. Chaymi mana Jehová Dios hinachu problemankunata qhawarirqan (Job 42:3-6). Yaqapaschá ñoqanchispas problemanchiskunapi piensaspa mana reparanchischu Diospa yanapawasqanchista. Chhaynapi tarikuspa, ¿imatan ruwananchis? Bibliata leespan willakuyninkunapi, consejonkunapi piensananchis. Chaykunan yanapawasun problemanchiskunata atipanapaq. Chhaynapin Jehová Diostapas rikushasunman hinapuni kasun, Job hinataq nisun: “Kunanmi ichaqa ñawiykunawanpuni rikuyki”, nispa.

17, 18. a) ¿Imakunapin Dios yanapawashasunman? b) ¿Imaynatan Dios yanaparqan kay tiempopi wakin siervonkunata?

¹⁷ Qanri, ¿reparankichu imaynata Diospa yanapasqasuykita? Askha iñiqmasikunan willakunku cheqaq religionta tarinankupaq Jehová Dios yanapasqanta. Wakintaq ninku huñunakuypi iñiqmasinkuq imachus nisqanwan Jehová Dios yanapasqanta. Otaq orakusqankuman Dios kutichimusqanta, astawan servinankupaq imachus ruway munasqankuwan yanapasqanta, llank’anankuta payrayku saqeqtinku yanapasqantapas (Heb. 13:5). Sichus Jehová Diospa amigonkuna kanchis chayqa, sut’itan reparasun yanapawasqanchista.

¹⁸ Kenia nacionpin huk cristiana nirqan: “Estudiotan huk señoraman qosharqani, ichaqa manapas Diosmanta yachayta munanmanchu hinatan qhawarirqani, chaymi Diosman orakurqani visitallasaqchu icha saqepusaqchu nispa. Orakuyta tukuqtiy hinataq, chay señoraqa telefononta waqyamuwarqan huñunakuyman riyta munaspa. ¡Maytan admirakurqani!”, nispa. Sichus makilla kasun chayqa, reparasunmi Jehová Diospa yanapawasqanchista. Asia ladomanta cristianan nin: “Kallpachakunaykin Diospa yanapasqasuykita reparanaykipaq. Chay ruwayman yachakunki chayqa, rikunkin maytachus Jehová Dios qanmanta llakikusqanta”, nispa.

19. ¿Imatawanmi ruwananchis Diospa yanapayninta reparanapaq?

¹⁹ ¿Imatawanmi ruwananchis Diospa yanapayninta reparanapaq? ‘Ch’uya sonqoyoqmi’ kananchis (Mat. 5:8). Chaypaqmi mana allin ruwaykunata saqespa allin kaqkunallapi piensananchis (leey 2 Corintios 4:2). Kay estudiopin yacharqanchis Jehová Diospa yanapayninta reparanapaqqa paywan allin amigontin kananchista. Ichaqa, ¿imaynatan iñiyninchiswan reparasunman Diospa yanapayninta? Qatimuq estudiopi yachasun.