Hechos 1:1-26
1 Teófilo, ñaupaq kaq libropin qelqamurqayki qallariymantapacha janaq pachaman oqarisqa kasqan p’unchaykama Jesuspa imaymanakuna ruwasqanmanta yachachisqanmantawan.+
2 Ichaqa manaraq janaq pachaman oqarisqa kashaspanmi+ santo espirituq* kallpachasqan kaspa ajllasqan apostolkunata* kamachirqan imakunachus ruwanankupaq.+
3 Ñak’arisqan qhepamanqa askha kutitan paykunaman rijurirqan, chhaynapin sut’itapuni rikuchirqan kausashasqanta.+ Tawa chunka p’unchay ukhupin askha kutita paykunaman rijurirqan, jinaspa Diospa gobiernonmanta rimapayarqan.+
4 Paykunawan juñunasqa kashaspan Jesusqa kamachirqan: “Aman Jerusalenmantaqa lloqsinkichischu.+ Janaq pacha Taytaq prometesqanta+ qankunaman willasqaytan suyankichis;
5 Juanqa unullawanmi bautizarqan, qankunan ichaqa pisi p’unchaykunamanta santo espirituwan bautizasqa kankichis”,+ nispa.
6 Jesuswan wajmanta juñunakuspankun paykunaqa tapurqanku: “¿Señor, wajmantachu Diospa gobiernonta Israelpi jatarichishanki?”,+ nispa.
7 Jinan Jesusqa paykunata nirqan: “Manan qankunamanchu chaykuna yachayqa tupasunkichis; Taytallan ninman jayk’aqchus ima tiempopichus imapas kanantaqa.+
8 Ichaqa atiytan chaskinkichis santo espíritu qankunaman chayamuqtin,+ jinan noqamanta willankichis+ Jerusalenpi,+ lliu Judeapi, Samariapi ima;+ kay pachaq k’uchunkunakamaraqmi chayankichis”,+ nispa.
9 Chaykunata nisqan qhepatataq discipulonkuna qhawashaqtin cieloman oqarisqa karqan. Chayllamanmi juj phuyu pakarqan, jinan paykunaqa manaña rikurqankuñachu.+
10 Jesús cieloman wichapushasqanta mana chinkachispa qhawashaqtinkun qonqaylla ladonkupi rijurirqan yuraq p’achayoqkama iskay qharikuna.+
11 Jinaspa paykunata nirqanku: “Galilea runakuna, ¿imaraykun cielota qhawarayashankichis? Qankunamanta ripuspa cieloman oqarisqa Jesusqa imaynan ripushan chhaynallatataqmi kutimunqa”, nispa.
12 Jinan paykunaqa Olivos orqo nisqamanta Jerusalén llaqtaman kutipurqanku,+ chay orqoqa Jerusalén llaqta qayllallapin kasharqan, juj samana p’unchay purinapi* jinalla.
13 Chayman chayaspataq alojakusqanku cuartoman seqarqanku. Chaypiqa kasharqanku: Pedro, Juan, Santiago, Andrés, Felipe, Tomás, Bartolomé, Mateo, Alfeoq wawan Santiago, “tukuy sonqowan ruwaq” nisqa Simón, Santiagoq+ wawan Judas iman.
14 Llapankun juj sonqolla Diosmanta mañakusharqanku, paykunawan kuskan mañakusharqanku wakin warmikunapas,+ Jesuspa maman Mariapas, wayqenkunapas.+
15 Chay p’unchaykunapi pachaj iskay chunka jina iñiqkuna juñunasqa kashaqtinkun Pedroqa sayarispa nirqan:
16 “Wayqeykuna, Diospa simin qelqapin Davidqa santo espirituq yuyaychasqan kaspa Judasmanta qelqarqan.+ Chay Judasmi Jesús jap’iqkunata pusarqan,+ chay qelqasqaqa junt’akunanpunin karqan
17 chay Judas noqaykuwan yupasqa kasqanrayku+ kay llank’aypi kasqanrayku ima.
18 (Pay kikinmi mana chanin ruwasqanmanta pagasqanku qolqewan jallp’ata rantirqan,+ umachakinpamanta urmaykuqtintaq lliu cuerpon phatarqan, jinan lliu wijsan tallikurqan.+
19 Chaytaqa Jerusalén llaqtapi lliu tiyaqkunan yachanku, chaymi chay jallp’ata rimayninkupi ninku Akeldama nispa, chayqa “yawar pampa” ninantan nin).
20 Salmos qelqapin qelqasqa kashan: Wasin ch’in kapuchun, amaña pipas chaypiqa tiyachunchu,+ nispa. Chaypiqa nillantaqmi: Umalli kaynin jujman qopusqa kachun,+ nispa.
21 Chhaynaqa, Señor Jesús noqaykuwan kashaspa imachus ruwanankunata ruwasqan tiempopi mayqen qharikunachus puriysiwarqanku, paykunamanta jujnin jaykuchun Judaspa rantinta,
22 chay qhariqa Jesuspa Juanwan bautizachikusqanmantapacha+ cieloman oqarisqa+ kasqan p’unchaykama noqaykuwan kuska puriqmi kanan, chay qhari noqaykuwan kuska testigo kachun Jesuspa kausarimpusqanmanta”,+ nispa.
23 Chaymi paykunaqa iskay qharikunata ajllarqanku, jujninmi karqan Barsabás nisqa José, paytaqa Justo nikullantaqmi; jujnintaq karqan Matías.
24 Jinan Diosmanta mañakurqanku: “Jehová* Diosniyku, qanqa yachankin lliu runaq sonqonpi imachus kasqanta,+ chayrayku qanyá niy kay runakunamanta mayqentachus ajllakunki chayta,
25 chhaynapi Judaspa rantinta kay llank’aypi kananpaq apóstol kananpaqwan; chay ruwaymantan Judasqa t’aqakapurqan munasqanman jina purinanpaq”,+ nispa.
26 Jinaspan paykunaqa sortearqanku,+ jinan Matías ajllasqa karqan, chaymi payqa chunka jujniyoq apostolkunawan yupasqa kapurqan.
Uraypi willakuykuna
^ Qhaway Explicasqa simikuna nisqapi “Santo espíritu” nisqata.
^ Samana p’unchay purinaqa juj kilómetro jinallan karqan, chhaynallatan judiokunaqa purinanku karqan samana p’unchaypiqa.
^ Qhaway “Astawan yachanapaq A5” nisqata.
