KAYPI PIENSAY: Tutayaqpin ñanninta purishanki, intipas chinkaykapunñan. Ichaqa manan chinkasqa jinachu tarikunki. ¿Imarayku chaytan ninchis? Makiykipin jap’ishanki allin k’anchaq linternata. Pampata k’anchariqtiykiqa allintan ñaupaykipi kaqta rikunki. Ñaupaqman ñanta k’anchaqtiykipas karumanraqmi allinta sut’ita rikunki.

Bibliaqa imaymanapin chay linterna jina. Ñaupaq articulokunapi yachamusqanchis jina, Diospa palabranqa necesitasqanchis ratopin yanapawanchis sapa p’unchay problemanchiskunata atipanapaq. Ichaqa manan chayllapichu yanapawanchis, jamuq tiempopi imakunachus sucedenantan qhawarichiwanchis. Arí, yanapawanchismi wiñay kausayman apaq ñanninta purinanchispaq (Salmos 119:105). ¿Imaynata?

Iskay formapin Bibliaqa sumaq suyakuyta qowanchis: 1 Imapaq kausasqanchista willawanchis, 2 Kamaqninchiswan sumaq amistadta ruwanapaq yachachiwanchis.

Bibliapiqa allin consejokunan tarikun problemanchiskunapaq, ichaqa manan sapankanchispa problemanchiskunapi yanapaq librollachu. Yanapawanchismi ama llakikuyninchiskunallapi piensananchispaq, aswanpas jujkunapi piensanapaq. Chayta entiendespaqa atisunmi vidanchispi kusisqa kausayta.

Ejemplopaq, kay yachachikuypi piensay: “Qoypin aswan kusikuyqa kan, manan chaskiypichu” (Hechos 20:35). ¿Yuyashankichu pitapas qolqe pisichikuqta yanapasqaykita? Otaq, ¿jayk’aqllapas uyarirankichu llakiq ñit’isqan tarikuq amigoykita? Ancha kusisqachá sientekuranki payta yanapaspaykiqa.

Mana interesraykuchu imatapas qospaqa aswan kusisqan sientekunchis. Juj escritor niran: “Ima ruwasqanchismantapas astawanraq kutichipuwananchista  suyaspaqa, manapunin atisunmanchu jujkuna yanapayta, yanapanapaqqa manan suyananchischu ima recompensatapas”, nispa. Ichaqa mana imawan kutichipuyta atiqkunapaq imatapas ruwaspaqa, chaskinchismi recompensata. Kamaqninchiswanmi llank’ashanchis, payqa sumaq sonqo kaspa jujkunapaq ruwasqanchistan paymanpas manusunman jinata qhawarin (Proverbios 19:17). Diosqa anchatan valoran sufriqkunapaq tukuy ruwasqanchista, chaymi prometen wiñay kausaywan kay pachapi pagapuwananchispaq. ¡Chayqa may sumaq suyakuymi! (Salmos 37:29; Lucas 14:12-14). *

Astawanqa Biblian yachachiwanchis Diosta adoraspa kusisqa kausayta. Palabranmi animawanchis payta alabananchispaq, jatunchananchispaq, kasukunanchispaq ima, pay kamaqninchis kasqanrayku (Eclesiastés 12:13; Apocalipsis 4:11). Chayta ruwaspaqa Kamaqninchispa sonqontan kusichinchis. Pay kikinmi niwanchis: “Churilláy, yachayniyoq kay, jinaspa sonqoyta kusirichiway”, nispa (Proverbios 27:11). Piensay kaypi: Palabranta kasukuspa imaymana ruwaypi allinta decidiqtinchisqa janaq pacha taytanchispa sonqontan kusichinchis. ¿Imarayku? Payqa interesakunmi noqanchispi, chaymi munan consejonkuna kasukunanchista allinlla kananchispaq (Isaías 48:17, 18). Chhaynaqa, tukuy imamantapas aswan importanteqa: Vidanchispi munayniyoq Diosta adoraymi jinallataq sonqonta kusichiy.

Bibliaqa yachachiwallanchistaqmi Kamaqninchiswan imaynatan amistadta ruwanapaq. Ejemplopaq, niwanchismi: “Diosman achhuykuychis, jinan paypas qankunaman achhuykamusunkichis”, nispa (Santiago 4:8). Yaqapaschá sasapaq qhawarisunman tukuy atiyniyoq Kamaqninchiswan amistad ruwayta. Ichaqa palabranmi asegurawanchis sichus Diosta maskhasun chayqa tarinanchista, “payqa manan sapankanchismantapas nishu karupichu kashan” (Hechos 17:27). Diospa amigon kanapaq Bibliaq consejonta kasukuspaqa, preparakushasunmi jamuq tiempopaq. ¿Imaynapi?

Piensay kaypi: Maytaña kallpachakusunman chaypas, manan enemigonchis wañuymantaqa ayqeyta atisunmanchu (1 Corintios 15:26). Diosmi ichaqa wiñay kausayniyoq. Payqa manan jayk’aqpas wañunqachu, chaymi munan amigonkunapas wiñaypaq kausanankuta. Kay sumaq simikunawanmi Jehová Diosqa payta maskhaq runakunapaq imachus munasqanta willan: “Wiñaypaq allin sonqollayoqpuni kausachunku”, nispa (Salmos 22:26).

¿Imaynatan Dioswan wiñaypaq amistadta ruwawaq? Diosmanta yachashallay palabran Bibliata estudiaspa (Juan 17:3; 2 Timoteo 3:16). Yanapayninta maskhay entiendenaykipaq. Biblian asegurawanchis sichus tukuy sonqowan Diosmanta yachayta mañakushallasun chayqa, pay qowananchista * (Santiago 1:5). Jinaspapas kallpachakuy yachasqaykiman jina kausanaykipaq; chhaynapin palabranqa ‘purinaykipaq lámpara’ kanqa, jinallataq wiñaypaq ‘ñanniykipaq k’anchay’ (Salmos 119:105).