QALLARIYPI KAQ | ¿IMATAN BIBLIA WILLAN JANAQ PACHAMANTA?
Imaymanatan ninku janaq pachamanta
Jayk’aqllapas tapukurankichu: “¿Imaynataq janaq pachari, pikunataq chaypiri tiyanku?”, nispa. Antesmantañan runakunaqa chay temamanta imaymanata rimaranku. Wakinmi piensanku ñaupa tiempopi wañupuqninku chaypi tiyananpaq, jinaspa paykunata adorananku kasqanta. Wakintaq piensanku janaq pachapiqa thaj kausaylla kananpaq, chaypitaq angelkuna wañupuq allin runakuna ima tiyananpaq. Jujkunataq creenku millonninpi dioskuna tiyananpaq.
Wakin runakunan ninku: “Janaq pachamantaqa manataq pipas jamuranchu chayqa, manan yachayta atisunmanchu imayna kasqanta”, nispa. Ichaqa chhayna nisqankuqa manan cheqaqchu. Jesucristoqa janaq pachapin tiyaran manaraq kay pachaman jamushaspa. Chaytan sut’ita niran qallariy siglopi religioso umallikunaman, niranmi: “Noqaqa janaq pachamanta uraykamurani manan munayniyta ruwaqchu, aswanpas kachamuwaqniypa munayninta ruwaqmi”, nispa. Arí, Jesusqa rikusqantan discipulonkunaman willaran: “Yayaypa wasinpiqa askhan kashan maypichus tiyanaykichispaq”, nispa (Juan 6:38; 14:2).
Jesuspa taytanqa Jehová Diosmi ‘wasintaq’ janaq pachapi kashan (Salmo 83:18). Chhaynaqa paykunallan allintaqa willawasunman janaq pachapi imayna kausay kasqanta. Paykunaqa askha rijuriykunawanmi chay vida imayna kasqanmanta Dios sonqo runakunaman willaranku.
Qatimuq artículo rimashan Bibliapi wakin willakuykunamanta, chaypin kashan chay runakunaq rikusqanku rijuriykuna. Chaykunata t’aqwirispaqa yuyarinaykin janaq pachapi kausayqa mana kay pachapi kausay jinachu kasqanta, kay pachapiqa rikunchismi imatapas otaq llaminchispas. Chaymi Diosqa mana janaq pacha espiritukunaq rimasqanku simikunawanchu explicawanchis, aswanpas entiendenanchispaq jina rijuriykunawan. Chay rijuriykunaqa yanapawasunmi janaq pachapi kaq espiritukunaq kausayninta aswan allinta entiendenapaq.
