Éxodo 29:1-46
29 ”Paykunatan ch’uyanchanki sacerdoteykuna kanankupaq. Chaypaqmi ajllanki juj malta torota mana imanasqa iskay orqo ovejatawan.+
2 Ñut’u kutasqa trigo jak’umantan preparanki mana levadurayoq t’antata, aceitewan tupachisqa mana levadurayoq rosquilla t’antakunata, aceitewan jich’aykusqa mana levadurayoq ñañu, llaflla* t’antata+ ima.
3 Chaykunatan juj canastaman+ churanki, chaytataq torota ovejakunatawan kuskata ofrendapi jaywanki.
4 ”Aarontan churinkunatawan Dioswan tupana karpa punkuman+ pusanki, chaypin paykunata bañachinki.+
5 Chaymantataq jatun ukhu p’achawan+ churanki, chay patamantaq mana makiyoq jatun p’achawan, chaymantaq jatun unkuta* churanki, chaypitaq qhasqo ch’uspata watanki. Unkuq chumpinwantaq qaqata cinturanta+ watanki.
6 Umanmanpas uma k’uyunawanmi churanki, uma k’uyunamantaq Diospaq t’aqasqa kasqan ch’uya señalta*+ churanki.
7 Chaymantataq jawina aceiteta+ umanman jich’aykuspa sacerdote kananpaq ajllanki.+
8 ”Chaymantataq churinkunata asuykachimunki. Paykunamanpas jatun p’achakunatan+ churanki,
9 jinaspa cinturankuta chumpiwan watanki, churallankitaqmi uma k’uyunatapas. Chhaynatan Aaronwanpas wawankunawanpas ruwanki. Ajinatan paykunata sacerdote kanankupaq ajllanki.+ Paykunamantan sacerdotekunaqa jamunqaku. Chayqa wiñaypaq kamachikuymi+ kanqa.
10 ”Chay qhepamantaq ajllasqayki torota Dioswan tupana karpaq ñaupanman apanki, chaypin Aaronpas churinkunapas toroq umanman makinkuta churaykunqaku.+
11 Chay torotan noqa Jehová Diospa ñaupaypi tupana karpaman jaykunapi ñak’anki.+
12 Jinaspa juj chhikan yawarninta dedollaykiwan altarpi waqrakunata llusiykunki.+ Wakin yawartataq altarpa chakinman jich’anki.+
13 Chay toroq ch’unchulnin wirakunata, higadon* wirakunata, iskaynin rurunta wirankunata+ iman orqonki. Chaytataq llapanta altarpi ruphachinki q’osñinanpaq.+
14 Aychanta, qaranta, phusnunta iman ichaqa karpa-karpa jawapi ruphachipunki. Chay toroqa jucha pampachanapaq ofrendan.
15 ”Chaymantataq ajllasqayki jujnin ovejatañataq jap’inki, chay ovejaq umanmanmi Aaronpas wawankunapas makinkuta churaykunqaku.+
16 Chay ovejatan ñak’anki, yawarninwantaq altar muyuriqta ch’aqchunki.+
17 Aychantataq askhaman kuchunki, ch’unchulninkunatapas+ chakinkunatapas llapantan maqchinki. Chaytataq kuchusqayki aychatawan umantawan kuskata chimpa-chimpapurata churanki.
18 Jinaspa chay ovejata llapanta altar patapi ruphachinki chhaynapi q’osñinanpaq. Chayqa noqa Jehová Diospaq sumaq q’apaq ruphachisqa ofrendan+ kanqa, noqa Jehová Diospaq ninawan ruphachisqa ofrenda.
19 ”Chaymantaqa juj kaq ovejatañataqmi jap’inki, chay ovejaq umanmanmi Aaronwan churinkunapiwan makinkuta churaykullanqakutaq.+
20 Chay ovejatan ñak’anki, yawarninwantaq Aaronpa paña ninri puntanta churinkunaq paña ninri puntantawan llusiykunki. Llusiykullankitaqmi paña makinpa mama dedontapas, paña chakinpa mama dedontapas. Wakin yawarwantaq altar muyuriqta ch’aqchunki.
21 Chaymantataq altarpi kaq yawarta jawina aceitetawan+ juj chhikanta oqarispa chaywan ch’aqchunki Aaronta, p’achantawan, churinkunata p’achankutawan. Chhaynapin Aaronpas, p’achanpas, churinkunapas, paykunaq p’achanpas ch’uyanchasqa+ kanqa.
22 ”Chay ovejaq llapa wiranta wirasapa chupanta iman orqonki. Orqonkin ch’unchulnin wiratapas, higadon wiratapas, jinallataq iskaynin rurunta wirantawan.+ Kuchullankitaqmi paña chakantapas. Chay ovejaqa sacerdote ajllay ofrendan+ kanqa.
23 Noqa Jehová Diospa ñaupaypi kaq mana levadurayoq t’anta canastamantan oqarinki juj muyu t’antata, aceitewan q’apisqa rosquilla t’antata, llaflla t’antatawan.
24 Chaytan llapanta Aaronpa makinman churinkunaq makinmanwan churanki, chaytataq noqa Jehová Diospa ñaupaypi ñaupaqman qhepaman maywinki. Chaymi maywisqa ofrenda kanqa.
25 Chayta makinkumanta chaskispataq altarman churanki, jinaspa ruphachina ofrenda patapi ruphachinki. Chay ofrendaqa noqa Jehová Diospaq sumaq q’apaq ofrendan kanqa, noqa Jehová Diospaq ninawan ruphachisqa ofrenda.
26 ”Chaymantataq Aaronta ajllanaykipaq+ jaywasqayki carneroq pechonta kuchunki. Chaytan noqa Jehová Diospa ñaupaypi ñaupaqman qhepaman maywinki, chaymi qanpaq kanqa.
27 Chaymantapas Aaronta wawankunatawan ajllanaykipaq jaywasqayki carneroq maywisqa pechonta, Diospaq t’aqasqa maywisqa chakanta iman ch’uyanchanki.+
28 Chayqa Aaronpaq wawankunapaq iman kanqa, chay ofrendatan Israel runakuna qonqaku.+ Sumaq kausay sacrificio+ jaywasqankumantan paykunaqa chay partekunata noqa Jehová Diospaq t’aqanqaku. Kay kamachikuytaqa wiñaypaqmi kasukunqaku.
29 ”Aaronpa qhepanmanqa wawankunan+ chay sacerdote p’achata+ churakunqaku. Sacerdote kanankupaq aceitewan ajllasqa kaspankun chayta churakunqaku.
30 Aaronpa qhepanman sacerdote kapuq churinqa qanchis p’unchaymi+ chay p’achawan churakunqa. Chay p’achawan churasqan Dioswan tupana karpaman jaykunqa ch’uya cuartopi llank’ananpaq.
31 ”Sacerdote ajllanaykipaq ñak’asqayki puchuq oveja aychatan ch’uya partepi t’impuchinki.+
32 Chay aychata canastapi kaq t’antata iman Dioswan tupana karpa punkupi Aaronwan wawankunapiwan mijunqaku.+
33 Paykunaqa imakunawanchus juchanku pampachasqa karqan sacerdote kanankupaq ch’uyanchasqa kanankupaqpas chaykunatan mijupunqaku. Waj runakunaqa manan chaykunataqa mijunqakuchu ch’uya kasqanrayku.+
34 Qhepantin p’unchaypaq chay sacrificio ruwakusqanmanta aychapas t’antapas puchunqa chayqa, llapantan ninapi ruphachipunkichis.+ Manan pipas chaytaqa mijunqachu ch’uya kasqanrayku.
35 ”Llapa kay kamachisqayman jinan Aaronwan wawankunawanpas ruwanki. Qanchis p’unchaymi llapa chaykunata ruwanki.+
36 Sapa p’unchaymi juj torota jaywanki jucha pampachay sacrificiopaq, chhaynapin altarqa juchamanta ch’uyanchasqa kanqa. Aceiteta iman chay altarmanqa jich’aykunki ch’uyanchasqa kananpaq.+
37 Qanchis p’unchaymi chay altartaqa ch’uyanchanki, chhaynapi ch’uyay-ch’uya+ kananpaq. Pipas chay altarta tupaykuqqa ch’uyan kanan.
38 ”Chay altarpin sapa p’unchay watayoq iskay orqo ovejata jaywanki, mana p’itiytan* chaytaqa ruwanki.+
39 Jujnintan tutamanta jaywanki, juj kaqtataq tutayaykuyta jina+ jaywanki.
40 Ñaupaq kaq ovejawan kuskatan jaywanki juj kilo* ñut’u jak’uta juj litro* aceituna aceitewan* chhaqrusqata. Jaywallankitaqmi vino ofrendatapas, chayqa juj litron kanqa.
41 Juj kaq ovejataqa tutayaykuyta jinan jaywanki. Tutamanta jinan chaytaqa jak’u ofrendata vino ofrendatawan kuskata jaywanki. Chay ofrendaqa sumaq q’apaq ofrendan kanqa, noqa Jehová Diospaq ninawan ruphachisqa ofrenda.
42 Chay ofrendataqa sapa p’unchaymi qankunaqa jaywankichis. Chaytan llapa mirayniykichispas ruwanqaku noqa Jehová Diospa ñaupaypi, tupana karpa punkupi. Chaypin noqaqa qankunaman presentakusaq qanwan rimanaypaq.+
43 ”Chaypin Israel runakunaq ñaupanpi presentakusaq, chaytan lliflli kayniy ch’uyanchanqa.+
44 Tupana karpata, altarta iman ch’uyanchasaq. Ch’uyanchasaqmi Aarontapas wawankunatapas+ sacerdoteykuna kanankupaq.
45 Noqaqa Israel runakuna chaupipin tiyasaq. Noqan Diosninku kasaq.+
46 Paykunaqa allintan yachanqaku noqaqa Diosninku Jehová Dios kasqayta, paykuna chaupipi tiyanaypaq Egiptomanta orqomuqninku kasqayta.+ Noqaqa Diosninku Jehová Diosmi kani.
Uraypi willakuykuna
^ Llafllataqa “llafsa, ch’illpa” nillankutaqmi.
^ Unkuqa jatun suéter otaq chaleco jinan karqan. Qhaway “Astawan yachanapaq B5” nisqata.
^ Chaypiqa “ch’uya coronata” nillanmantaqmi.
^ Higadotaqa “k’ipchan, kukupin” nillankutaqmi.
^ P’itiytaqa “t’ipiy” nillankutaqmi.
^ Chaypiqa “efá tupunaq chunka kaq parten” nillanmantaqmi. Efá tupunamanqa iskay chunka iskayniyoq litron jaykuq. Qhaway “Astawan yachanapaq B14” nisqata.
^ Hebreo rimaypiqa “hin medidaq tawa kaq parten” ninmi. Juj hin medidamanqa tawa litro menosmi jaykuq (3,67 L). Qhaway “Astawan yachanapaq B14” nisqata.
^ Aceituna aceitetaqa “olivo aceite” nillankutaqmi.
