Los Ángeles (California, Estados Unidos) sutiyuq llaqtapim wiñarqani, kay llaqtaqa drogakunata rantikusqankuwan hinaspa mozo-sipaskunapa mana allin kawsasqankuwanmi riqsisqa karqa. Suqta churikunamanta iskay kaqninmi kani.

Warmallaraq kaptiymi mamay pusawaq iglesiaman. Mozoyaruspaymi ichaqa chaypi uyarisqaykunata kaqpaqpas hapirqanichu. Domingonkunapim iglesiapi kaqkunawan takiq kani, wakiqnin punchawkunañataqmi sinkakurqani, drogakurqani hinaspa warmikunawan puñukurqani.

Pipas imatapas niykuwaptinqa chaylla piñakuspaymi ima hapisqaywanpas maqaruq kani, chaytaqa ruwarqani gananayraykum. Iglesiapi yachasqaykunaqa manam yanapawarqachu aswanqa niqmi kani: ‘Kayqa señorpa castigonmi paypa munasqallantam ruwani’, nispa. Yaqa 1970 watakunapim 18 watayuq kachkaspay panteras negras sutiyuq politicaman hukllawakuyta munarqani paykunapa rimasqanta allinpaq hapisqayrayku. Ichaqa paykuna hina piensaq huk grupomanmi hukllawakurqani. Achka kutipim chaqwata ruwarqaniku chayraykum estudiasqay escuelapas wichqakuq.

Chayta ruwachkaspaypas astawanraqmi mana allinkunata ruwayta munarqani. Chiqnikuq kasqaymi astawan mana allinkunata ruwachiwarqa. Amistadniykunawanmi Estados Unidos nacionpi yana rikchayniyuq runakunata ñakarichisqankumanta videokunata huk punchaw qawarqaniku. Chay ruwasqankumanta llumpayta piñakuruspaykum chaypi kaq gringo runakunata maqarurqaniku hinaspa yachasqanku lawkunamanpas riqraq kaniku hukkunata maqanaykupaq.

Chay tiempopaqqa wawqiykunapiwanmi autoridadkunapa qawasqallanña karqaniku, llumpay mana allinkunata ruwasqaykurayku. Huknin sullkaymi llumpay mana allin ruwaq mozokunawan hukllawasqa kachkarqa. Kawsasqayqa mana allinllañam karqa.

Huknin amistadniypa tayta-mamanmi Jehova Diospa testigonkuna karqaku, paykunam huñunakuyninkuman rinaypaq niwarqa. Riruspaymi musyakururqani paykunaqa riqsisqay runakunawan mana chaynalla kasqankuta.  Lliwpam biblianku karqa chaytam servichikuqku. ¡Warmachakunapas yachachiqkum! Diospa sutin Jehova kasqanta yachasqay hinaspa rimasqankupi paypa sutinta servichikusqankum admirachiwarqa (Salmo 83:18, NM). Achka nacionkunamanta kaspankupas manam chiqninakuqkuchu.

Qallariypiqa manam bibliata estudiaytaqa munarqanichu, ichaqa huñunakuykunamanmi riq kani. Huk tuta huñunakuypi kachkaptiymi amistadniykunaqa fiestaman rispanku huk mozota casacan qichunankurayku maqaspalla wañurachirqaku. Qatiqnin punchawpim kusisqallaña chay ruwasqankumanta alabakurqaku. Juiciopi kasqankupipas mana kaqpaqmi hapirqaku. Yaqa llapantam wañunankukama carcelpi kanankupaq sentenciarurqaku. ¡Anchatam kusikurqani paykunawan chay tuta mana risqaymanta! Chaywanmi kawsasqayta cambianaypaq tantearurqani hinaspa bibliata estudianaypaqpas.

Huk castakunata chiqnisqayraykum Jehova Diospa testigonkunapa imayna kasqankuta qawasqay admirachiwarqa. Huk kutipim Jehova Diospa testigon kaq gringo runa huk lawman rinanrayku warmankunata yana rikchayniyuq iñiqmasinkunawan saqirqa. Chaymantapas gringo aylluyuq testigom yana rikchayniyuq mozota wasin mana kaptin wasinkupi samaykachirqaku. Chaywanmi mana iskayrayarqanichu Jehova Diospa testigonkuna Jesuspa kayna nisqanta kasukusqankuta: “Kuyanakuptikichikqa llapallan runakunam yachanqa discipuloykuna kasqaykichikta”, niqta (Juan 13:35). Chiqap amistadkunata tarisqaymantam musyakurqani.

Bibliamanta yachasqayman hinam musyakururqani allin runa kanaymanta. Kallpanchakunaymi karqa mana chaylla piwanpas piñanakunaypaq hinaspa sunquypi chay munay mana kananpaqpas (Romanos 12:2). Pisi-pisimantam imayna kayniyta tikrarqani. Enero 1974 watapim Jehova Diospa testigon kanaypaq bautizakurqani.

Bautizakusqaymanta qipamanpas hinallam piñakuq kayniyta atipanaypaq kallpanchakunay karqa. Huk punchawmi runakunaman Diosmanta willakunaykupaq risqaykupi musyakururqani huk suwa carroypa radionta suwakusqanmanta. Chaymi paypa qipanta kallparqani, hapiykuchkaptiyñam radiota wikapaspan hinalla kallpakurqa. Radioyta maymi kasqanman kutichisqaymanta willakuptiymi allin yuyayniyuq iñiqmasiy tapuwarqa: “¿Hapiruspaykiqa imatataq ruwaruwaq karqa?”, nispa. Chayna tapuwasqanmi qawachiwarqa imayna kayniy ñawpaq hinaraq kasqanmanta.

Octubre 1974 watapim mana imallapaq Diosmanta willakurqani. Killapi yaqa 100 horatam Diosmanta runakunaman yachachirqani. Chaymantam Jehova Diospa testigonkunapa Brooklyn (Nueva York) betel wasinpi llamkarqani. 1978 watapim unqusqa mamayta qawanaypaq Los Ángeles llaqtayman kutirqani. Iskay wata qipatam Aarhonda sipaswan casarakurqani. Paymi yanapawarqa mamay wañukunankama cuidaypi. Chaymantam Galaad escuelaman rirqaniku. Chay escuela tukuruptinmi Panamá nacionpi misionero hina kanaykupaq kamachiwarqaku, hinallaraqmi kaypi kachkaniku.

Bautizakusqaymanta qipamanmi hinalla sasa karqa piñakuq kayniyta atipayqa. Ima qaqchanakuy utaq maqanakuypas qallarichkaptinmi chaylla asurikuni. Chaymi warmiywan huk runakunapas anchata alabawan, kikiypunipas chayna ruwasqaymantaqa kusikunim. Ichaqa manam chayraykuchu alabakuni. Chaykunaraykum mana iskayrayanichu biblia runakunapa imayna kawsasqanta cambiayta atisqanmantaqa (Hebreos 4:12).

Bibliam hawka hinaspa mana chaylla piñakuq kanaypaq yanapawarqa. Manañam pi runatapas maqaniñachu, aswanqa Diosmantam yachachini. Ñawpaqpi chiqnisqay runatapas bibliamantam yachachirqani. Bautizakusqanmanta qipamanmi kuskayku huk wasillapi yacharqaniku, hinallaraqmi kunankama allin amistad kaniku. Kunankamam warmiywan kuska 80 masnin runakunata yanaparqaniku Jehova Diospa testigon kanankupaq.

Anchatamá Jehova Diosta agradecekuni allinta hinaspa kusisqa kawsakunaypaq yanapawasqanmanta. Agradecekunitaqmi chiqap amistadkunata tarisqaymantapas.