Hebreos 4:1-16
4 Samananpaq Diospa sapaqchasqan sitioman yaykunapaq promesa hinallaraq kachkaptinqa rikchan-rikchanllayá kasun, yanqañataq mayqinnikichikpas chay punchawman mana yaykunaykichikpaq hina kawaqchik.+
2 Abuelonchikkunaman sumaq willakuyta willasqankuman hinam ñuqanchikmanpas willawarqanchik.+ Chay uyarisqanku palabrakunatam abuelonchikkunaqa mana kasukurqakuchu kasukuq runakuna hina mana iñisqankurayku.
3 Ñuqanchik iñiqkunam ichaqa Diospa samanan punchawpiqa paywan samasunchik. Mana kasukuqkunatam Diosqa nirqa: “Piñakuspay nirqani: ‘Samanay sitiomanqa manapunim yaykumunqakuchu’”, nispay.+ Chaynatam nirqa ruwasqankunata tukuruspan runakuna rikurimusqanmantapacha* samachkaspanpas.+
4 Diosmi qillqanpi ñawpaqmantaraq qanchis kaq punchawmanta kaynata nirqa: “Qanchis kaq punchawpim Diosqa tukuy ima ruwasqanmanta samarqa”, nispa.+
5 Chaymantapas nirqam: “Samanay sitiomanqa manapunim yaykumunqakuchu”, nispa.+
6 Chaynaqa, kachkanraqmi tiempo wakin runakunapas samananpaq Diospa sapaqchasqan sitioman yaykunankupaq, chaymantapas sumaq willakuymanta punta uyariqkunaqa mana kasukusqankuraykum mana yaykurqakuchu, chaymi+
7 unay tiempomanta Davidpa qillqasqan salmopi Dios nirqa: “Kunan nisqayta uyarispaqa, amayá sunquykichikta rumiyarachiychikchu”, nispa. Chaymantaqa ñam kay cartapi rimamuchkaniña. Chaymi Diosqa kaqllamanta “kunan” nispa sutichasqa tiempomanta riman.+
8 Sichu Josuey+ paykunata yaykuchinman karqa samananpaq Diospa sapaqchasqan allpaman, hinaptinqa manañachiki samanapaq huk tiempomantaqa Diosqa rimanmanñachu karqa.
9 Chaynaqa, kachkanraqmi Diospa runankunapaqqa samanapaq punchaw hina samanankupaq tiempo.+
10 Samananpaq Diospa sapaqchasqan allpaman yaykuq runaqa ima ruwasqankunamantapas samarunñam ruwasqankunamanta Diospa samasqanman hina.+
11 Chaynaqa, tukuy atisqanchiktayá ruwasun samananchikpaq, chaynapi mana kasukuqkunapa ruwasqanta pipas mana qatipakunanpaq.+
12 Diospa palabranqa kawsachkanmi hinaspapas atiyniyuqmi.+ Iskay lawnin filoyuq espadamantapas aswan kuchukuqraqmi.+ Runapa ukunkama yaykuspanmi riqsichin runapa* qayllanpi imayna kasqanta hinaspa sunqun ukupi* imayna kasqantapas, yaykuntaqmi tullunkama hinaspa chilinankamapas, chaymantapas piensasqankunatawan sunqunpa munasqankunatam riqsichin.
13 Imapas unanchasqa kaqkunaqa manam Diosmantaqa pakasqachu kachkan,+ aswanqa tukuy imapas paypa qawasqallanmi kachkan, paypaqqa tukuy imapas sutillam kachkan, paymanmi cuentata qusunchik.+
14 Ancha riqsisqa sacerdotekunapa kamachiqnin Diospa churin Jesusmi kapuwachkanchik,+ paymi hanaq pachaman yaykurqa, chayraykuyá paypi iñisqanchikmanta hinalla willakusun.+
15 Kapuwaqninchik sacerdotekunapa kamachiqninqa manam pantaq kasqanchikmanta mana llakipayakuqchu,+ payqa ñuqanchik hinam tukuy imapi ñakarichisqa karqa, ichaqa manam huchallikurqachu.+
16 Chaynaqa, ancha kuyawaqninchik* Diospa trononmanyá asuykusunchik, hinaspayá mana recelaspa payta mañakusunchik,+ chaynapi yanapakuyta necesitasqanchik tiempopi llakipayasqa hinaspa ancha kuyapayasqa* kananchikpaq.
Willakuykuna
^ Kaypiqa rimachkan Adanpawan Evapa churi-wawanku kasqan tiempomantam.
^ Utaq: “Almapa”. Qaway kay palabrapa ima ninan kasqanta.
^ Utaq: “Espiritunpi”. Qaway kay palabrapa ima ninan kasqanta.
^ Kaypiqa rimachkan mana kuyana kachkaspa kuyasqa kaymantam.
^ Kaypiqa rimachkan mana kuyana kachkaspa kuyasqa kaymantam.
