Yachachikuypa kasqanman rinapaq

Yachachikuyman rinapaq

BIBLIAM IMAYNA KAWSASQANTA CAMBIARQA

Maqakuqllaña hinaspa piñakuqllaña mozom karqani

Maqakuqllaña hinaspa piñakuqllaña mozom karqani
  • NACESQAN WATA: 1974

  • NACIONNINMI: MÉXICO

  • HUK WILLAKUYKUNA: MAQAKUQLLAÑA HINASPA PELEOLLAPI PURIQMI KARQA

ÑAWPAQ VIDAY.

Tamaulipas lawpi Mante sutiyuq suma-sumaq llaqtapim nacerqani. Chay lawpi runakunaqa yaqa llapankum kuyakuq hinaspa qukuykuq kanku. Ichaqa karqataqmi mana allin runakunapas, chaymi manchakuyllawanña kawsarqaniku.

Tayta-mamaypa tawa churinkunamanta iskay kaqmi kani. Catolico iglesiapim tayta-mamay bautizachiwarqaku, chay iglesiapim takirqani. Diospa munasqantam ruwayta munarqani rupachkaq ninapi wiñaypaq kañasqa kayta manchakusqayrayku.

Pichqa watachayuq kachkaptiymi kuyasqa taytayku saqiruwaptinku ancha llakisqa qiparurqani, chaymi mana yacharqanichu imanasqa ripukusqanmanta. Chaymantapacham mamayqa mikuchiwanankupaq tukuy punchaw llamkapakurqa.

Chaymi ñuqaqa escuelayman mana rispay llaqtapi yuyayniyuq mozokunawan hukllawakuyta qallaykurqani. Paykunawanmi yacharurqani cigarro pitayta, suwakuyta, qacha rimaykunata hinaspa takawan maqanakuytapas. Pipas kasuwananta munasqayraykum takawan peleayta hinaspa pistola servichikuyta yacharurqani. Puraminti maqakuq mozom rikurirurqani. Sapa kutim pistolawan valeanakuypi puriq kani, chaymi achka kutipi yawarpa pampaykusqanta callepi saqiruwaqku wañurusqaytaña piensaspanku. ¡Mamaymi puramintita llakikuq chaynata qawawaspan, sapa kutim chaylla hospitalman apawaq!

Warma kasqaypi amigochay Jorgem watukamuwarqaku 16 wataypi kachkaptiy. Payqa Jehova Diospa testigonñam kasqa, chaymi sumaq yachachikuykunata bibliamanta willawanankupaq hamusqa. Bibliataqa manam haykapipas leerqanichu. Anchatam kusikurqani Diospa sutinta hinaspa allpa pachapaq Diospa ima munasqankunata yacharuspay. Chaymi Jorgewan biblia estudiayta qallaykurqaniku.

BIBLIAM VIDAYTA CAMBIARURQA.

Sunquypas tiyaykurqam nina rawraymanta biblia mana yachachisqanta yacharuptiy (Salmo 146:4; Eclesiastes 9:5). Chayraykum Diostaqa churinkuna allin kananta munaq taytata hinaña qawarqani.

Biblia estudiasqayman hinam musyakurqani mana allin kayniykunata saqinaymanta. Llampu sunqum kanay karqa hinaspapas genioytam cambianay karqa. 1 Corintios 15:33 nisqanmi anchata yanapawarqa, chaypim nichkan ‘mana allin amistadkunaqa allin kawsakusqanchikta chinkachisqanmanta’. Chaymi tantearurqani mana allin amistadniykunawan manaña hukllawakunaypaq, aswanqa Jehova Diospa testigonkunañam amistadniykunaqa karqa, paykunaqa pantanakuruspankupas bibliapa yachachisqanman hinam sumaqllata allinyanakunku.

Bibliapi Romanos 12:17-19 nisqanpas anchatam yanapawarqa, chaypim nin: “Pipas mana allinta ruwasuptikichikqa amayá mana allinwanqa kutichiychikchu. [...] Atisqaykichikman hinayá kallpanchakuychik llapallan runakunawan hawkalla kanaykichikpaq. Kuyasqallaykuna, amayá vengakuychikchu [...] qillqasqamiki kachkan: ‘Ñuqam vengakusaqqa, ñuqataqmi mana allin ruwasqanmanta pagapusaq’ ninmi Jehova Dios”, nispa. Kaywanmi yacharurqani tukuy mana allinkunataqa Jehova Dioslla allichananmanta. Pisi-pisimantataqmi maqakuqllaña kasqayta saqirurqani.

Yuyachkaniraqmi huk tuta wasiyman kutichkaptiy ima pasawasqanta. Ñawpaqpi chiqniwaqniy mozokunam maqaruwarqa. Chay mozokunapa kamachiqninmi maqawaspan niwarqa “¡kunanyá kutipakuy!”, nispan. Chay ratollam Jehova Diosta pisillapi mañakurqani mana kutipakunaypaq. Kutipakuytamá munarqani ichaqa lluptikururqanim. Paqarinnintinta chay maqawaqniy mozowan sapallanpi tuparuspaymi aminaykama maqaparuyta munarqani, ichaqa kaqllamantam Jehova Diosta sunqullaypi mañakurqani mana peleanaypaq. Manam ima niytapas atirqanichu asuykamuwaspan “pampachaykuway chisi maqarusqaymanta. Ñuqapas qam hinam biblia estudiayta munani”, nispa niwaptin. Allinpaqchá mana imanarurqanichu. Chayraykum paypas biblia estudiayta qallaykurqa.

Aylluyqa biblia estudiaytam saqirurqa, chaymi llakirachiwarqa. Ñuqam ichaqa tanteakururqaniña mana piwanpas ni imawanpas harkachikuspay Jehova Diosta servinaypaq. Yacharqanim Diospa llaqtanpi kaspallay sunquypi hawkayayta tarinaymanta chaynataq sumaq sunqu aylluta tarinaymantapas. Chaymi 1991 watapi bautizakurqani Jehova Diospa testigonña kanaypaq.

IMAKUNAPIM YANAPAWARQA.

Ñuqaqa pipas kasukuwanantam munaq kani hinaspapas peleollapi puriqmi karqani, ichaqa Diospa palabranmi yanapawarqa chayna kasqayta saqinaypaq. Kunanqa bibliamantam willakuni uyariy munaqkunaman. 23 watam Jehova Diosta tukuy tiempoywan servirqani, chayqa suma-sumaqmi karqa.

México nacionpi Jehova Diospa testigonkunapa betel wasinpipas yanapakurqanim. Chaypim riqsirurqani tukuy sunqunwan Diospaq llamkaq Claudia sutiyuq sipasta, paywanmi 1999 watapi casarakurqani. Sapa kutim Jehova Diosta agradecekuni suma-sumaq yanapaqniyta quwasqanmanta.

México nacionpi señasllawan rimaq runakunatam yanaparqaniku Jehova Diosta riqsinankupaq. Chaymantañataqmi Belice nacionpiña Diosmanta willakunaykupaq niwarqaku. Kay llaqtapiqa manam anchachu tukuy imaykupas, ichaqa kusisqam Jehova Diosta servichkaniku. ¡Manamá kayna kawsakuytaqa imaraykupas saqiymankuchu!

Watakuna pasasqanman hinam mamayqa kaqllamanta bibliata estudiaspan bautizakururqa. Mayor kaq wawqiypas ayllunpiwanmi Jehova Diospa testigonña kanku. Ñawpaqpi kaq amistadniykunaman Diosmanta willasqaykunapas wakinqa Jehova Diospa testigonñam kanku.

Wakin aylluykunam ichaqa wañurunkuña maqakuqllaña kasqankurayku. Ñuqapas paykuna hinachá wañuruymanña karqa genioyta mana cambiaspayqa. Jehova Diostam anchata agradecekuni riqsiykusqaymanta hinaspa llaqtanta riqsiykusqaymantapas, agradecekunitaqmi bibliapa yachachisqanman hina kawsakunaypaq sumaqllata yachaykachiwasqanmantapas.