¿Cristianokuna confesakunankuchu?

Achka iglesiakunapim runakunaqa sapankupi huchankuta sacerdoteman confesakunku. Kunan tiempopi runakuna ima mana allin ruraytapas allinpaq qawaptinkuqa, ¿allinchu kanman huchanchikta confesakuy?

WAKINPAQMI allin, wakinpaqñataqmi mana. Canadá nacionpi National Post periodicom willakurqa huk runapaq huchanta hukkunaman willakuy sasa kasqanmanta. Ichaqa, hina payllataqmi nirqa: “Pipas mana allin rurasqaykimanta yachaspan qanwan Diosta mañakuptin hinaspa ima ruranaykipaq nisuptikiqa, hawkañam tarikunki”, nispa. Chaynallataqmi huk libropipas huk runa nirqa: “Confesakuyqa iglesiapa aswan mana allin rurasqanmi, runakunam rikurinku imamantapas confesakuyllaña munaqkuna”, nispa (Bless Me, Father, for I Have Sinned [Bendeciykuway, padre, huchallikurunim]). Ichaqa ¿ima nintaq Biblia kaymanta?

Bibliapa ima yachachisqanmanta

Israel nacionman Leyta Dios qospanqa nirqam pipas huchallikuruspan ima rurananmanta. Sichu huk runa huchallikuruspan otaq Diospa leyninpa contranpi imatapas ruraruspanqa, willakunanmi karqa Leviy casta sacerdoteman, payñataqmi huk animalta ofrecenan karqa huchanmanta pampachasqa kananpaq (Levitico 5:1-6).

Tiempo pasasqanman hina, rey David huchallikuruptinmi Diosmanta willakuq Natan chay huchanta qawachirqa, hinaptinmi Davidñataq reqsikuspan nirqa: “Huchallikurunim Tayta Diospa contranpi”, nispa (2 Samuel 12:13). Chaymi Diosta mañakurqa pampachaykunanpaq. ¿Imapim mañakusqan tukurqa? Davidmi nirqa: “Mana pakaspam huchallaytaqa qamllamanpuni willakurqayki. Kikillaytaqmi yuyaymanaspa nikullarqani kaynatapuni: ‘Tayta Diosmanmi willakullasaq mana kasukuq kasqaymantaqa’. Qanmi pampachaykullawarqanki tukuy culpayoq kasqaymantaqa”, nispa (Salmo 32:5; 51:1-4).

Punta cristianokunapas huchankumantaqa willakuqkum Diospa kamachisqanman hina. Mamanmanta Jesuspa wawqen Jacobom Jerusalenpi iñiqkunapa huk kaqnin punta apaq karqa, paymi nirqa: “Huchaykichikkunata willanakuspayá Diosta mañakuychik chaynapi sanoyanaykichikpaq”, nispa (Santiago 5:16). Hinaptinqa, ¿ima huchakunatam cristianokuna willakunanku hinaspa pikunaman?

¿Lliw huchanchiktachu willakuna?

Pantaq runakuna kaspanchikmi, rurasqanchikwanpas otaq rimasqanchikwanpas sapa punchaw huchallikunchik (Romanos 3:23). ¿Chaychu sapa pantasqanchikkunata religionpi punta apaqkunaman willakunanchik?

Diospaqqa ima huchapas mana allin qawasqam, ichaqa payqa llakipayakuqmi hinaspa yachanmi pantaq kasqanchikrayku huchallikusqanchikta. Chaymi salmista nirqa: “Mana  allin rurasqaykuta yuyaptikiqa llapallaykuchiki castigasqa kallaymanku karqa. Ichaqa qamllam pampachaykuwankikuqa”, nispa (Salmo 130:3, 4). Hinaptinqa, ¿imatam rurachwan mana munachkaspa hukkunata sientirachispaqa? Yuyarisunchik, Jesusmi qatiqninkunaman Diosta imayna mañakunankuta yachachispan nirqa: “Huchaykutayá pampachawayku, ñoqaykupas mana allin rurawaqniykutam pampachaniku”, nispa (Lucas 11:4). Arí, Diosqa pampachawasunmi Jesuspa sutinpi mañakuptinchikqa (Juan 14:13, 14).

Chaypaqqa Jesuspa nisqanman hinam ‘mana allin rurawaqninchikta’ pampachana. Chaynallataqmi apostol Pablopas cristianokunata nirqa: “Sumaq sonqo kaspayá kuyapayanakuychik, Diospas Cristoraykum pampachasurqankichik, chaynayá qamkunapas pampachanakuychik”, nispa (Efesios 4:32). Chaynaqa contranchikpi huchallikusqankuta pampachaptinchikqa, segurom kachwan Dios pampachawananchikta.

Ichaqa, ¿imatam nichwan suwakuy, llullakuy, huchapakuy hinaspa sinkakuy hatun huchakunamanta? Chay ruraqkunaqa Diospa kamachisqanta mana kasukuspam Diospa contranpi huchallikuchkan. Hinaptinqa, ¿imatam rurananchik?

¿Pimantaq willakunanchik?

Diosllam pampachawanchikman contranpi huchallikusqanchiktaqa, manam pitapas rantinpiqa churarqachu. Bibliam nin: “[Diosman] huchanchikkunata willakuptinchikqa, paymi [. . .] allin ruraq kasqanrayku pampachawanchik hinaspam tukuy mana allin rurasqanchikmanta mayllawanchik”, nispa (1 Juan 1:9). Ichaqa, ¿pimantaq willakunanchik?

Diosllam pampachakuqqa, chaymi pampachawananchikpaq payman willakunanchik. Chaytam rey Davidpas rurarqa. Ichaqa manam chayllachu. Bibliaqa ninmi: “Huchaykichikmanta wanakuspayá Diosman kutirikuychik chaynapi tukuy huchaykichikta chinkachiptin hamuq punchawpi Señor hawkayaypi samarichisunaykichikpaq”, nispa (Hechos 3:19). Arí, manam pantasqanchikta reqsikuspa Diosman willakuyllachu, aswanqa wanakuspam mana allin rurasqanchikta saqenanchik. Kay ruray sasa kaptinpas, yanapakuyqa kachkanmi. ¿Mayqantaq chay?

Qawasqanchikman hinaqa, apostol Santiagom cristianokunaman kaynata nirqa: “Huchaykichikkunata willanakuspayá Diosta mañakuychik chaynapi sanoyanaykichikpaq”, nispa. Nirqataqmi: “Justo runapa tukuy sonqonwan mañakusqanqa llumpay atiyniyoqmi”, nispa (Santiago 5:16). Kay ‘justo runaqa’ yaqapaschá kanman 14 versiculopi Santiagopa rimasqan huk kaqnin ‘ancianokuna’. ¿Pikunam paykuna kanku? Congregacionpi experienciayoq cristianokunam, paykunam yanapanku huchankumanta pampachasqa kay munaqkunata. Chayna kaptinpas Dioslla pampachaq kasqanraykum, paykunaqa mana atinmankuchu Diospa contranpi huchallikuqkunata pampachaytaqa. * Ichaqa, atinmankum huchallikuqta corregiyta, chaypaqmi hatun hucha rurasqankuta reqsikunankupaq hinaspa wanakunankupaq yanapanku (Galatas 6:1).

 ¿Imanasqataq willakunanchik?

Pipas ima huchata ruraruspanqa, Dioswan hinaspa runamasinwan amistadnintam hukmanyachin. Hinaspam hukmanyasqa otaq llakisqa tarikunman. ¿Imanasqa? Concienciayoqta Dios unanchawasqanchikrayku (Romanos 2:14, 15). Hinaptinqa, ¿imatam rurachwan conciencianchik acusawaptinchikqa?

Bibliapi Santiago libropa ima niwasqanchikta kaqlla qawasunchik, ninmi: “Mayqannikichikpas [iñiynikichikpi] onqosqa kaspaqa iñiqkuna ukupi ancianokunatayá qayaychik chaynapi Diosta mañapususpaykichik [Jehová Diospa] sutinpi aceitewan untasunaykichikpaq. Confiakuspa mañakuptinkuqa [Jehová Diosmi] onqoqta sanoyachispa sayarirachinqa, huchapi kaptinqa pampachaykunqam”, nispa (Santiago 5:14, 15).

Kaypim qawachin iñiqmasinkuta iñiyninkupi yanapanankupaq ancianokuna ima rurayniyoq kasqankuta. Paykunaqa manam uyariyllachu uyarinku huchankuta pipas willakuptinqa. Aswanmi iñiyninkupi allin kanankupaq yanapanku. Chaypaq qawasunchik Santiagopa ima nisqankunata.

Puntata qawasun ima ninanmi, “aceitewan untasunaykichikpaq” nisqa rimaykuna. Kaypiqa rimachkanmi iñiyninpi sanoyachinanpaq Biblia atiyniyoq kasqanta. Apostol Pablopa nisqanman hinaqa, “Diospa palabranqa kawsachkanmi hinaspapas atiyniyoqmi”, runapa “piensasqankunatawan munapayasqankunata reqsichiqmi”, huk rimaypiqa yachachikuyninqa chayanmi yuyayninchikmanwan sonqonchikmanpas (Hebreos 4:12). Bibliata allinta servichikuspankum, ancianokunaqa iñiyninkupi hukmanyasqa kaqkunata yanapanmanku, imanasqa chayna kasqankuta yachanankupaq hinaspa Diosta agradanankupaq imakuna ruranankupaqpas.

Chaymantapas rimanmi ‘confiakuspa mañakuymanta’. Arí, ancianokunapa mañakusqankuqa manam cambianmanchu Diospa tanteasqantaqa. Ichaqa ancha allinmi Diospaqqa, payqa munanmi Cristopa wañukusqanwan pampachayta (1 Juan 2:2). Payqa yanapanmanmi sonqomanta wanakuspa allinkunataña ruraspanku qawachiqkunataqa (Hechos 26:20).

Ichaqa Diospa chaskisqan kayta munaspanchikmi huchanchikkunataqa willakunanchik. Jesusmi nirqa Diosta allin concienciayoq servinapaq runamasinchikwan sasachakusqanchikta puntata allichayninchik ancha allin kasqanta (Mateo 5:23, 24). Proverbios 28:13 nin: “Huchankuna pakaq runaqa manam allinchu kanqa. Huchanta willakuspa wanakuq runam ichaqa Diospa kuyapayasqan kanqa”, nispa. Arí, Jehová Diospa qayllanpi humillakuspa pampachawananchikpaq mañakuptinchikqa payqa chaskiwasunmi hinaspa bendeciwasuntaqmi (1 Pedro 5:6).

[Willakuy]

[23 kaq paginapi suti rikuylla kaq willakuy]

Diosqa huchanchikkunatam pampachawasun Jesuspa sutinpi mañakuptinchikqa

[24 kaq paginapi dibujo]

Diospa chaskisqan kayta munaspanchikmi huchanchikkunataqa willakunanchik