Chuya espiritumanta: cheqap yachachikuy

QATIQNINKUNA Diospa chuya espiritunta mañakunankupaq nisqanpim, Jesusqa nirqataq: “Churikichikmanqa ¿yaqachum culebrata qoykuwaqchik challwata mañakusuptikichik otaq atoq-atoqta runtuta mañakusuptikichik?”, nispa (Lucas 11:11, 12). Galilea lawpi warmachakunaqa yarqaptinmi runtutawan challwata mañakuqku.

Chaynataqmi ñoqanchikpas chuya espirituta necesitanchik, chaymi Jesuspa nisqanta kasukuspa hinalla mañakunanchik, yarqachikuq warmachakuna hina (Lucas 11:9, 13). Ichaqa, chay mañakuyninchik imanasqa ancha allin kasqanta entiendenapaqqa, puntatam yachananchik ima kasqanta. Chaynaqa qawasunchikyá Bibliapa ima yachachisqanta.

“Diospa atiynin”

Bibliaqa sutillatam yachachin chuya espiritu Diospa kallpan kasqanta, chaytam servichikun munayninta rurananpaq. Qawasunchik doncella Maria wawayoq kananpaq angel Gabriel ima nisqanta: “Chuya Espiritu qanman hamuptinmi hanaq pachapi Diospa atiynin puyu hina pampaykusunki. Chayraykum Diospa sapaqchasqan naceq wawapas sutichasqa kanqa Diospa Churinwan”, nispa (Lucas 1:35). Kaymi qawachiwanchik chuya espirituqa ‘Diospa atiyninwan’ tupasqanta.

Kay textopa nisqanman hinataqmi huk textokunapipas nichkan. Diosmanta willakuq Miqueasmi nirqa: “Ñoqataqa Tayta Diospa Espiritunmi huntaykuwan atiyninwan”, nispa (Miqueas 3:8). Jesuspas qatiqninkunatam nirqa: “Ichaqa Chuya Espiritu qamkunaman hamuptinmi atiyta chaskinkichik”, nispa (Hechos 1:8). Apostol Pablopas nirqam: “Chuya Espiritupa atiynillanwanmi”, nispa (Romanos 15:13, 19).

Chaynaqa, ¿imapitaq tupan chuya espirituqa Diospa atiyninwan? Jehová Diosqa chuya espiritunwanmi atiyninta qawachin, chaymi ninchik chuya espiritunwan rurasqanpi atiynin qawakusqanta. Kay atiyqa ancha admirakunapaqmi, ¡mayna atiynintachá servichikurqa tukuy imata unanchananpaqqa! Piensariy kaypi, Bibliam kaynata niwanchik: “Qawariychik alto cielokunata. ¿Pitaq unancharqa chaykunata? Lucerokunata tropankunata hina yupaspa horqomuqmi. Sapakamata sutinwan sutichaqmi [. . .]. Ancha hatunmi paypa atiyninqa. Ancha hatunmi paypa kallpanqa”, nispa (Isaias 40:26).

Kaypim niwanchik hanaq pachapi sumaq takyachisqa kaqkunaqa, Diospa ‘ancha hatun atiyninwan’ otaq kallpanwan rurasqa kasqanmanta. ¡Piensariy! Kay admirakuypaq kallpanwanmi runakunapas unanchasqa karqa. (Qawariy, “¿Imapaqtaq Diosqa chuya espiritunta servichikurqa?”, niq recuadrota.)

Qawasqanchikman hinaqa, Diosqa chuya espirituntam servichikunman tukuy imata rurananpaq. Servichikunmantaqmi runakunata yanapananpaqpas. Bibliapim tarinchik achka serviqninkunata imayna yanapasqanmanta.

 “Diospa Espiritunmi ñoqapi kachkan”

Diospa munayninta Jesuspa rurasqanpim, sutillata qawanchik Diosqa chuya espirituntakama serviqninkunaman atiy qosqanmanta. Huk kutipim Nazaret runakunata Jesus nirqa: “Diospa Espiritunmi ñoqapi kachkan”, nispa (Lucas 4:18). Hinaptinqa, ¿imakunatataq Jesusqa rurarqa ‘chuya espiritupa kallpanwan’? (Lucas 4:14.) Wakinpim imaymana onqoyniyoqkunata sanoyachirqa, lamar qochapi sinchi wayratam hawkayachirqa, huk-iskay tantawan hinaspa challwawanmi waranqantin runakunata mikuchirqa, kawsarichirqataqmi wakin runakunatapas. Chayraykum apostol Pedropas nirqa: “Jesustam cheqaptapuni Dios apruebarqa. Admirakuypaq milagrokunata atiyninwan rurasqanraykum chaytaqa yachanchik”, nispa (Hechos 2:22).

Kunan tiempopi milagrokunata ruranankupaq chuya espiritunta runakunaman Dios mana qospanpas, hinallam serviqninkunataqa anchata yanapachkan. Jesuspa nisqanman hinam, Jehová Diosqa chuya espiritunta qon serviqninkunaman (Lucas 11:13). Chaymi apostol Pablo nirqa: “Tukuy imataqa rurani [Dios] kallpanchawaptillanmi”, nispa (Filipenses 4:13). ¿Munawaqchu qampas chayna kallpanchasqa kayta? Qatiqnin yachachikuypim chaymanta yachasun.

 [21 kaq paginapi dibujo hinaspa recuadro]

Imanasqataq runaqa mana kanmanchu

Llaqtan bendicionkuna chaskinanmanta rimaspanmi, Diosqa chuya espirituta tupachirqa yakuwan. Nirqam: “Ñoqam chunniq sitiokunapi yakukunata kallpachisaq. Ñoqam chaki allpakunapi mayuchakunata purichisaq. Miraynikichikkunamanmi espirituywan huntachisaq. Qamkunamanta naceqkunamanmi bendicionniywan huntasaq”, nispa (Isaias 44:3).

Serviqninkunaman Jehová Dios espiritunta qoptinmi, Bibliaqa nin ‘chuya espiritupa huntasqan’ otaq “huntaykusqan” nispa. Chaynam pasarqa Jesuswan, Bautizaq Juanwan, Pedrowan, Pablowan, Bernabeywan hinaspa Pentecostes 33 watapi huñunasqa qatiqninkunawanpas (Lucas 1:15; 4:1; Hechos 4:8; 9:17; 11:22, 24; 13:9).

Hinaptinqa, ¿huk runa atinmanchu hukkunaman huntayta? Otaq ¿runakuna huntasqa kanmankuchu huk runawan? Manamá atikunmanchu ¿aw? Bibliapa nisqanman hinaqa runakunaqa huntasqam kanmanku entiendeq kaywan hinaspa cheqap yachaywanpas, ichaqa manam haykapipas ninchu runawan huntasqa kaymantaqa (Exodo 28:3; 1 Reyes 7:14; Lucas 2:40; Colosenses 1:9).

Espiritu palabraqa, pnéuma nisqa griego rimaymantam tikrasqa kachkan, kayqa qawachinmi mana rikuy atina kallpa kasqanta. Chaymantapas kay rimayqa huk diccionariopa nisqanman hinam “puntata qawachin wayra kasqanta [. . .]; samayta hinaspa astawanraq wayra hina mana rikuy atina hinaspa atiyniyoq espiritu” kasqanta (Diccionario expositivo de palabras del Antiguo y del Nuevo Testamento exhaustivo, W. E. Vine).

Sutillamá kachkan, chuya espirituqa manam runachu. *

[Willakuy]

[Reqsikunchikmi]

Photodisc/SuperStock