¿ATICHWANCHU WIÑAYPAQ KAWSAKUY AKLLAKUYTA? Wakin runakunaqa ninkum imapaqpas destinasqaña kasqankuta. Wakinñataqmi ninku imayna kawsakusqankuqa Diospa destinasqanña kasqanta. Chaymi ima ruwasqankupas mana qispiptinqa ninku “chaynapaqñachiki karqa” nispa.

Wakinkuqa hukmanyasqallañam kanku mana allinkuna hinalla kasqanrayku. Allinta kawsakunankupaq kallpanchakuptinkupas guerrakuna, unquykuna hinaspa ima mana allinkunapas kasqanraykum ima ruwasqankupas yanqapaq. Chaymi ninku allinta ruwanankupaq kallpanchakuyqa yanqapaqña kasqanta.

Wakinpiqa qunqayllatam imapas pasaruwachwan (Eclesiastes 9:12). Chayna kaptinpas lliwmi atichwan hamuq punchawpi ima ruwananchikmanta tanteakuytaqa. Bibliapas ninmi wiñay kawsayqa ñuqanchikmanta kasqanta. ¿Imanasqataq chaynata ninchik?

Ñawpaq tiempopi Israel runakuna prometesqa allpaman yaykunankupaqña kachkaptinkum Diosqa Moiseswan paykunaman nichirqa: ‘Cielokunatawan kay pachatam qamkunapa contraykichikpi testigota churani, kawsayta utaq wañuyta, bendecisqa kayta utaq ñakasqa kayta akllakunaykichikpaq. Chaynaqa, kawsaytayá akllakuychik, qamkunapas miraynikichikkunapas kawsanaykichikpaq. Jehova Diosta kuyaspayá kasukuychik, ama paymantaqa kacharikuychikchu’, nispa (Deuteronomio 30:15, 19, 20).

‘Cielokunatawan kay pachatam qamkunapa contraykichikpi testigota churani, kawsayta utaq wañuyta, bendecisqa kayta utaq ñakasqa kayta akllakunaykichikpaq. Chaynaqa, kawsaytayá akllakuychik’ (Deuteronomio 30:19).

Diosqa Israel runakunatam Egipto nacionpi sirviente kasqankumanta hurqumurqa, chaynapi prometesqan allpapi kusisqa kawsakunankupaq. Chaypaqmi ichaqa kikinku ‘kawsayta akllakunanku’ karqa. ¿Imaynata? Jehova Diosta kuyaspa, payta kasukuspa hinaspa paymanta mana kacharikuspam.

Qampas chaynatam kikiki akllakunayki. Kay pachapi sumaq huertapi wiñaypaq kawsakuy akllakusqaykitaqa qawachinki Diosta kuyaspam, payta kasukuspam hinaspa paymanta mana kacharikuspam. Ichaqa, ¿imaynatam chayta ruwawaq?

Apostol Juanmi Diospa yanapakuyninwan nirqa: “Diosqa kuyakuymi”, nispa (1 Juan 4:8). Chayta allinta Jesus yachasqanraykum mayqin kamachikuy aswan allin kasqanmanta tapuptinku nirqa: “Jehova Diosnikitam kuyanayki tukuy sunquykiwan, tukuy vidaykiwan hinaspa tukuy yuyaynikiwan”, nispa (Mateo 22:37). Chaynaqa, Dioswanqa kuyachikunanchik manam wañunanchikta manchakuspachu nitaq Diosta kasukuna kasqanraykuchu, aswanqa sunqumanta kuyasqanchikraykum.

Jehova Diosqa tayta-mamanchik hinam kuyawanchik. Tayta-mamakunaqa pantaq runa kachkaspankupas churi-wawankupa allinninta munaspankum kuyakuywan hinaspa sumaqta uywanankupaq kallpanchakunku. Chaymi munanku rimapayasqankuta uyarinankuta hinaspa kuyanankutapas. Chaynam Jehova Diospas munan  kuyananchikta hinaspa ñuqanchikpaq imapas ruwasqanmanta agradecekunanchikta.

Bibliapi uyarikuy nispanqa rimachkantaqmi kasukuymantapas. Chaynallataqmi tayta-mamakunapas churi-wawankuta “uyariway” nispankuqa rimachkanku kasukunankumanta. Chaynaqa, Jehova Diosta uyariyqa imam munasqanta yachaymi hinaspa nisqanta kasukuymi. Kunanqa manam ñawpaq tiempopi hinachu Jehova Diosqa rimapayawanchik, chaymi payta uyarinapaqqa bibliata ñawinchananchik hinaspa nisqanta kasukunanchik (1 Juan 5:3).

Diosta uyariyninchik utaq kasukuyninchik imanasqa ancha allin kasqanmanta rimaspanmi Jesus nirqa: “Runaqa kawsanan manam tantallawanchu aswanqa Jehova Diospa lliw rimasqankunawanmi”, nispa (Mateo 4:4). Jehova Diosmanta yachayninchikqa aswan allinmi mikunanchikmantapas. ¿Imanasqa? Kamachiq Salomonmi nirqa: ‘Yachayqa qullqi hinam waqaychakun, chaywanpas yachaymi aswan allinqa, hatalliqninkunaman kawsayta qusqanrayku’, nispa (Eclesiastes 7:12). Diosmanta yachayninchikqa wiña-wiñaypaq kawsakunapaqmi yanapawasun.

Jesusmi nirqa: ‘Kichki punkuwan kichki ñanmi [...] kawsaymanqa apakun, chaytaqa asllam tarinku’, nispa (Mateo 7:13, 14). Chay kichki ñanninta rispa wiñay kawsayman chayananchikpaqqa Jehova Diosmi yanapawanchik. Chayraykum Jehova Diosmantaqa mana kacharikunanchikchu (Salmo 16:8).

Ichaqa sapa punchaw imapas ruwayninchikkunawan kasqanchikraykum tiempopas manaña haypawachwanchu Diospa yachachikuyninkunapi yuyaymananapaq. Chaychá bibliapas niwanchik: “Chaynaqa, imayna kawsasqaykichiktayá allintapuni qawakuychik, kawsaychikqa amayá mana yachayniyuqkuna hinachu aswanqa yachayniyuqkuna hinayá tiempoykichikta ama usuchispa. Kay punchawkunaqa mana allinllañam”, nispa (Efesios 5:15, 16). Diosmanta mana karunchakunapaqqa imamantapas llalliriqtam Dioswan kuyachikunanchik (Mateo 6:33).

Hamuq tiempopi aylluykiwan kusisqa kawsakunaykipaqqa kunanmantam imata ruwanaykipaqpas tanteawaq. Bibliapim willawanchik Jehova Diosqa kuyawasqanchikrayku allin kaqta tanteananchikpaq niwasqanchikmanta. Chaymi Miqueas qillqapi nin:

‘Yaw runa, tayta Diosqa nisurqankiñam allin kaqkunamantaqa, tayta Diosqa ¿imatataq qanmanta mañasunki? Allin arreglo ruwanaykitam, llakipayakuyta kuyanaykitam. Diosnikipa qayllanpi uchuychakunaykitam’, nispa (Miqueas 6:8).

Chaynaqa, Diospa nisqanta kasukuspaykiqa wiñay kawsaytam chaskinki, chayqa qanmantamá kanqa.