Eclesiastes 9:1-18

  • Llapallanchik chaynalla tukusqanchikmanta (1-3)

  • Wañuqlla kaspanchikpas kusisqa kawsakuymanta (4-12)

    • Wañuqkuna mana imatapas yachasqankumanta (5)

    • Wañusqakunapa kasqanpiqa mana imatapas ruwasqankumanta (10)

    • Qunqaymanta imapas mana allin pasakusqanmanta (11)

  • Yachayniyuq kayta mana allinpaq hapisqankumanta (13-18)

9  Tukuy chaykunapi sumaqta yuyaymanaspaymi kayta yacharuni: Allin ruwaqpas, yachayniyuqpas chaynataq paykunapa tukuy ima ruwasqankupas Diospa makillanpim kachkan.+ Runakunaqa manam yachankuchu paykunamanta ñawpaqta kuyakuywan chiqnikuy imayna kasqantaqa.  Llapallan runatam hina kaqlla pasan:+ Allin ruwaqtapas, mana allin ruwaqtapas,+ allin runatapas, Diospa chaskisqan runatapas, Diospa mana chaskisqan runatapas, Diosman animalta quqtapas, Diosman animalta mana quqtapas, huchallikuqtapas, imatapas ruwananpaq niqtapas chaynataq imatapas ruwananpaq hawanpi-ukunpi niqtapas.  Kayna ñakariykunam kay pachapi pasakun. Llapallantam hina kaqlla pasan,+ runakunaqa mana allin ruwayllamanñam qukurunku, kawsakusqan punchawkunapim runakunaqa yanqakunallata ruwanku, hinaspam... ¡wañunku!  Runaqa kawsaspanraqqa imallatapas ruwanmanraqmi, wañusqa leonmantaqa kawsaq allqum aswan allinqa.+  Kawsaqkunaqa yachankum wañunankuta,+ wañusqakunam ichaqa manaña imatapas yachankuchu,+ manañataqmi ima pagotapas chaskinkuchu, paykunataqa manañam pipas yuyanqachu.+  Chinkarunñam kuyakuyninpas, chiqnikuyninpas chaynataq envidiakuyninpas. Kay pachapi imapas ruwasqankutaqa manañam ruwankuñachu.+  Rispaykiyá mikuynikita kusisqallaña mikumuy hinaspa vinoykitapas kusisqallaña tomamuy.+ Diosqa imapas ruwasqaykikunawanmi kusisqaña kachkan.+  Yuraqllawanyá pachakuypas*, umaykimanpas hinallayá miski asnaq aceiteta hinakuy.+  Wañukunayki punchawkamayá kuyasqayki warmikiwan kusisqa kawsakuy,+ Diosmi tukuruqlla vidaykita kay pachapi qusurqanki. Chayllamriki kay pachapi anchata ñakarispa llamkasqaykipa pagonqa.+ 10  Imapas ruway atisqaykitaqa kallpaykiman hinayá ruway, wañusqakunapa kasqanpiqa* manañam imatapas ruwankiñachu. Manañam imata ruwanaykipaqpas piensankiñachu, manañam imatapas yachankiñachu, manañam imatapas yuyankiñachu.+ 11  Kay pachapiqa kaytapas rikurqanitaqmi: Allin kallpaqkunapas manam lliwchu puntata chayanku, kallpasapakunapas manam lliwchu peleaspaqa vencenku,+ yachayniyuqkunapas manam lliwchu mikusqa kanku, yachaysapakunapas manam lliwchu apu kanku,+ allin entiendeqkunapas manam lliwchu allinlla kawsakunku,+ llapallankumanmi mana allin punchawkuna chayamun, qunqayllamantam imapas pasarunman. 12  Runaqa manam yachakunchu haykapi wañurunantaqa.+ Imaynam challwakunapas mallawan hapirachikuspanku wañunku, imaynam pichinkuchakunapas tuqllaman wichiykuspa wañunku, chaynam runakunapas qunqayllata ima sasachakuypas chayaramuptin wañunku. 13  Kay pachapiqa rikurqanitaqmi yachaypa imayna kasqantapas, chaywanmi uyarayarqaniraq. 14  Rikurqanim aslla runayuq taksa llaqtachata. Ancha riqsisqa kamachiqmi chay llaqtachaman yaykunanpaq muyuriqninpi hatun pirqakunata hatarirachirqa. 15  Chay llaqtachapim karqa yachayniyuq wakcha runa, chay runaqa yachayniyuq kasqanraykum chay llaqtachataqa libraykurqa. Ichaqa chay wakcha runataqa manam pipas yuyarirqachu.+ 16  Chaymi kikillay nikurqani: “Kallpasapa kaymantapas aswan allinqa yachayniyuq kaymi,+ chaywanpas wakcha runapa yachaynintaqa manam kaqpaqpas hapinkuchu, ima nisqantapas manam uyarinkuchu”, nispay.+ 17  Yachayniyuqpa llampu simillawan rimasqankunata uyariymi aswan allinqa mana yachayniyuqkunapa kamachiqninpa qaparisqanta uyariymantaqa. 18  Yachayniyuq kaymi aswan allinqa peleanankupaq imapas servichikusqanku kaqkunamantaqa, ichaqa huchallikuq huk runallam allin kaqkunataqa chinkarachinman.+

Willakuykuna

Yuraq pachawanqa pachakuqku kusisqa kaspankum, yanawanñataqmi pachakuqku llakisqa kaspanku.
Hebreo rimaypiqa nichkan: “Seolpiqa”, nispam. Qaway kay palabrapa ima ninan kasqanta.