Leeqkunapa tapukuyninkuna

Sichu huk warmi wañusqataña wachakuruptinqa, ¿hamuq tiempopi chay wawa kawsarimunqachu?

Chayna llakipi tarikuq tayta-mamapa sentimientontaqa, manachá pipas chaynapi mana tarikuspaqa entiendenmanchu. Wakinkuqa manamá chaytaqa qonqaytapas atinkuchu. Huk cristianam pichqa kutikama wañusqatakama wachakurqa. Tiempopa risqanman hina iskay wawankuna kachkaptinpas, yuyarqam sapakama wawankuna wañusqa nacesqanta. Wañukunankamam payqa yacharqa sapakama wawankuna kawsaspaqa hayka watayoq kanankuta. Chayna llakipi tarikuq tayta-mamakunaqa, ¿suyanmankuchu wañusqa naceq wawanku hamuq tiempopi kawsarimunankuta?

Manam yachanchikchu. Chaymantapas, Bibliaqa manam sutillatachu yachachin manaraq nacechkaspa wañukuq wawacha kawsarimunanmantaqa. Ichaqa Bibliapim tarinchik kaykunawan tupaq wakin yachachikuykunata, chaykunam sonqonchikta tiyachinman.

Manaraq kaykunamanta rimachkaspa puntataraq yachasunchik iskay tapukuykunamanta: vidanchikqa haykapitaq Jehová Diospaqqa qallarin, ¿nacesqanchik punchawmantachu, icha mamanchikpa wiksanpi chayllaraq rikurisqanchikmantachu? Chaymantapas, ¿imaynatataq Jehová Dios qawan manaraq naceq wawata: runata hinachu, icha manachu? Bibliapi Jehová Diospa yachachiwasqanchikqa yanapawanchikmi kay tapukuykunata kutichinapaq.

Moisespa chaskisqan Kamachikuykunapa nisqanman hinaqa vidanchikqa qallarin manaraq nacechkaptinchikmi. Chaymi manaraq naceq wawata wañuchiqqa wañuywan castigasqa kanman. Chay Kamachikuymi nirqa: “Vidanmantam vidanwan paganqa”, nispa (Exo. 21:22, 23, NM). * Chaynaqa mamanpa wiksanpi kaq wawaqa kawsaq runañam. Kay yachachikuymi achka cristianakunata yanapan mana abortanankupaq, abortayqa Diospa contranpi hatun hucham.

Qawasqanchikman hinaqa, vidanchikqa qallarin mamanchikpa wiksanpi chayllaraq rikurisqanchikmantapacham. Hinaptinqa, ¿mayna valorniyoqtaq kanman Jehová Diospaq manaraq naceq wawaqa? Qawamusqanchikman hinaqa manaraq naceq wawata wañuchiqqa vidanwanmi paganan. Hinaptinqa, manaraq naceq wawapa vidanqa Jehová Diospaqmi ancha valorniyoq karqa. Chaymantapas achka textokunapim qawachin valorniyoq kasqanta. Rey Davidpas Diostam kaynata nirqa: “Qanmi mamaypa wiksanpi wiñachiwarqanki [. . .]. Sulluchallaraq kachkaptiymi rikuwarqankiña ñoqataqa”, nispa (Sal. 139:13-16; Job 31:14, 15).

Jehová Diosqa yachantaqmi manaraq naceq wawakuna imayna kasqanta hinaspa imakuna ruray atisqantapas. Ejemplopaq, Isaacpa warmin Rebecam Jacobtawan Esauta wiksayakururqa, hinaptinmi wiksanpi peleayta qallaykurqaku. Chaymi Jehová Diosqa kay wawakuna imayna kanankumanta nirqa, Diosqa qawarqamá kay wawakunapa imayna kasqanku hamuq tiempopi imakunaman apananmanta (Gen. 25:22, 23; Rom. 9:10-13).

Bautizaq Juanmantapas Bibliaqa willawanchikmi. Paymi wiksallapiraq kachkaspan kuyurirurqa Mariapa rimaykusqanta maman Elizabet uyariruptillan (Luc. 1:41). Kay textopim Bibliata qellqaq Lucasqa servichikurqa griego rimaypi huk palabrata, chay palabraqa kanmanmi manaraq naceq wawamanta rimanapaq hinaspa chayllaraq naceq wawamanta rimanapaqpas.  Chay palabratam Lucasqa servichikurqa Jesus chayllaraq naceruptin (Luc. 2:12, 16; 18:15).

Hinaptinqa, Jehová Diospaqqa manaraq naceq wawaqa chaynallam nacesqa wawawanqa. Chaymantapas kayqa tupanmi yachayniyoq runakunapa nisqankuwanpas. Paykunam ninku manaraq naceq wawaqa tayta-mamanpa rimapayasqanta uyarisqankuta hinaspa sientesqankutapas. Chaychá mamakunaqa llumpayta kuyanku manaraq naceq wawachankutaqa.

Chaymantapas sapakama warmikunapa wawankuta onqokusqankuqa manam chaynallachu. Piensasunchik kaypi: huk warmipam manaraq tiemponpi wachakusqan wawachan iskay-kimsa punchawllamanta wañukun. Huk warmipañataqmi tiemponpi onqokuchkaptinpas wawachanqa wañusqaña nacerun. ¿Allinchu kanman kay iskaynin warmikunamanta punta kaq warmilla wawachan kawsarimunanta suyasqanqa?

Hinaptinqa, Bibliaqa sutillatam yachachin mamanchikpa wiksanpi chayllaraq rikurisqanchikmantapacha vidanchik qallarisqanmanta, chaymi Jehová Diosqa manaraq naceq wawataqa runata hinaña qawan. Biblia kaynata yachachiwasqanchikraykum wakin cristianokunaqa piensanmanku manaraq nacechkaspa wañuq wawakuna kawsarimunankuta. Chaymantapas ninmankutaqmi abortayqa mana hucha kasqanmanta.

Pasaq watakunapim, kay revistaqa tapukuykunawan piensachirqa manaraq nacechkaspa wañukuq wawakuna mana kawsarimunankupaq hina kasqanmanta. Huk kaqnin tapukuymi nirqa sichu paraisopi sulluchallaraq wawata mamanpa wiksanman Dios churananmanta. Chayna kaptinpas Jehová Diospa Llaqtanpi Punta Apaqkunam anchata estudiaspanku, yuyaymanaspanku hinaspa Diosta mañakuspanku tantearunku kaykunamanta allin suyakuyniyoq kanapaq. Jesusmi nirqa: “Diospaqa tukuymi atinallan”, nispa (Mar. 10:27). Jesuspa imayna nacesqanmi chayta qawachiwanchik, paymi hanaq pachamanta Mariapa wiksanman churasqa karqa, chayqa mana creenapaq hinam runakunapaqqa kanman.

Hinaptinqa, ¿kawsarimunqakuchu manaraq nacechkaspa wañuq wawakuna? Bibliaqa manamá sutillatachu nin chay wawakuna kawsarimunankumantaqa, chaymi mana nichwanchu kawsarimunqakupunim nispaqa. Kay yachachikuymantaqa achka tapukuykunam rikurinman, chaymi mana nichwanchu kaynam otaq waknam kanqa nispaqa. Ichaqa yachanchikmi kaymantaqa Jehová Dioslla yachasqanta, payqa anchatam kuyawanchik hinaspa llakipayawanchikpas (Sal. 86:15). Arí, wañuypa tukuy ima ñakariy apamusqantam, Jehová Diosqa chinkachinqa wañuqkunata kawsarichispan (Job 14:14, 15). Payqa imapipas allin kaqtam ruranqa. Tukuy ñakarisqanchikkunatam payqa chinkachinqa, chaypaqmi Churin Jesucristota churarqa ‘Diablopa rurasqankunamanta libraykuwananchikpaq’ (1 Juan 3:8).

[Willakuy]

[13 kaq paginapi dibujo]

Jehová Diosqa tukuy ñakarichiwaqninchikkunatam chinkachinqa