Diosta mañakusqankumanta achka musu-sipaskunata tapuptinkum yaqa llapanku nirqaku mañakusqankuta, ichaqa wakillankum nirqaku sapa punchaw mañakusqankutaqa. Wakinkuqa tapukunkupaschá: “¿Diostaqa mañakunay llakisqa kaspay sunquyta tiyaykachinallaypaqchu?”, nispa.

•  ¿Imataq Diosta mañakuyqa?

•  ¿Chiqaptachu Diosqa uyariwanman?

•  ¿Imakunamantataq Diosta mañakuyman?

•  Wakin musu-sipaskunam ninku

 Diosta mañakuspaqa tukuy ima unanchaq taytanchik Jehova Dioswanmi parlachkanchik. Taytanchik Jehova Diosqa ancha-ancha atiyniyuq kaspanpas “manam llumpay karupichu ñuqanchikmantaqa kachkan” (Hechos 17:27). Chaymi palabrantakama lliwchanchikta niwanchik: ‘Asuykamuwaptikichikqa ñuqapas asuykamusaykichikmi’, nispa (Santiago 4:8).

 ¿Imaynatataq taytanchik Jehova Diosman asuykuchwan?

•   Mañakuspam. Mañakuspanchikmi paywan rimachkanchik.

•   Bibliata ñawinchaspam. Chaynintakamam Diosqa rimapayawanchik.

   Diosta mañakuyqa hinaspa bibliata ñawinchayqa yanapawasunmi Diosta astawan kuyanapaq.

 Jeremim nin: “Mañakuspaqa tukuy atiyniyuq Dioswanmi rimanchik chayqa ancha kusikunapaqmi”, nispa.

 Mirandam nin: “Taytanchik Jehova Diosmanqa mana manchakuspaymi tukuy imata willakuni, chayqa yanapawanmi yapapipas mana recelaspay mañakunaypaq”, nispa.

 Dios kasqanmanta mana iskayrayaspaykipas hinaspa payta mañakuspaykipas ichapas tapukunki: “¿Diosqa mañakusqayta uyariwachkanchu?”, nispa. Bibliam ichaqa niwanchik Diosqa mañakusqanchikta uyarisqanmanta (Salmos 65:2, Chuya Qellqa, CQ). Bibliaqa niwanchiktaqmi tukuy llakinchikkunata Diosman willakunapaq ¿imanasqa? Taytanchik Jehova ñuqanchikmanta nanachikusqanraykum (1 Pedro 5:7).

 Kayta nisqayki: ¿Sapa kutichu amistadnikikunawan rimanki? Chaynatam sapa kuti taytanchik Jehova Dioswanpas rimawaq. Payta rimapayaspaykiqa sutinmanta rimapayay (Salmos 86:5-7; 88:9, CQ). Bibliapipas ninmi: “Diostayá tukuy tiempo mañakuychik”, nispa (1 Tesalonicenses 5:17).

 Moisespas ninmi: “Tayta Diosta mañakuspayqa taytaywan hinam rimani, chaymi sunqumanta tukuy imata willakuni”, nispa.

 Karenpas ninmi: “Ñuqaqa Jehova Diosta mañakuspayqa tukuy ima kusichiwasqanmantam willakuni mamaymanpas, amistadniymanpas willakuchkayman hina”, nispa.

 Bibliapim nin: “Diosmanyá lliwta willakuychik tukuy tiempo mañakuspaykichik, ruegakuspaykichik hinaspa graciasta quspaykichik”, nispa (Filipenses 4:6).

 Chaynaqa, ¿tukuy llakinchikkunamantapas Diosmanqa willakuchwanchu? ¡Arí! Kikin bibliapim niwanchik: “Tayta Diosman sasachakuynikikunata saqiykuy, paymi yanapasunki”, nispa (Salmos 55:22, CQ).

 Ichaqa manam allinchu kanman sasachakuyllaykimanta tayta Diosman willakuynikiqa. Chantel sutiyuq sipasmi nin: “Manam allinchu kanman sapa kuti sasachakuyniypi yanapawanallanpaq Diosta mañakuyniyqa”, nispa. Payqa ninraqmi: “Mañakuspaqa taytanchik Jehovatam puntata agradecekunanchik, imakunamanta agradecekunapaqqa achka-achkam kachkan”, nispa.

 Kayta nisqayki: ¿Imakunamantataq Diosta agradecekuwaq? Kunan punchaw imakunata Dios ruwapususqaykimantam agradecekuwaq.

 Anitam nin: “Chay punchaw sumaq waytacha qawasqallaykimantapas Diostam agradecekuwaq”, nispa.

 Brayanpas ninmi: “Yuyaymanay bibliapi huk kaqnin kallpanchasuqniki yachachikuypi utaq Diospa imapas unanchasqanpi hinaspa chaymanta Diosman graciasta quy”, nispa.