Ri carta xtaq bʼi che ri Tito 3:1-15

  • Kinimaxik ri qʼatal taq tzij y ri kʼo taqanik pa kiqʼabʼ (1-3)

  • Ubʼanik utz taq chak (4-8)

  • Kanim ta awibʼ pa chʼaʼoj y cheʼaxutuj ri kkikʼut ta ri qastzij (9-11)

  • Ri rajawaxik kubʼan ri Tito y ri e kʼisbʼal taq utzij ri Pablo (12-15)

3  Amaqʼel chanaʼtasaj chke ri qachalal che rajawaxik kkiya kibʼ pa taqik y che keniman chke ri qʼatal taq tzij xuqujeʼ chke konojel ri winaq ri kʼo taqanik pa kiqʼabʼ. Y rajawaxik kkibʼan ronojel uwach utz taq chak, 2  kekiyoqʼ ta ri e nikʼaj chik, xaq ta kkiyak chʼaʼoj, kkikoj ta kichuqʼabʼ rech xaq xiw kbʼan ri kkaj e areʼ y rajawaxik amaqʼel kkikʼut utzilal chke konojel ri winaq. 3  Ojer kanoq ri oj xuqujeʼ xqata ta chʼabʼexik, xojniman taj, xqabʼan ri xraj ri qa cuerpo, xqabʼan kʼi itzelal pa qakʼaslemal, xqanaʼ titikil, itzel qabʼantajik xuqujeʼ itzel xqil taq qibʼ. 4  Pero ri Dios xukʼut ri rutzilal y xukʼutu che sibʼalaj keraj ri winaq 5  are chiʼ xojubʼan salvar. Pero xa ta rumal jun utzalaj chak xqabʼano xaneʼ rumal che xutoqʼobʼisaj qawach. Xubʼan chʼajchʼoj chqe y xuya qakʼaslemal, y rumal ri espíritu santo jetaneʼ xubʼan kʼakʼ chqe. 6  Ri areʼ xukoj ri Jesucristo, ri xojbʼanow salvar, rech xuya ri u espíritu santo chqe. 7  Xubʼan wariʼ rech ri oj kojkowinik kqariq ri kʼaslemal kʼo ta ukʼisik che ubʼim kuya na chqe. Y rumal ri nimalaj rutzilal kojkowinik kqariq ri kʼaslemal y kojux utz taq winaq chuwach. 8  Ri xinbʼij kuyaʼ kkubʼsax kʼuʼx chrij, y kwaj che amaqʼel kanaʼtasaj wariʼ chke ri kekojon chrij ri Dios rech kkiya ta kan ubʼanik utz taq chak. Rumal che nim keʼutoʼ wi ri winaq y kuya utzilal chke. 9  Kanim ta awibʼ pa chʼaʼoj, xaq ta katqaj che utzukuxik jawiʼ e petinaq wi ri familias y katchʼojin taj we knimax ri Ley* o knimax taj, rumal che wariʼ kʼo ta kipatan, ni kʼo ta utzilal kuya chawe. 10  We kʼo jun winaq are ta kukʼut ri qastzij y jun chi wi ri kukʼutu, y kamul abʼim chi che che utz ta ri tajin kubʼano, chaxutuj ri winaq riʼ. 11  Rumal che ri winaq riʼ xel kan pa ri sukʼalaj bʼe y tajin kmakunik, rumal laʼ areʼ xtzukun chrij ri kuriq na. 12  Are chiʼ kintaq bʼi ri Ártemas o ri Tíquico awukʼ, chakojoʼ achuqʼabʼ rech katbʼe che wilik pa Nicópolis rumal che chilaʼ kwaj kinqʼaxej wi ri qʼalaj. 13  Chayaʼ bʼi che ri Zenas, ri kʼo nim retaʼmabʼal chrij ri Ley, y ri Apolos ronojel ri kajwataj chke pa ri ki viaje. 14  Rech ri qachalal kkilo che rajawaxik kkitoʼlaʼ kibʼ are chiʼ kʼo kajwataj chke, rukʼ wariʼ kkibʼan utzalaj taq chak. 15  Konojel ri qachalal che e kʼo wukʼ kkitaq bʼi a saludos, xuqujeʼ chayaʼ ki saludos ri qachalal che sibʼalaj kojkaj. Chkʼol bʼaʼ ri nimalaj rutzilal ri Dios iwukʼ iwonojel.

Notas

Copyrights for this publication