Ri carta xtaq bʼi che ri Tito 2:1-15
2 Pero ri at Tito mayaʼ kan ukʼutik ri qastzij.
2 Ri achijabʼ che nim chi kijunabʼ rajawaxik qas kkil na ri kkibʼano, rajawaxik kkikʼutu che kuya kkubʼsax kʼuʼx chkij, kkʼojiʼ jun utz kichomanik, e utz pa ri kikojonik chrij ri Dios, keloqʼoqʼenik y kkichʼij ri kʼax.
3 Xuqujeʼ ri ixoqibʼ che nim chi kijunabʼ rajawaxik nim kkil wi ri Dios, xaq ta kkimol tzij chkij nikʼaj chik, xaq ta kkitij vino xaneʼ chkikʼutuʼ ubʼanik ri utz,
4 rukʼ wariʼ kekowinik kkiya pixabʼ chke ri ixoqibʼ che kʼa majaʼ na kijunabʼ rech ri e areʼ kekiloqʼoqʼej ri kachajil y ri e kal,
5 kkʼojiʼ jun utz kichomanik, chʼajchʼoj ri kikʼaslemal, qas kkilij ri kachoch, e utz taq ixoqibʼ y qas keniman che ri kachajil, jeriʼ kyoqʼ ta ri utzij ri Dios rumal kech.
6 Xuqujeʼ cheʼapixbʼej ri achijabʼ ri kʼa majaʼ kijunabʼ rech kkʼojiʼ jun utz kichomanik,
7 y ri at rajawaxik katux jun utz ejemplo pa ronojel ri kabʼano.
8 Chatok il che ukʼutik ri qastzij y chakojoʼ utz taq tzij rech kʼo ta nijun katyoqʼowik, jeriʼ ri qakʼulel kel kikʼixbʼal rumal che kʼo ta jun itzel jastaq kkiriq chqij.
9 Ri esclavos rajawaxik kkinimaj ronojel ri kkibʼij ri kajaw chke, kkibʼan ri utz kkilo, itzel ta kechʼaw chke
10 y keʼelaqʼ taj. Xaneʼ rajawaxik kkikʼutu che kuya kkubʼsax kʼuʼx chkij rech jeriʼ rukʼ ri kibʼantajik kkibʼan más jeʼlik che ri etaʼmabʼal ri petinaq rukʼ ri Dios, ri xojbʼanow salvar.
11 Ri Dios xukʼut ri nimalaj rutzilal are chiʼ xubʼano che ronojel kiwach winaq kekowinik kkiriq ri salvación.
12 Rukʼ wariʼ kqilo che rajawaxik kqaxutuj ri man utz ta kril ri Dios, ri itzel taq rayinik y rajawaxik kkʼojiʼ jun utz qachomanik, kqabʼan ri utz y kqakoj qachuqʼabʼ che upatanexik ri Dios pa taq ri e qʼij riʼ
13 are taq qeyeʼm ri qʼij che ri nimalaj qa Dios kubʼan ri ubʼim chqe y kuqʼalajisaj ri nimalaj u poder areʼ xuqujeʼ ri u poder ri Jesucristo, ri xojbʼanow salvar.
14 Ri Jesús xuya ri ukʼaslemal pa qawiʼ rech xojresaj pa ronojel uwach itzelal, xubʼan jun chʼajchʼojalaj tinamit chqe, xojux rech y rukʼ wariʼ kqabʼan utzalaj taq chak.
15 Maya kan utzijoxik ri xinbʼij chawe, chayaʼ kichuqʼabʼ ri e nikʼaj chik y chakojoʼ ri taqanik che kʼo pa aqʼabʼ rech keʼapixbʼej. Maya bʼe che nim ta katilik.
