Ri carta xtaq bʼi che ri Tito 1:1-16
1 In, in Pablo in upatanel ri Dios y rapóstol ri Cristo Jesús, kinkubʼsaj nukʼuʼx chrij ri Dios. Ri wetaʼmabʼal chrij ri qastzij junam kukʼ ri kech ri e chaʼom, rumal laʼ junam kqapatanij y kqaqʼijilaj ri Dios junam rukʼ ri kraj areʼ.
2 Kojkowinik kqabʼan wariʼ rumal che ri Dios ojer loq ubʼim che kuya na jun kʼaslemal kʼo ta ukʼisik chqe y qas qetaʼm che ri Dios kʼo ta jumul kubʼan molom tzij
3 (pero are chiʼ xopan ri tiempo, ri qa Dios, ri qa Salvador xinukoj che utzijoxik ri utzij, jeriʼ xetaʼmax chrij).
4 Ri at Tito, ri loqʼalaj nukʼojol, ri junam kojkojon chrij ri Dios awukʼ, kintzʼibʼaj bʼi wariʼ chawe:
Chkʼol bʼaʼ awukʼ ri nimalaj rutzilal y ri ujamaril ri Dios, ri Qatat, y ri Cristo Jesús, ri xojbʼanow salvar.
5 Xatinyaʼ kan pa Creta rech kasukʼumaj ri utz taj che tajin kbʼan chilaʼ y rech keʼakoj jujun kʼamal taq bʼe pa taq ri congregaciones re ri tinamit, pero rajawaxik kabʼan ri nubʼim chi chawe are chiʼ keʼachaʼo:
6 ri kʼamal bʼe rajawaxik utz kubʼan pa ri ukʼaslemal rech kʼo ta jun itzel jastaq kbʼix chrij, rajawaxik xa jun ri rixoqil, e kojonelabʼ ri e ralkʼwal, kenimanik y kʼo ta jun itzel jastaq kriqitaj chkij.
7 Rumal che ri e kʼamal bʼe e kojom che rilixik ri jastaq re ri Dios, rumal laʼ rajawaxik kʼo ta jun itzel jastaq kriqitaj chkij, kkita chʼabʼexik, aninaq taj kpe koyowal, keqʼabʼar taj, kechʼayan taj, ni kkibʼan ta engaño rech kkichʼak pwaq.
8 Xaneʼ rajawaxik kesipanik, utz kkilo kkibʼan ri utz, kkʼojiʼ jun utz kichomanik, keʼux utz chuwach ri Dios y kkiya ta kan upatanexik xuqujeʼ kekowinik kkiqʼil kibʼ.
9 Ri kʼamal taq bʼe xuqujeʼ rajawaxik are kkikoj ri Utzij ri Dios are chiʼ kekitijoj ri nikʼaj chik, jeriʼ kekowinik kkiya kichuqʼabʼ ri qachalal rukʼ ri utzalaj taq tzij riʼ y kekowinik kkibʼij chke ri nikʼaj chik che utz ta ri tajin kkibʼano rumal che tajin kkikʼex ri qastzij.
10 Rumal che e kʼo kʼi achijabʼ che kkita ta chʼabʼexik y kkaj wi na kbʼan ri circuncisión* xaq kkitzukuj ri kkibʼij y kekibʼan engañar ri e nikʼaj chik.
11 Rajawaxik ktzʼapix upakichiʼ ri achijabʼ riʼ rumal che ri e areʼ kkikʼut molom taq tzij chkiwach ri winaq y umak kech ri familias kkiya kan ri Dios. Y rumal ri engaño kkibʼano kkichʼak pwaq.
12 Y jun chke ri ki profeta xubʼij wariʼ: «Konojel ri aj Creta amaqʼel kkimol tzij, e chikop taq winaq, e saqʼoribʼ y e wiʼj* taq winaq».
13 Qatzij wi ri xinbʼij, rumal laʼ maya kan kipixbʼexik ri winaq riʼ y ko cheʼachʼabʼej rech qas kekojon chrij ri Dios y kkikubʼsaj kikʼuʼx chrij.
14 Y chabʼij chke che kkitatabʼej ta ri kkitzijoj ri judíos rumal che xaq kichomanik e areʼ, xuqujeʼ kkibʼan ta ri ketaqan wi rumal che ri winaq riʼ xkiya kan upatanexik ri Dios.
15 Ri winaq che chʼajchʼoj ri kikʼaslemal ronojel ri jastaq chʼajchʼoj chkiwach, ri kekojon ta chrij ri Dios kʼo ta jun jastaq chʼajchʼoj chkiwach rumal che chʼajchʼoj ta ri kichomanik y ri kanimaʼ.*
16 Kkibʼij che ketaʼm uwach ri Dios pero rukʼ ri kkibʼano kkikʼutu che ketaʼm ta uwach, kʼo ta nijun utz chak taqal chke kkibʼano rumal che e itzel taq winaq y keniman taj.
Notas
^ Chawilaʼ ri diccionario.
^ Pa nikʼaj chi lugar jewaʼ kbʼix che: «e mun».
^ O «ri ki conciencia».
