1. Pwehki kitail kapikipikda rasehng Koht, soangen koahiek dah me kitail ahneki?

 MA MWEKID en seri men kin duwehte eh pahpao, me tohto kin nda, “Serio duwehte eh pahpao.” Met pwehki seri koaros kin sohsohki soangen irair kan me eh pahpa de nohno ahneki. Samatail nanleng, Siohwa, iei utupen mour koaros. (Mel. 36:9) Pwehki kitail sapwellime seri kan, kitail duwehte ih ni ahl tohto. Kitail kapikipikda “rasehng” ih, kahrehda kitail ahneki koahiek en medewe duwen soahng kan, wiahda pilipil kan oh wiahda kompoakpatail keren kan.​—Sen. 1:26.

2. Dahme kahrehda kitail kak wiahki Siohwa Kompoakpatail me keieu mwahu?

² Siohwa kak ketin wia kompoakpatail me keieu mwahu. Soangen nanpwungmwahu wet kak mie pwehki Koht ketin poakohng kitail oh pil pwehki kitail pwoson ih oh sapwellime Ohl. Sises mahsanih: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Mie aramas tohto me kin ahneki nanpwungmwahu keren rehn Siohwa. Kitail pahn sukuhlki duwen meh riemen.

3, 4. Dahme kahrehda ahn Eipraam eh nanpwungmwahu rehn Siohwa weksang ahn mehn Israel ko arail nanpwungmwahu rehn Koht?

³ Siohwa ketin mahsanihki semen mehn Israel kan  “kompoakepahi Eipraam.” (Ais. 41:8) Dahme kahrehda Eipraam kak ahneki nanpwungmwahu keren wet rehn Sounkapikpe? Pwehki ahn Eipraam pwoson laud.​—Sen. 15:6; wadek Seims 2:21-23.

⁴ Kadaudok en Eipraam kan me wiahla wehin Israel mahs pil wiahki Siohwa Samarail oh Kompoakparail. Ahpw e kansensuwed me mwuhr re sohla ahneki nanpwungmwahu wet rehn Koht. Dahme kahrehda? Pwehki re sohla pwoson sapwellimen Siohwa inou kan.

5, 6. (a) Ia duwen Siohwa eh ketin wiahla kompoakepahmw? (b) Peidek dah kan me kitail en idek rehtail?

⁵ Ni omw kalaudehla omw esehla duwen Siohwa, omw pwoson ih pahn kehlailla oh omw limpoak ong ih pahn pil laudla. Medewehla ahnsowo me ke tepin sukuhlki me Koht uhdahn ketin mie oh me ke kak wiahla kompoakepah keren men. Ke sukuhlki me kitail koaros sohsohki dihp pwehki Adam eh sapeik. Ke pil wehwehkihda me tohnsampah kin dohsang Koht. (Kol. 1:21) Ahpw mwuhr ke esehda me Samatail limpoak nanleng kin ketin karanih oh pil nsenohkin kitail. Ni atail sukuhlki me Siohwa ketin meirongkihla sapwellime Ohlo oh kitail tepida pwosonla meirongo, kitail tepida kakairada nanpwungmwahu rehn Koht.

⁶ Ni atail kin medewehla ia duwen atail esehla Siohwa, kitail anahne idek rehtail: ‘I kin nantihong kamwahwihala ei nanpwungmwahu rehn Koht? Ei likih Siohwa kin kehlail oh ei limpoak ong ih kin kekeirda rahn koaros?’ Emen kompoakepahn Koht me keren iei Kidion. Met kitail pahn sukuhlki duwen ih pwe kitail en kak idawehn eh mehn kahlemeng.

7-9. (a) Wiewia kapwuriamwei dahieu me wiawihong Kidion, oh ia imwilahn met? (Menlau kilang tepin kilel.) (b) Ia duwen atail kak wia kompoakepahn Koht?

⁷ Sounkopwung Kidion kin papah Siohwa erein ahnsou apwal ehu mwurin mehn Israel kan pedolong nan Sapwen Inou. Mehn Midian ko mahweniongehr irail oh wia kahpwal ehu ong mehn Israel ko. Pwehki met, Kidion sohte wia eh doadoahk en koakoahk wahn pilawa liki nan eh mwahto, ahpw e wia met nan wasahn tiak wain pwehn kak mwadang ekihla wahn pilawa ko. Pwuhken Sounkopwung irelaud 6 mahsanih me sapwellimen Siohwa tohnleng men pwarek Kidion nan Opra. Kidion pwuriamweikihla ahn tohnlengo pwarek ih oh kahdaneki ih “ohl kommwad emen.” Mendahki Siohwa ketin kapitala mehn Israel kan sang Isip, Kidion peikasalki ma E pahn ketin sewese irail met. Tohnlengo wiliandi Siohwa oh kamehlelehiong Kidion me Koht pahn ketin sewese ih.

⁸ Kidion medemedewe ia duwen eh pahn kak “kapitala Israel sang rehn mehn Midian akan.” Siohwa ketin sapengala ni sansal: “Ke kak wia met, pwehki I pahn seweseiuk. Omw pahn kalowehdi mehn Midian akan pahn mengeiong uhk, re pahn rasehng aramastehmen.” (Sounkopwung 6:11-16) Pwehki Kidion mwein medemedewe ia duwen met eh kak wiawi, e peki kilel ehu sang rehn Koht. Tehk me ni ara koasoakoasoipene, Kidion sohte ekis peikasalki ma Koht uhdahn ketin mie de soh.

⁹ Dahme wiawi mwuhr kalaudehla ahn Kidion pwoson oh eh karanihala Koht. Kidion kaunopada mwenge oh kihong tohnlengo. Ni manaman ehu, tohnlengo isikala mwengeo ni eh sairki nah sokono. Ni Kidion esehda me tohnlengo uhdahn kohsang rehn Koht, e masepwehkada. Kidion nda: “Maing KAUN, Wasa Lapalap! I patohwanehr silangin sapwellimomwi tohnleng!” (Sounkopwung 6:17-22) Ia duwe, dahme wiawio kauwehla ahn Kidion nanpwungmwahu rehn Siohwa? Uhdahn soh! Kidion pehm me e ahneki popohl rehn Koht. Kitail ese met pwehki pei sarawi me Kidion wiahdao adaneki “Siohwa-shalom,” me wehwehki ni lokaiahn Ipru “Siohwa iei Popohl.” (Sounkopwung 6:23, 24, NW) Ma kitail doudouloale dahme Siohwa kin ketin wiahiong kitail rahn koaros, kitail pahn pohnese me e uhdahn wia Kompoakpatail mehlel. Ni atail kin kalapw kapakap ong Siohwa, met pahn kalaudehla popohl me kitail ahneki reh oh atail nanpwungmwahu reh pahn pil kehlailla.

10. Nin duwen Melkahka 15:3, 5 kasalehda, soangen irair dah kan me Siohwa kupwurki sang irail me men wiahla kompoakepah?

¹⁰ Pwe Siohwa en ketin wiahla Kompoakpatail, kitail anahne ahneki soangen irair kan me e ketin kupwurki. Nan Melkahka irelaud 15, Depit koulki duwen dahme kitail en wia pwehn kak patohlong nan tehnpas en Siohwa, me wehwehki en wia kompoakepahn Koht. (Mel. 15:1) Kitail pahn tehkpene irair riau me anahn. Keieu, kitail en kaleke kitail sang karaunlikamw oh keriau, kitail en kin mehlel. Depit ndahki soangen aramas me Siohwa kin ketin kupwurki kompoakepahnki. Aramaso “sohte kin karaunmwahlih meteikan . . . oh e pil sohte pahn wia sounkadehde likamw ong emen me sohte dipe pwe en ale pweine.”​—Mel. 15:3, 5.

11. Dahme kahrehda kitail en kaleke kitail sang karaunlikamw?

¹¹ Nan pil ehu melkahka, Depit kihda mehn kataman wet: “Kumwail dehr lokaia suwed.” (Mel. 34:13) Ma kitail pohnsehsehla kaweid wet, e pahn kauwehla atail nanpwungmwahu rehn Samatail nanleng. Ni mehlel, karaunlikamw iei kilel en Sehdan me Tepil, me wia sapwellimen Siohwa imwintihti lapalap. Lepin lokaia wet “Tepil” kohsang lokaiahn Krihk me wehwehki “soun karaunlikamw.” Ma kitail kin kanahieng dahme kitail ndaiong meteikan oh dahme kitail kin ndahki irail, met pahn sewese kitail en mihmi karanih Siohwa. Kitail anahne uhdahn kanahieng atail madamadau duwen riatail brother kan me Koht ketin idihada pwehn tiengla mwowe nan mwomwohdiso.​—Wadek Ipru 13:17; 1 Deselonika 5:12.

12, 13. (a) Dahme kahrehda kitail en kin mehlel ni soahng koaros? (b) Ia imwilahn atail kin mehlel?

¹² Aramas kin esehki sapwellimen Siohwa ladu kan nin duwen aramas mehlel kei. Wahnpoaron Pohl ntingihedi: “Kumwail woneweite kapakapkin kiht. Se pepehm me nan kapehdit me uhdahn mwakelekel, pwehki at kin men wia dahme pwung ahnsou koaros.” (Ipru 13:18) Pwehki kitail koasoanehdi teng kitail en “wia dahme pwung ahnsou koaros,” kitail kin kaleke kitail sang pitih riatail Kristian kan. Karasepe, ma irail doadoahk ong kitail, kitail kin tehk mwahu me atail wiewia ong irail kin pahrek oh kin pwain irail nin duwen me kitail pwungkipene. Nin duwen Kristian kei, kitail kin mehleliong neitail tohndoadoahk kan oh pil meteikan koaros. Oh ma kitail kin doadoahk ong riatail Kristian men, atail wiewia kan anahne pahrek oh kitail en dehr kasik me irail en wia mwahu ong kitail laudsang meteikan.

¹³ Aramas akan kin kalapw kapinga Sounkadehdehn Siohwa kan pwehki arail kin mehlel. Karasepe, emen kaun en pesines laud ehu kilang me Sounkadehdehn Siohwa kan kin kapwaiada dahme re inoukihda, oh e nda, “Kumwail kin ahnsou koaros lelepek ong dahme kumwail koasoanehdier en wia.” (Mel. 15:4) Soangen mehlel wet kin sewese kitail en wiahkihte Siohwa Kompoakpatail oh wahdo kaping ong Samatail limpoak nanleng.

14, 15. Nan atail doadoahk en kalohk, ia duwen atail kak sewese meteikan ren wiahla kompoakepahn Siohwa?

¹⁴ Mendahki aramas akan me kitail tuhwong nan kalohk kin kamehlele me mie Koht, me tohto sohte kin kilangwohng ih nin duwen Kompoakparail me keieu mwahu. Ia duwen atail kak sewese irail? Tehk duwen kaweid me Sises ketikihong ekei sapwellime tohnpadahk kan ni eh ketin poaroneirailla wad riemen pwe ren kalohk: “Ni amwail pahn kin lel ni kahnimw ehu, kumwail pahn kin nda, ‘Popohl ong tehnpas wet.’ A ma aramas en popohl emen mie nan tehnpaso, amwail popohl pahn mihla reh; a ma sohte, e pahn pwurodohng kumwail.” (Luk 10:5, 6) Aramas akan ele pahn men rong duwen padahk mehlel ma kitail kin kadek ong irail. Ma kitail kin kadek ong irail kan me lingeringerda oh uhwongada kitail, met ele pahn sewese irail ren  meleileidi, oh mwein re pahn men rong duwen padahk mehlel ehu ahnsou mwuhr.

¹⁵ Ni atail kin tuhwong aramas akan me kin uhdahn poadidiong arail pelien kaudok de me kin iang tiahk kan en pelien lamalam likamw, kitail en pousehlahte kasalehda kadek oh popohl. Ni kadek, kitail kin kasamwo irail ong atail mihting kan, ahpw mehlel irail me kin tihwohkihla irair en sampah rahnwet oh me men sukuhlki duwen Kohto me kitail kin kaudokiong. Kahn Iroir kin koasoiahda karasaras tohto duwen soangen aramas duwehte met pahn oaralap “Paipel Kin Wekidala Mouren Aramas.”

16. Ia duwen atail kak wia kompoakepahn Siohwa oh pil “tohndoadoahk kei me kin iang Koht ketin wiewia sapwellime doadoahk”?

¹⁶ Aramas akan me kin doadoahkpene kin kalapw wiahla kompoakepah keren kei. Koaros me inoukihong Siohwa arail mour sohte kin wiahte kompoakepah ahpw re pil wiahla ‘tohndoadoahk kei me kin iang ih ketin wiewia sapwellime doadoahk.’ (Wadek 1 Korint 3:9.) Ni atail kin kalohk oh katohnpadahk, e kin kalaudehla atail esehla irair kaselel kan me Samatail nanleng ketin sapwellimaniki. Kitail kin kilang duwen sapwellime manaman eh kin sewese kitail kalohki rongamwahwo.

17. Ia duwen atail mihting tohrohr kan ar kasalehiong kitail me Siohwa iei Kompoakpatail?

¹⁷ Ni atail kin kihong ahnsou laud nan kalohk, kitail kin pehm me kitail uhdahn karanihala Siohwa. Kitail kin kilang duwen Siohwa eh kin ketin irehdi soun uhwong kan arail nantihong kauhdi doadoahk en kalohk. Ni sansal, e kin ketin kaweid kitail oh kitail kin pwuriamweikihla mwomwen eh kin ketin pousehlahte padahki kitail nan atail mihting kan oh pil sang sawaspen Paipel kan. Ni atail mihting tohrohr kan, kitail kilang me Siohwa kin ketin mwahngih duwen atail kahpwal kan oh pil atail anahn akan. Mwurin peneinei ehu iang mihting tohrohr laud ehu, re ntingihedi: “Prokram en mihting tohrohro uhdahn sair at mohngiong. Se pehm uwen Siohwa eh kin ketin poakohng emenemen kitail oh kupwurki kitail en pweida.” Mwurin ara iang mihting tohrohr ehu nan Ireland, pwopwoud ehu sang Sehmen ntinglahng Ohpis en Sounkadehdehn Siohwa kan oh kasalehda ara kalahnganki brother oh sister ko arail kasamwo oh apwalih ira. Ira pil nda: “Ahpw se keieu kalahngankihong Siohwa oh Nanmwarki Sises Krais. Ira me ketin lukei kiht en iang kisehn sapwellimara pwihn me uhdahn kin miniminpene. Se sohte ihte koasoakoasoia duwen miniminpene, ahpw duwen at kin perenki iang pidada miniminpene wet rahn koaros. Dahme wiawihong kiht ni at iang mihting tohrohr wet nan Dublin pahn ahnsou koaros katamankihong kiht duwen pai kesempwal me se ahneki en iang kumwail koaros papah atail Koht lapalap.”

18. Dahme kitail anahne idek rehtail me pid atail kin koasoakoasoiong Siohwa?

¹⁸ Kompoakepah kan kin karanihala emenemen ni arail kin kapehse mwahu nanpwungarail. Rahnwet, aramas akan kin kalapw doadoahngki Internet oh text kan pwehn koasoiong meteikan. Ahpw ia duwen atail kak kapahrekihpene met ong atail kin koasoakoasoiong Kompoakpatail me keieu mwahu, Siohwa? Iei ih me kin ketin “sapeng pekipek kan” de kapakap kan. (Mel. 65:2) Ia duwe, kitail kin kalapw kihong ahnsou pwehn koasoiong ih?

19. Ma e apwal en kasalehda atail pepehm kan ong Siohwa, dahme kak sewese kitail?

¹⁹ Ekei sapwellimen Koht ladu kan kin apwalki kasalehda arail pepehm loal kan. Ahpw iei met me Siohwa ketin kupwurki kitail en wia ni atail kin kapakap. (Mel. 119:145; Koul Ked. 3:41) Ma e apwal ong kitail en doadoahngki lepin lokaia kan me pahn kawehwehda atail pepehm kan, mie sawas. Pohl ntinglahng Kristian kan nan Rom oh nda: “Ni atail kin sehse dahme kitail pahn anahne kapakapki duwen kahpwal, ahpw pein manamano kin peki kin kitail ni atail kin weirek oh sohte kak kasalehda. Ahpw ih me kin ketin kasawih mohngiong kan kin mwahngih wehwehn manamano, pwehki e kin pekipeki nin duwen kupwuren Koht ong me sarawi kan.” (Rom 8:26, 27, NW) Ni atail wadek pwuhken Paipel kan duwehte pwuhken Sohp, Melkahka oh Lepin Padahk, e kak kaweid kitail ong ia duwen atail pahn kasalehiong Siohwa atail pepehm loal kan.

20, 21. Mahsen en kamweit dahieu me Pohl kihong kitail nan Pilipai 4:6, 7?

²⁰ Ni atail lelohng kahpwal laud kan, kitail en tamataman dahme Pohl ndaiong Kristian kan nan Pilipai: “Kumwail dehr pwunodki mehkot, ahpw nan amwail kapakap akan kumwail en peki dahme kumwail kin anahne. Amwail kasapahlkalahngan en pil iang amwail kapakap ahnsou koaros.” Ni atail kapakap ong Siohwa ni ahl wet, kitail kak uhdahn nsenamwahula. Pohl ntingihedi: “Sapwellimen Koht popohl, me inenen laudsang uwen atail dehdehki, ahpw pahn nekinekid mohngiongimwail oh pil amwail lamalam rehn Krais Sises.” (Pil. 4:6, 7) Kitail en ahnsou koaros kalahnganki “sapwellimen Koht popohl” me inenen laud me kin uhdahn pere mohngiongitail oh atail lamalam.

²¹ Kapakap kin sewese kitail en kakairada atail nanpwungmwahu rehn Siohwa. Ihme kahrehda kitail en kin “poadidiong kapakap pil ahnsou koaros.” (1 Des. 5:17) Kitail en kin pousehlahte kakehlaka atail nanpwungmwahu rehn Koht oh wia dahme e ketin kupwurki sang kitail. Oh kitail en kihong ahnsou en medemedewe duwen kapai kan me kitail ahneki pwehki Siohwa iei uhdahn Samatail, atail Koht oh Kompoakpatail.