Ke Iangehr Kisehn Sapwellimen Koht Kommoal?

“Mahsen en Koht wie momour oh manaman.”​—IPRU 4:12.

1. Ia duwen atail kak iang kisehn sapwellimen Koht kommoal rahnwet? Dahme kahrehda e kak apwal en kin peik?

KITAIL sukuhlkier me kitail kak iang kisehn sapwellimen Siohwa kommoal ma kitail peikiong oh utungada sapwellime pwihn. Atail peik kin kasalehiong Siohwa me kitail men kupwure en pweida. Ahpw ekei pak e kin apwal en peik. Karasepe, ni ahnsou me kitail esehda me Siohwa ketin kupwurki kitail en uhdihsang wia mehkot me kitail kin perenki wia, ele e kin apwal en mwadang peikiong. Ma met wiawi, kitail anahne ahnla men peik. (Wiewia 5:29) Nan iren onop wet, kitail pahn koasoiapene ekei ahnsou kan me kitail kak kasalehda ma kitail uhdahn men peik ahnsou koaros.

2, 3. Dahme kitail anahne pousehlahte wia pwe kitail en kaperenda Siohwa?

² Ia duwe, ke pahn men peik ni omw kin diarada nan Paipel me ke anahne wia wekidekla ieu nan omw mour? Medewehla met: Paipel mahsanih me aramas akan me Siohwa ketin kupwurki ren iang sapwellime pwihn iei “dipwisou kesempwal kan” sang wehi koaros. (Ak. 2:7) Met wehwehki me Koht kin ketin pilada aramas akan me e ketin kesempwalki pwehki ar kin poakohng dahme pwung. E mehlel me ni atail kin tepida onopki Paipel, pali laud en kitail kin wia soahng  suwed kan. Ahpw pwehki atail kin poakohng Koht oh sapwellime Ohl oh men kaperenda Koht, kitail kin perenki wiahda wekidekla laud kan nan atail madamadau oh wiewia kan. Kitail kin kapakapki sapwellimen Siohwa sawas oh nantihong wiahda wekidekla kan. Eri, kitail kakehr papidaisla oh ale sapwellimen Siohwa kupwuramwahu.​—Wadek Kolose 1:10.

³ Ahpw kitail soh unsekte. Kitail kin anahnehte wia wekidekla kan nan atail mour oh kin nantihong wia me mwahu. Ahpw Siohwa ketin inoukihda me e pahn ketin sewese kitail ma kitail kin pousehlahte wia uwen atail kak en kaperenda ih.

Ahnsou me Kitail Anahne Wia Wekidekla kan

4. Ia ahl siluh me Siohwa ketin doadoahngki pwe en ketin kasalehiong kitail me kitail anahne wia wekidekla kan?

⁴ Mwohn atail wia wekidekla kan nan atail mour, kitail anahne ese soahng dah kan me kitail anahne wekidala. Siohwa kin ketin sewesehkin kitail met ni soangsoangen ahl akan. E kak ketin doadoahngki ehu padahk nan atail Wasahn Kaudok de ehu ire nan neitail Kahn Iroir pwe en ketin kasalehiong kitail me miehte atail sapwung nan atail madamadau de wiewia kan. Ahpw ekei pak, mehnda ma mwurin atail rong padahk de wadek ehu ire, kitail sohte kin wehwehki me kitail anahne wia wekidekla kan, eri Siohwa kak ketin doadoahngki emen riatail Kristian en kapwungkitailla ni kadek.​—Wadek Kalesia 6:1.

5. Dahme kitail kin wia ni ahnsou me emen kin kapwung kitail? Dahme kahrehda elder kan anahne pousehlahte song en sewese kitail?

⁵ Ni ahnsou me emen aramas soh unsek kin kapwung kitail, e kak apwal en pwungki eh kaweid mehnda ma e kin wia met ni kadek. Ahpw Siohwa ketin kaweidki elder kan ren song en kapwungkitailla ni “kamantik,” de ni kadek. (Kal. 6:1) Ma kitail pwungki arail sawas, kitail pahn ahpwte wiahla aramas “kesempwal kan” rehn Siohwa. Mehlel me kitail kin kapakapohng Siohwa oh kalapw ndaiong me kitail soh unsek oh kin wiahda sapwung tohto. Ahpw ni elder kan arail kin padahkihong kitail me kitail wiahda sapwung ehu, kitail kin ekei pak kihda kahrepen atail wiewia kan de nda me atail sapwungo sohte nohn suwed. Ele kitail kin nda me aramas me kapwung kitailo sohte kin pwungki kitail de mwomwen eh koasoi sohte kadek. (2 Nan. 5:11) De kitail kakete uhdahn mwakarada ma elder kan ndaiong kitail mehkot me kitail keieu kahng rong. Karasepe, ele re ndaiong kitail me emen kisehn atail peneinei kin wiewia mehkot sapwung de mwomwen atail kin likouda sohte konehng. Ele re ndaiong kitail me kitail anahne kin kamwakele paliwaratail de me Siohwa kin ketin kalahdeki dahme kitail kin wia ong mehn kamweit. Pwehki atail mwakarada, kitail kakete nda soahng kan me kitail sohte konehng nda. Met kak kahrehiong kitail oh brother me sewese kitailo en nsensuwedla. Ahpw mwuhr ni atail solahr mwakar, kitail kin kalapw pwungki me dahme e nda kin mwahu ong kitail.

6. Ia duwen mahsen en Koht eh kak “kadeikada ineng oh lamalam en nan kapehd en aramas”?

⁶ Ipru 4:12 me iei tepin iren Paipel nan iren onop wet padahkihong kitail me mahsen Koht kin “manaman.” Met wehwehki me Mahsen en Koht ahneki manaman en sewese aramas akan ren wekidala arail mour. Sapwellime mahsen kin sewese kitail pwe kitail en wiahda wekidekla kan mwohn atail papidaisla. Oh e kak sewese kitail en pil wia wekidekla kan nan atail mour mwurin atail papidaisla. Nan nah kisinlikou ong mehn Suhs Kristian kan, Pohl pil ntingihedi me mahsen en Koht “kin lellong loalen aramas lel wasa keieu rir” oh e kak “kadeikada ineng oh lamalam en nan kapehd en aramas.” (Ipru 4:12) Eri Pohl kin koasoakoasoia me ni atail kin wehwehkihda dahme Koht kin ketin kupwurki kitail en wia, atail wiewia kan pahn kasalehda dahme mi loalatail. Ia duwe, ekei pak mie wekpeseng en dahme aramas kak kilang rehtail oh dahme mi loalatail? (Wadek Madiu 23:27, 28.) Nna medewehla dahme ke pahn wia nan soangen irair kan me kitail pahn koasoiapene.

Doulahte Kekeirda nan Sapwellimen Siohwa Pwihn

7, 8. (a) Dahme kahrehda ekei mehn Suhs Kristian kan men peikiongete ekei kisehn Kosonned en Moses? (b) Dahme kahrehda kitail kak nda me re kin uhwongada sapwellimen Koht koasoandi?

⁷ Tohto rehtail kin uhdahn ese Lepin Padahk  4:18 me mahsanih: “Ahl me aramas pwung kan kin weid loale rasehng dakadahn ketipin me kin maramarainla lao rahn pwarada.” Met wehwehki me atail wiewia kan kin mwamwahula oh atail wehwehki kupwuren Koht pahn kin lalaudla.

⁸ Kitail sukuhlkier me mwurin Sises eh ketin pwoula, mehn Suhs Kristian tohto kin men peikiongete Kosonned en Moses. (Wiewia 21:20) Pohl kawehwehda me Kristian akan solahr anahne peikiong Kosonnedo, ahpw ekei saikinte men pwungki dahme Siohwa ketin kupwurki irail en wia. (Kol. 2:13-15) Mwein re kin medewe me ma re doulahte peikiong ekei kisehn Kosonnedo, re pahn kak pitsang kalokolok sang irail ako me kin idawehn pelien lamalam en mehn Suhs. Ahpw Pohl padahkihong irail ni sansal me re sohte kak iang kisehn sapwellimen Koht kommoal ma re uhwongada sapwellime koasoandi. * (Ipru 4:1, 2, 6; wadek Ipru 4:11.) Pwe ren ale sapwellimen Siohwa kupwuramwahu, re anahne pwungkiher me Siohwa ketin kupwurki sapwellime aramas akan ren kaudokiong ih ni ahl ehu me weksang mahs.

9. Ia pahn atail pepehm ni ahnsou me ladu lelepek oh loalokong kin wiahda wekidekla kan me weksang dahme kitail kin wehwehki mahs?

⁹ Rahnwet, ladu lelepek oh loalokong kin sewese kitail ekei pak pwe kitail en wehwehki ehu padahk en Paipel ni ahl ehu me weksang dahme kitail kin wehwehki mahs. Kitail anahne perenki wekidekla pwukat. Wekidekla pwukat kin kasalehda me Siohwa kin ketin doadoahngki ladu lelepek oh loalokong pwe en ketin padahkihong kitail padahk mehlel. Ekei pak, Pwihn me Kin Apwalih Mwomwohdiso nan Sampah Pwon, me weliwelian laduwo kin pwurehng tehk mwomwen atail kin wehwehki ekei padahk kan. Ma brother pwukat pilada me wekidekla kan anahne wiawi, re sohte kin pweiek en kapwungala mwomwen ar kawehwe ekei padahk kan mahs oh kawehwehda padahk pwukat en sansal sang mahs. Re ese me ekei pahn kauwe ladu lelepek oh loalokong pwehki soangen wekidekla pwukat, ahpw met sohte kesempwal. Dahme keieu kesempwal ong irail iei arail utungada kupwuren Koht. Ia pahn omw pepehm ni ahnsou me laduwo wekidala wehwehn ehu padahk me weksang dahme kitail kin wehwehki mahs?​—Wadek Luk 5:39.

10, 11. Dahme ekei tohnsukuhl en Paipel wia ni arail esehda me re anahne song wiepen kalohk kapw kan? Dahme kitail sukuhlki sang met?

¹⁰ Kitail pahn tehkpene pil ehu karasaras. Mpen sounpar 100 samwalahro, ekei Tohnsukuhl en Paipel kan me kin kadek padahk kin medewe me arail kin wia padahk iei ahl me keieu mwahu en kalohk. Re kin men kapahrek mwohn pokon. Ekei irail kin uhdahn perenki aramas akan ar kin kapinga arail padahk kan. Ahpw mwuhr, sapwellimen Siohwa aramas akan wehwehkihda ni sansal me Siohwa ketin kupwurki irail en wia laudsang wiahte padahk kan. E ketin kupwurki irail en kalohk sang ihmw lel ihmw oh doadoahngki wiepen kalohk teikan. Ekei irail me kin kadek padahk ko sohte men kalohk. Arail padahk kan kin kahrehiong meteikan en medewe me re poakohng oh kin peikiong Siohwa, ahpw arail wiewia kan nan irair wet kasalehda me re sohte kin. Kitail ese me Siohwa sohte kin ketin kupwurki arail wiewia. Irail sohla iang sapwellime pwihn.​—Mad. 10:1-6; Wiewia 5:42; 20:20.

¹¹ E pil kin apwal ong Tohnsukuhl en Paipel teikan ren kalohk sang ihmw lel ihmw nin tapio. Ahpw re kin peik oh loalopwoatohng sapwellimen Siohwa pwihn. Mwuhr, re sohla apwalki kalohk. Siohwa uhdahn ketin kapairailda. Dahme ke kin wia ni ahnsou me ladu lelepek oh loalokong padahkihong uhk ken song wiepen kalohk ehu me ke saikinte wia mahs? Ke pahn peikiong mendahki e mwomwen apwal?

Ni Emen me Kitail Poakohng Kesehla Siohwa

12, 13. (a) Dahme kahrehda Siohwa ketin padahkihong kitail en ‘kesepwekehsang nanpwungatail aramas suwedo’? (b) Soangen irair dahieu me kin apwal ong pahpa oh nohno Kristian?

¹² Kitail uhdahn pwungki me kitail anahne peikiong poangoak me kitail en mwakelekel ni soahng koaros pwe kitail en kaperenda Siohwa. (Wadek Taitus 2:14.) Ahpw mie irair kan me kin kahrehiong kitail en apwalki peikiong poangoak  wet. Karasepe, medewehla irair wet: Pwopwoud Kristian ehu me naineki pwutak tehmen oh e kesehla padahk mehlel. E perenki wiahda “dihp” laudsang eh nanpwungmwahu rehn Siohwa oh eh pahpa oh nohno. Pwehki eh wiewia kan, e piskensang mwomwohdiso.​—Ipru 11:25.

¹³ Eh pahpa oh nohno uhdahn nsensuwedla! Ira ese me Paipel mahsanih “duwen irail kan me kin wia riamwail . . . ahpw kin nenek, kin noahrok, kin pwongih dikedik en eni kan, kin karaunlikamw, kin kamamsakau de kin loallap suwed. Kumwail dehr pil kin patehng irail oh iang mwenge rehrail.” E pil mahsanih: “Kumwail kesepwekehsang nanpwungamwail aramas suwedo.” (1 Kor. 5:11-13) Oh ira wehwehki me lepin lokaia “irail” pil kin dokedoke tohnpeneinei me sohla kin kousoan rehra. Ahpw pwehki ara limpoak ong neira pwutako kehlail, ira ele medewe: “Se anahne koasoiong nait pwutak ni uwen at kak. Se sohte kak sewese ih en pwurodohng rehn Siohwa ma se sohte kak koasoiong ih.” *

14, 15. Dahme pahpa oh nohno kan anahne tamataman ni ar kin pilada ma re pahn koasoiong neirail seri me piskenla?

¹⁴ Kitail kin poakehla irail pahpa oh nohno kan me duwehte pwopwoudo. Neira pwutako kak pilada en wekidala dahme e kin wia. Ahpw e men pousehlahte wia dahme sapwung laudsang eh men mi rehn eh pahpa oh nohno oh tohnmwomwohdiso teikan. Pahpa oh nohno men sewese neira pwutako, ahpw ira sohte kak kaweidki dahme e kin pilada en wia. Kitail uhdahn kak wehwehki kahrepen ara nsensuwed laud.

¹⁵ Dahme riatail Kristian kan pahn wia? Ira pahn peikiong sapwellimen Siohwa poangoak sansal? Mehlel me ekeite pak me ira anahne koasoiong neira pwutako pwehki anahn en peneinei. Ahpw ira pahn medewe me ira ahneki kahrepe tohto en koasoiong neira pwutako? Ni ara wiahda ara pilipil duwen met, ira anahne tamataman dahme Siohwa ketin kupwurki ira en wia. Ira anahne tamataman me Siohwa ketin kupwurki sapwellime aramas akan en kolokol arail mwakelekel. Ihme kahrehda e ketikihda poangoak en “kesepwekehsang . . . aramas suwedo” nan mwomwohdiso. E pil ketin kupwurki sewese aramas me kin wia dahme sapwungo en wekidala eh wiewia kan oh pwurodohng mwomwohdiso. Ia duwen pahpa oh nohno Kristian kan ar kasalehda me re men ahneki madamadau duwehte Siohwa?

16, 17. Dahme kitail sukuhlki duwen Aaron?

¹⁶ Rien Moses me adaneki Aaron lelohng irair apwal ehu pwehki dahme nah pwutak riemeno wiahda. Nah pwutak Nadap oh Apihu wiahda meirong ni ahl me Siohwa sohte ketin kupwurki. Siohwa ketin kadardiong ira kisiniei oh kemeirahla. Medewehla uwen Aaron eh nsensuwedkihla met. Aaron solahr kak koasoiong nah pwutak ko. Ira melahr. Ahpw pil mie mehkot me kahrehda irairo en apwal ong Aaron oh eh peneinei. Moses padahkihong Aaron oh nah pwutak teikan me Siohwa sohte ketin kupwurki irail en kasalehda ar nsensuwed. Moses nda: “Kumwail dehpa kapingada pitenmoangamwail kan de tehrpeseng amwail likou kan pwehn kasalehda amwail nsensuwed. Ma kumwail pahn wia met, kumwail pahn mehla oh KAUN-O pahn pil ketin engiengda pahn aramas koaros.” (Lip. 10:1-6) Mehn kasukuhlo sansal. Atail limpoak ong Siohwa anahne kehlail sang atail limpoak ong tohnpeneinei kan me sohte loalopwoatohng Siohwa.

¹⁷ Rahnwet, Siohwa sohte kin ketin mwadangete kemehla irail kan me kin sapeikiong sapwellime kosonned kan. E kin ketin kasalehiong  irail limpoak oh ketikihong irail ahnsou pwe ren uhdihsang arail wiewia suwed kan. Ahpw ia pahn sapwellimen Siohwa pepehm ma pahpa oh nohno kan sapeikiong sapwellime kosonned oh medewe me mie kahrepe tohto me re ahneki pwe ren koasoiong neirail pwutak de serepein men me piskenla?

18, 19. Soangen kapai dah kan me tohnpeneinei kan kak ale ma re pahn pousehlahte loalopwoatohng Siohwa?

¹⁸ Me tohto nda me re pwurodohng mwomwohdiso pwehki kompoakparail oh ar peneinei kan ar kin loalopwoatohng Siohwa oh sohte kin koasoiong irail. Karasepe, emen serepein pwulopwul ndaiong elder kan me mwomwen rie pwutako eh wiewia me kahrehiong ih en wekidala eh mour. Rie pwutako kin loalopwoatohng Siohwa oh peikiong sapwellime koasoandi erein ahnsou me e piskenlao. Met kahrehiong ih en men pwurodo nan mwomwohdiso.

¹⁹ Eri, dahme kitail anahne wia? Kitail anahne peikiong Siohwa ni soahng koaros nan atail mour. Pwehki atail soh unsek, ekei pak met pahn apwal ong kitail. Ahpw kitail anahne kamehlele douluhl me dahme Siohwa ketin mahsanihong kitail en wia kin keieu mwahu ong kitail ahnsou koaros.

“Mahsen en Koht Wie Momour”

20. Ia ahl riau me kitail kak wehwehki me pid Ipru 4:12? (Kilang nting tikitik me mi pah.)

²⁰ Ni Pohl eh ntingihedi nan Ipru 4:12: “Mahsen en Koht wie momour,” e sohte koasoakoasoia duwen Paipel. * Iretikitik teikan nan irelaud wet kin kasalehda me e kin koasoia duwen sapwellimen Koht inou kan. Pohl kin koasoia me sapwellimen Koht inou kan kin pweida ahnsou koaros. Siohwa ketin kadehdehki duwen sapwellime mahsen kan: “E pahn kin kapwaiada audepen kupwurei koaros; e pahn kin kapwaiada mehkoaros me I anahne en pweida.” (Ais. 55:11) Eri kitail anahne kanengamah ma Koht sohte ketin kapwaiada sapwellime inou kan ni ahnsou me kitail men en ketin kapwaiada. Kitail kak kamehlele me Siohwa kin ketin doadoahk pwe en kaimwisekala sapwellime koasoandi.​—Sohn 5:17.

21. Ia duwen Ipru 4:12 eh kin sewese me mah kan ren pousehlahte papah Siohwa?

²¹ Me tohto nanpwungen “pokon kalaimwun” kin papah Siohwa sounpar tohto. (Kaud. 7:9, NW) Re sohte kasik ren mahla nan koasoandi suwed wet. Ahpw re pil kin wiahte uwen ar kak ni ar kin papah Siohwa. (Mel. 92:14) Re ese me “mahsen en Koht wie momour” oh sapwellimen Siohwa inou kan pahn pweida. (Ipru 4:12) Re ese me e kin ketin wie doadoahk pwe en ketin kapwaiada kupwure ong sampah oh aramas akan. Pwehki eh kin ketin uhdahn kesempwalki kupwureo, e kin ketin kupwurperenkihda ni atail kin kasalehda me kitail pil kin kesempwalki kupwureo. Erein keisuhwen rahn en kommoal wet, sohte mehkot pahn irehdihsang Siohwa en ketin kaimwisekala sapwellime koasoandi. Oh e ketin mwahngih me sapwellime aramas akan nin duwen pwihn ehu pahn pousehlahte utungada sapwellime koasoandi. A ia duwen kowe? Ke iangehr kisehn sapwellimen Koht kommoal?

[Nting tikitik kan me mi pah]

Ke Tamataman?

• Dahme kitail anahne wia pwe kitail en iang kisehn sapwellimen Koht kommoal rahnwet?

• Ni atail wehwehkihda dahme Koht ketin kupwurki kitail en wia, ia duwen atail kin kasalehda me kitail men kaperenda ih?

• Soangen irair dah kan me apwal ong kitail en wia dahme Siohwa ketin padahkihong kitail? Ahpw dahme kahrehda e uhdahn kesempwal ong kitail en peikiong ih?

• Ia ahl riau me kitail kak wehwehki me pid duwen Ipru 4:12?

[Peidek en Onop]

[Kilel nan pali 31]

Pahpa oh nohno kan kin nsensuwed laud!