NI OMW men esehda kuloak depe, dahme ke kin wia? Ele ke kin kilang noumw watch de ehu kuloak. Ele ke kilang me ahnsowo awa ehu minit silihsek mwurin nin souwas. Dahme ke pahn ndaiong kompoakepahmw men ma e idek rehmw, “Kuloak depe met?”

Mwein omw pasapengo pahn pidada wasa me ke mi ie. Karasepe, ke kak nda, “E kuloak 1:30” de “E kuloak 13:30.” Nan ekei wasa ele ke kak nda, “E kuloak elep en riau,” me wehwehki minit 30 mwohn riau.

Ia duwen aramas akan nan Paipel ar kin nda kuloak depe? Kaidehn ahl ehute me re kin wia met. Palien Paipel ni Lokaiahn Ipru kin doadoahngki lepin lokaia kan duwehte ‘nimenseng,’ “nin souwas,” oh “nin soutik.” (Sen. 8:11; 19:27; 43:16; 1 Nan. 18:26) Ahpw ekei ahnsou Paipel kin doadoahngki lokaia pisetik pwehn kasalehda kuloak depe.

Mahso, e wia tiahk ehu en doadoahngki sounsilasil kan, ahpw mehlel nipwong kan. Mehn Israel kan kin nehkpeseng ahnsou kan nipwong ong ahnsou siluh, me re kahdaneki “awahn silasil kan.” (Mel. 63:6, NW) Nan Sounkopwung 7:19, kitail wadek duwen ahnsoun silasil “nin lukepen pwong.” Ni ahnsou me Sises ipwidi, mehn Suhs kan kin nehkpeseng ahnsou kan nipwong ong ahnsou pahieu, duwehte me mehn Krihk oh Rom kan kin wia.

Pwuhken Rongamwahu ko mahsanih duwen ahnsoun silasil pwukat pak tohto. Karasepe, ni “kapahieun awahn silasil en nipwong,” Sises ketin alialu pohn sehdo kohlahng pwohto wasa me sapwellime tohnpadahk ko mi ie. (Mad. 14:25) Sises mahsanih nan ehu karasaras: “Ma tohnihmw men ese ahnsou dah nipwong me lipirap emen pahn kohdo, e pahn pepehd oh e sohte pahn mweidohng lipirapo en wehdpeseng imweo.”​—Mad. 24:43.

Sises mahsanih duwen ahnsoun silasil pahieu pwukat ni e mahsanihong sapwellime tohnpadahk ko ren mwasamwasahn pwehki re “sehse iahd me soumas en ihmwo pahn kohdo, ma ni soutik de lukepen pwong de mwohn nin sohrahn de nimenseng.” (Mark 13:35, ntp.) Keieun ahnsoun silasil, “ni soutik,” kin wiawi sang ni kihrlahn ketipin lella mpen kuloak duwau ni pwong. Keriaun ahnsoun silasil, ni “lukepen pwong,” kin wiawi sang mpen kuloak duwau ni pwong lel ni lukepen pwong. Kesiluhn ahnsoun silasil, “nin sohrahn,” de “ni ahnsou me malek kin kakorot,” kin wiawi sang lukepen pwong lel mpen kuloak siluh nimenseng. Ele ih erein ahnsoun silasil wet me maleko kakorot nipwong me Sises ketin selidi. (Mark 14:72) Kapahieun ahnsoun silasil, “nimenseng,” wiawi sang mpen kuloak siluh nimenseng lel dakadahn ketipin.

Eri, mendahki aramas akan mahso sohte naineki kuloak de watch kan duwehte me kitail naineki rahnwet, mie wiepen ar kin esehda kuloak depe.