Luslahng audepe kan

luslahng audepe kan

“Kumwail Pahn Peren Ma Kumwail Kapwaiada”

“Kumwail Pahn Peren Ma Kumwail Kapwaiada”

“Kenei mwenge iei en kapwaiada kupwuren ih me ketin poaroneiehdo oh kanekehla sapwellime doadoahk.”​—SOHN 4:34.

KOUL KAN: 80, 35

1. Ia duwen madamadau roporop en sampah wet eh kak kamwakid kitail?

DAHME kahrehda e apwal en doadoahngki dahme kitail sukuhlki sang Mahsen en Koht? Ehu kahrepe iei kitail kin anahne aktikitik pwehn wia dahme pwung. Ni “imwin rahn” pwukat, e apwal en aktikitik pwehki aramas tohto kin “roporop ong pein irail, poakohng mwohni, aksuwei, pohnmwahso,” oh “sohte kak kaunda pein irail.” (2 Tim. 3:1-3) Nin duwen sapwellimen Koht ladu kan, kitail ese me soangen tiahk pwukat suwed, ahpw mwein ekei pak e mwomwen me irail kan me kin kasalehda soangen mwekid pwukat kin pweida mwahu nan arail mour oh uhdahn peren. (Mel. 37:1; 73:3) Emen kakete medewe: ‘Mie katepen ei nsenohki anahn en meteikan laudsang pein ahi? Ma I kasalehda aktikitik, aramas pahn waunekiniehte?’ (Luk 9:48) Ma kitail mweidohng madamadau roporop en sampah wet en kamwakid kitail, met kak kauwehla atail nanpwungmwahu rehn riatail Kristian kan, oh e pahn apwal ong meteikan en pohnese me kitail Kristian kei. Ahpw ni atail onopki mehn kahlemeng en sapwellimen Koht ladu aktikitik kan oh alasang irail, kitail pahn imwila mwahu.

2. Dahme kitail kak sukuhlki sang sapwellimen Koht ladu lelepek kan mahso?

 2 Dahme sewese sapwellimen Koht ladu lelepek kan mahso en wiahla kompoakepah? Ia duwen arail kolokol arail nanpwungmwahu reh? Ia wasa re kihsang arail kehl en wia dahme pwung? Ni atail kin wadek duwen arail mehn kahlemeng kan nan Paipel oh doudouloale dahme kitail wadek, atail pwoson pahn kehlailla.

DAHME KIN SEWESE ATAIL PWOSON EN KIN WIE KEHKEHLAIL

3, 4. (a) Ia duwen Siohwa eh kin ketin padahki kitail? (b) Dahme kahrehda kitail anahne laudsang ihte loalokong pwehn kolokol atail pwoson en kehlail?

3 Siohwa kin ketikihda dahme kitail anahne pwe atail pwoson en kin wie kekehlail. E ketikihong kitail kaweid oh kaiahn mwahu sang nan Paipel, sawaspen Paipel kan, jw.org, JW Broadcasting, oh atail mihting oh mihting tohrohr kan. Ahpw Sises ketin kawehwehda me kitail pil anahne wia soahng ehu me laudsang en ihte loalokongkihla. E mahsanih: “Kenei mwenge iei en kapwaiada kupwuren ih me ketin poaroneiehdo oh kanekehla sapwellime doadoahk.”​Sohn 4:34.

4 En wiewia kupwuren Koht kin rasehng kisin tungoal ong Sises. Duwehte atail kang mwenge mwahu pwe kitail en nsenamwahu oh pil pwehn kakehlaka paliwaratail, wiewia kupwuren Koht pahn kakehlakahda atail pwoson. Karasepe, mie pak me ke kin pwang ni omw kohla iang tuhpenehn kalohk, ahpw mwurin kalohk, ke pwurala ni imwomwo nsenamwahu oh kehlailda?

5. Ia duwen atail kin paiekihda atail ahneki erpit?

5 Ni atail kin aktikitik oh wia dahme Siohwa ketin kupwurki sang kitail, kitail kin ahneki erpit. (Seims 3:13) Oh mie soahng mwahu tohto me kin wiawihong irail kan me ahneki erpit. Paipel mahsanih: “Sohte mehkot me ke pahn mwahuki me kak pahrekiong kesempwal en kupwurokong. . . . Irail kan me loalokonglahr kin pereperen; kupwurokong pahn kihong irail mour.” (Lep. Pad. 3:13-18) Sises mahsanihong sapwellime tohnpadahk ko: “Pwehki amwail ese mepwukat, kumwail pahn peren ma kumwail kapwaiada.” (Sohn 13:17) Sapwellimen Sises tohnpadahk kan pahn peren kohkohlahte ma irail kin wiewia dahme e ketin kehkehlingkihong irail en wia. En ideidawehn sapwellime padahk oh mehn kahlemeng kan anahne wia elen arail mour.

6. Dahme kahrehda kitail anahne pousehlahte doadoahngki dahme kitail sukuhlki?

6 Rahnwet, kitail pil anahne pousehlahte doadoahngki dahme kitail sukuhlki. Medewehla sounwia sidohsa men me naineki dipwisou oh kepwehn doadoahk kan, oh pil ahneki loalokong. Soahng pwukat pahn sewese ih en wia sounwia sidohsa koahiek men ihte ma e doadoahngki mepwukat. Ele e wiahier soangen doadoahk wet erein sounpar tohto, ahpw e anahne pousehlahte doadoahngki dahme e sukuhlkiher ma e men wiewiahte sounwia sidohsa koahiek men. Duwehte met, ni ahnsou me kitail tepin sukuhlki padahk mehlel, kitail kin peren pwehki kitail doadoahngki dahme kitail sukuhlki sang Paipel. Ahpw pwe kitail en ahneki peren poatopoat, kitail anahne rahn koaros pousehlahte doadoahngki dahme Siohwa kin ketin padahkihong kitail.

7. Dahme kitail kak sukuhlki sang mehn kahlemeng kan nan Paipel?

7 Nan iren onop wet, kitail pahn koasoiapene irair kei me kak kahrehda en apwal ong kitail en kolokol aktikitik. Kitail pahn sukuhlki ia duwen me lelepek kan mahso ar kolokolte arail aktikitik nan soangen irair ko. Ahpw kitail anahne wia laudsang ihte wadek ire kan. Kitail  anahne medemedewe duwen ire ko oh doadoahngki nan atail mour.

KILANGWOHNG METEIKAN ME RE PIL DUWEHTE KITAIL

8, 9. Dahme Wiewia 14:8-15 padahkihong kitail duwen aktikitik me wahnpoaron Pohl ahneki? (Menlau kilang tepin kilel.)

8 Koht kupwurki me “soangen aramas koaros en komourla oh esehla loalokong pwung en me mehlel.” (1 Tim. 2:4) Ia duwen omw kin kilangwohng aramas akan me saikinte sukuhlki padahk mehlel? Wahnpoaron Pohl kin kalohk ong mehn Suhs kan me eseier soahng kei duwen Koht. Ahpw e pil kalohk ong irail kan me kin kaudokiong koht likamw kan. Eh kalohk ong irail kin kasonge eh aktikitik. Ia duwen?

9 Ni tepin eh seiloak nin duwen misineri men, e iang Parnapas kohla ni kahnimw en Listra. Mehn Likaonia ko wiahki Pohl oh Parnapas duwehte aramas manaman kei oh likwerikin ira eden ar koht ko Seus oh Erimihs. Ia duwe, Pohl oh Parnapas pohlkihda arail kapinga ira? Ira medewe me met mwahusang kalokolok me ira lelohng nan kahnimw teiko me ira mwemweitla ie? Ira medewe me arail uhdahn tehk ira pahn kak sewese aramas tohto en rong rongamwahwo? Uhdahn soh! Ira uhdahn nsensuwedkihla met oh werkihda: “Dahme kumwail wiewiahki soahng pwukat? Kiht pil aramas ekei me ahneki luwet akan me duwehte kumwail.”​—Wiewia 14:8-15.

10. Dahme kahrehda Pohl oh Parnapas sohte medewe me ira lapalapasang mehn Likaonia ko?

10 Ni Pohl oh Parnapas ara nda me ira pil aramas kei, met wehwehki me ira pil sohte unsek. Ira sohte ndinda me elen ara kaudok kin duwehte ahn mehn Likaonia ko. Koht ketin poaroneirahla nin duwen misineri kei. (Wiewia 13:2) Ira keikihdi sapwellimen Koht manaman oh ahneki koapworopwor kaselel ehu. Ahpw met sohte wia kahrepe ehu ira en pehm me ira lapalapasang aramas ako. Ira wehwehki me mehn Likaonia ko pil kak alehdi koapworopwor en kohla nanleng ma irail mwekidki rongamwahwo.

11. Ia duwen atail kak aktikitik duwehte Pohl ni atail kin kalohk?

11 Iet keieun ahl me kitail en kasalehda aktikitik. Duwehte Pohl, kitail sohte kin medewe me atail pwais en kalohk de soahng kan me Siohwa ketin sewese kitail en kapwaiada kin kahrehiong kitail en wiahla aramas kesempwal kei. Kitail kak pein idek rehtail: ‘Ia ei pepehm ong aramas akan nan ei wasahn kalohk? I kin lipilipilki pwihn en aramas ehu?’ Sounkadehdehn Siohwa kan nan sampah pwon kin song en diarada irail kan me pahn rong rongamwahwo. Ekei irail pil kin nantihong en esehla lokaia oh tiahk kan en irail kan me meteikan kin kilengdiong. Sounkadehde kan sohte kin medewe me re mwahusang aramas akan me re kalohk ong. Ahpw re kin song en wehwehkihla emenemen pwe ren kak sewese irail en mwekidki rongamwahu en Wehio.

KAPAKAPKI METEIKAN OH NDA EDERAIL

12. Ia duwen Epapras eh kasalehda eh uhdahn nsenohki meteikan?

12 Pil ehu ahl me kitail en kasalehda atail aktikitik iei sang atail kapakapki riatail Kristian kan me ‘ahnekier pwoson me uhdahn kesempwal duwehte atail.’ (2 Pit. 1:1) Ih met me Epapras wia. Ni Pohl eh wia sensel Rom nan ihmw ehu, e ntinglahng Kristian kan nan Kolose oh ndahki Epapras: “Ahnsou koaros e kin nantihong kapakapkin kumwail.” (Kol. 4:12) Epapras esehla mwahu rie Kristian ko oh kin inenen nsenohkin irail. Pohl ekerki ih “iengei me selidi,” eri Epapras pil ahneki pein eh kahpwal kan. (Pail. 23) Ahpw e kin nsenohkihte  anahn en meteikan, oh e wia mehkot pwehn sewese irail. Epapras kapakapki rie Kristian ko, e pil nda ederail nan eh kapakap, oh kitail pil kak wia met. Soangen kapakap duwehte met kak uhdahn manaman.​—2 Kor. 1:11; Seims 5:16.

13. Ia duwen omw kak alasang mehn kahlemeng en Epapras nan omw kapakap?

13 Medewehla irail kan me ke kak kapakapki oh nda ederail. Duwehte Epapras, riatail Kristian tohto kin kapakapki iengarail kan nan mwomwohdiso oh pil peneinei kan me ahneki pwukoa laud, de me kin lelohng kasongosong de anahne wiahda pilipil kesempwal kan. Me tohto kin kapakapki irail kan me ederail pwarada nan jw.org pahn oaralapo “Jehovah’s Witnesses Imprisoned for Their Faith.” (Menlau kilang pahn NEWSROOM > LEGAL DEVELOPMENTS.) Patehng met, kitail pil anahne tamanda irail kan me kompoakparail de arail peneinei keren mehsang irail, irail kan me lelohng kahpwal laud kan duwehte rerrer en sahpw de melimel ape oh pil mahwen, oh pil irail kan me kin dadaurete pahn kahpwal en mwohni. E sansal me riatail Kristian tohto kin anahne oh pil kak paiekihda atail kapakapkin irail. Ni atail kapakapki irail pwukat, kitail kin kasalehda me kitail nsenohki kaidehn atail anahn kante ahpw pil anahn en meteikan. (Pil. 2:4) Siohwa kin ketin karonge soangen kapakap pwukat.

“ANAHNE MWADANG RONG”

14. Ia duwen Siohwa eh ketikihda mehn kahlemeng keieu mwahu duwen en karonge emen?

14 Pil ehu ahl me kasalehda uwen laud en atail aktikitik iei ni atail kin men rong aramas. Seims 1:19 mahsanih me kitail “anahne mwadang rong.” Pein Siohwa ketikihda mehn kahlemeng me keieu mwahu duwen met. (Sen. 18:32; Sos. 10:14) Medewehla dahme kitail kak sukuhlki sang koasoakoasoipene ehu me kileldi nan Eksodus 32:11-14. (Wadek.) Siohwa sohte ketin anahne kaweid sang Moses, ahpw e ketin mweidohng ahnsou ong Moses en kasalehda eh pepehm. Ihs rehtail me pahn men rong erein ahnsou reirei emen me kin kasalehda madamadau sapwung oh idawehn eh kaweido? Ei, Siohwa kin ni kanengamah ketin karonge aramas akan me kin likwer ong ih ni pwoson.

15. Ia duwen atail kak alasang Siohwa ni atail kin kasalehda wahu ong meteikan?

15 Emenemen kitail anahne pein idek: ‘Ma Siohwa kak ketin aktikitikla pwehn ketin sewese aramas oh karonge irail, duwehte eh ketin wiahiong Eipraam, Resel, Moses, Sosua, Manoha, Elaisa, oh Esekaia, I seu pil anahne wauneki riei Kristian kan koaros, karonge arail madamadau, oh pil kapwaiada arail kaweid mwahu kan? Mie emen nan ei mwomwohdiso de nan ei peneinei me anahne ei sawas ahnsou wet? Dahme I pahn wiahiong met?’​—Sen. 30:6; Sounkopwung 13:9; 1 Nan. 17:22; 2 Kron. 30:20.

‘MWEINELE SIOHWA PAHN KETIN MWAHNGIHADA EI APWAL’

Depit nda: “Kumwa piseksang!” Ma kowe mwo, dahme ke pahn wia? (Menlau kilang parakrap 16, 17)

16. Dahme Nanmwarki Depit wia ahnsou me Simei kasonge ih?

16 Aktikitik pil kin sewese kitail en kaunda pein kitail ni ahnsou me meteikan kasonge kitail. (Ep. 4:2) Kitail kak wadek duwen ehu karasaras kaselel duwen met nan 2 Samuel 16:5-13. (Wadek.) Depit oh nah ladu kan dadaurete pahn karaun likamw oh tiahk lemei en Simei, emen kisehn Nanmwarki Sohl. Depit kanengamahiong uhwong wet mendahki e ahneki manaman en kauhdi. Ia duwen Depit eh ahneki kehl en kaunda pein ih? Pwehn ese duwen met, kitail tehk nan kesiluh en Melkahka.

17. Dahme sewese Depit en kak kaunda eh madamadau, oh ia duwen atail kak alasang ih?

 17 Depit ntingihedi Melkahka irelaud 3 ahnsou me nah pwutako Apsalom songosong en kemehla ih. Erein ahnsou apwalo me Simei lemei ong Depit, Depit ahneki kehl en kolokol eh meleilei. Ia duwen? Melkahka 3:4 mahsanih: “I patohwan likweriong KAUN-O, pwe en ketin sewese ie, e ahpw ketin sapeng ie sang pohn sapwellime dohl sarawi.” Ni atail kin lelohng uhwong, kitail anahne kapakap duwehte me Depit wia. Eri Siohwa pahn ketikihong kitail sapwellime manaman. Ia duwe, ke kak kalaudehla omw pahn kaunda pein uhk de mahkohng emen me lemei ong uhk? Ke uhdahn kamehlele me Siohwa kin ketin mwahngih duwen omw lokolok oh pahn ketin sewese oh kapaiukada?

“KUPWUROKONG ME KEIEU KESEMPWAL”

18. Ia duwen atail pahn paiekihda ma kitail pousehlahte doadoahngki sapwellimen Koht kaweid kan?

18 Ni atail kin wia dahme kitail ese me pwung, kitail pahn ahneki erpit oh Siohwa pahn ketin kapaikitailda. Lepin Padahk 4:7 mahsanih me “kupwurokong me keieu kesempwal”! Mendahki erpit kin poahsoankihda loalokong, e kin pidada laudsang en wehwehkihla ire kan. Erpit kin pidada pilipil kan me kitail wiahda. Kisin ketitik kan pil kin kasalehda erpit. Ni erpit re kin kaunopada kanarail mwenge ni ahnsoun karakar kan. (Lep. Pad. 30:24, 25) Krais, me wia “kasalepen sapwellimen Koht . . . erpit,” kin ahnsou koaros ketin wia dahme kin kaperenda Semeo. (1 Kor. 1:24; Sohn 8:29) Koht pahn ketin kapaikitailda ni atail pil kolokol aktikitik oh kasalehda erpit sang ni atail pilada en wia dahme pwung. (Wadek Madiu 7:21-23.) Eri, pousehlahte doadoahk laud pwe ken sewese omw mwomwohdiso en wiahla wasa ehu me koaros kak papah Siohwa ni aktikitik. Kitail kin anahne ahnsou oh kanengamah pwehn doadoahngki dahme kitail ese me pwung. Ahpw atail wiewia met kin kasalehda atail aktikitik, oh aktikitik pahn wahdohng kitail peren met oh pil kohkohlahte.