Luslahng audepe kan

luslahng audepe kan

Me Keieu Manaman Ahpw Kin Ketin Nsenohki Aramas akan

Me Keieu Manaman Ahpw Kin Ketin Nsenohki Aramas akan

“[Siohwa] mwahngih dahme kitail wiawihkihda; e pil ketin tamataman me kitail uhdahn pwehl.”​—MEL. 103:14.

KOUL KAN: 30, 10

1, 2. (a) Ia duwen sapwellimen Siohwa wiewia ong aramas akan eh weksang ahn aramas me ahneki manaman? (b) Dahme kitail pahn koasoiapene nan iren onop wet?

ARAMAS me ahneki manaman kin kalapw “kaunda” meteikan, oh pil kin wiakauwe irail. (Mad. 20:25; Ekl. 8:9) Siohwa sohte kin ketin wia met! Mendahki ih me Keieu Manaman, e kin keieu ketin nsenohki aramas soh unsek kan. E kin ketin kadek oh nsenohki atail pepehm kan oh dahme kitail anahne. E kin ketin tamataman me kitail soh unsek oh e mwahngih dahme kitail sohte kak wia, eri e sohte kin ketin mahsanihong kitail en wia laudsang dahme kitail kak wia.​—Mel. 103:13, 14.

2 Nan Paipel, kitail sukuhlki duwen nsenoh me Siohwa sapwellimanki ong sapwellime aramas akan. Kitail pahn koasoiapene karasepe siluh: Keieu, duwen Siohwa eh ketin kadek oh sewese kisin pwutako Samuel en wahla rohng en kadeik ehu ong Samworo Lapalapo, Ilai. Keriau, duwen Siohwa eh ketin kanengamahiong Moses ni Moses medewe me e sohte kak kahluwa wehin Israel sang Isip. Oh kesiluh, duwen Siohwa eh ketin nsenohki mehn Israel kan  ni arail kohkohsang Isip. Mehn kasukuhl dah kan me kitail kak sukuhlkihsang mwomwen Siohwa eh ketin wia mepwukat?

NSENOHKI PEPEHM EN KISIN PWUTAK MEN

3. Soahng kapwuriamwei dahieu me wiawihong kisin pwutako Samuel ehu pwongo, oh peidek dahieu me kitail kakete idek? (Menlau kilang tepin kilel.)

3 Samuel tepida papah ni tehnpas sarawio ni ahnsou me e wia kisin pwutak men. (1 Sam. 3:1) Ehu pwongo, mwurin e meirlahr, mehkot kapwuriamwei wiawi. * (Wadek 1 Samuel 3:2-10.) E rong emen likwerih edeo. Samuel medewe me Samworo Lapalapo, Ilai, me likwerih ih. Ni peik, e pwourda oh tangala rehn Ilai oh nda: “Komw me eker ieo; eri, iet ngehi, maing.” Ahpw Ilai ndaiong: “I sohte eker uhk.” Mwurin soahng wet wiawi pak riau mwurin mwo, Ilai esehda me Koht me ketin eker Samuel. Eri Ilai ndaiong Samuel dahme e pahn nda ma met pwurehng wiawi, oh Samuel peikiong. Dahme kahrehda Siohwa sohte ketin padahkihong Samuel sangete ni tapio me Ih me ketin eker ih? Paipel sohte mahsanih duwen met. Ahpw Siohwa kakete ketin wia met pwehki e ketin nsenohki ahn Samuel pepehm kan.

4, 5. (a) Dahme Samuel wia ni Siohwa eh ketin mahsanihong ih en padahkihong Ilai sapwellime kadeik? (b) Dahme koasoipen Paipel wet padahkihong kitail duwen Siohwa?

4 Wadek 1 Samuel 3:11-18. Sapwellimen Siohwa Kosonned kehkehlikihong seri kan en wauneki me mah kan, ahpw mehlel irail kan me ahneki manaman. (Eks. 22:28; Lip. 19:32) Eri e apwal en medewehla kisin pwutak men duwehte Samuel en pirida nimenseng, kohla rehn Ilai, oh ni eimah padahkihong duwen sapwellimen Koht kadeik kehlail ong ih. Paipel padahkihong kitail me Samuel “masak kasalehiong Ilai audepen kaudiahlo.” Ahpw, Koht ketin kasalehda ni sansal ong Ilai me Ih me ketin eker Samuel. Pwehki met, Ilai padahkihong Samuel en dehr ekihsang ih dahme Koht ketin mahsanih. Samuel peikiong oh “padahkihong Ilai mehkoaros.”

5 Dahme Samuel ndao ele sohte kapwuriamwei ong Ilai pwehki mwoweo “soukohp emen” pil padahkihong ih soahngohte. (1 Sam. 2:27-36) Dahme wiawihong Samuel oh Ilai kin kasalehiong kitail ia uwen Siohwa eh kin ketin erpit oh ketin nsenohki pepehm en aramas.

6. Mehn kasukuhl dahieu me kitail kak sukuhlkihsang mwomwen Koht eh ketin sewese pwutak pwulopwulo Samuel?

6 Kowe emen me pwulopwul? Ma ei, koasoipen pwutak pwulopwulo Samuel kin kasalehda me Siohwa ketin mwahngih ahmw kahpwal oh pepehm kan. Ele ke kin namenek oh apwalki kalohk ong aramas laud de en weksang irail kan me uwe iuk. Ke kak kamehlele me Siohwa kupwurki seweseiuk. Eri kapakap ong ih oh patohwanohng ih ia uhdahn omw pepehm. (Mel. 62:8) Medemedewe laud duwen mehn kahlemeng en me pwulopwul kan nan Paipel duwehte Samuel. Oh koasoiong riomw Kristian kan me uwe iuk de mah sang me ele powehdier soangen kahpwal kan me duwehte ahmw. Mwein irail kak padahkihong uhk duwen ahnsou kan me Siohwa ketin sewese irail, ele ni ahl ehu me re sohte kasik.

NSENOHKI PEPEHM EN MOSES

7, 8. Ia duwen Siohwa eh ketin kasalehda me e uhdahn ketin nsenohki ahn Moses pepehm kan?

7 Ni Moses eh sounpar 80, Siohwa ketikihong ih pwukoa ehu me uhdahn apwal, me iei en kasaledekihala wehin Israel sang kalidu nan Isip. (Eks. 3:10) Ele met uhdahn kapwuriamwei ong Moses, pwehki e wia sounsilepen sihpw men nan Midian erein sounpar 40. Eri Moses patohwan idek: “Ihs ngehi pwe I en patohla rehn Parao, oh kahluwahsang mehn Israel kan nan Isip?” Siohwa ketin kamehlelehiong Moses: “I  pahn kin ieiang uhk.” (Eks. 3:11, 12) Siohwa pil ketin inoukihong me me mah kan nan Israel pahn “rong” ih. Ahpw, Moses pil patohwan idek: “A ma mehn Israel kan sohte pahn kamehlele ie, oh sohte men rong?” (Eks. 3:18; 4:1) Mwomwen me Moses kin ndinda me Siohwa kakete ketin sapwung! Ahpw Siohwa ketin kanengamahiong Moses. E pil ketikihong ih manaman en wiahda manaman kan. Ni mehlel, Moses me wia tepin aramas nan Paipel me ahneki manaman wet.​—Eks. 4:2-9, 21.

8 Pil mwurin soahng pwukat koaros, Moses pil kihda ehu kahrepe. E nda me e soakoahiek en koasoi. Koht eri mahsanihong: “I pahn seweseiuk pwe ke en kak lokaia, oh I pahn padahkihong uhk dahme ke pahn nda.” Ia duwe, met Moses uhdahn koapworopworki me e kak wia met? Soh, e patohwan peki rehn Koht en ketin poaronehla emen tohrohr! Pwehki met, Siohwa ketin engiengda pah. Ahpw e ketin nsenohkihte ahn Moses pepehmo, eri e ketin poaronehla Aaron en wiliandi Moses oh koasoi mwohn aramas ako.​—Eks. 4:10-16.

9. Ia duwen sapwellimen Siohwa kanengamah oh kadek eh sewese Moses en wia sounkaweid mwahu men?

9 Dahme koasoipen Paipel wet padahkihong kitail duwen Siohwa? Pwehki Siohwa iei me Keieu Manaman, e kakete ketin doadoahngki sapwellime kehl en kamasak Moses pwehn peikiong ih. Ahpw, Siohwa ketin kanengamah oh kadek, oh e ketin kamehlelehiong sapwellime ladu aktikitiko me e pahn ketin ieiang ih. Ia duwe, elen sawas wet kadoadoahk? Ei, uhdahn! Moses wiahla sounkaweid lapalap men ong sapwellimen Koht aramas akan. E kin song en kasalehda mpahi oh nsenohki meteikan, duwehte me Siohwa ketin wiahiong ih.​—Nemp. 12:3.

Ke kin kahlemengih Siohwa nan omw wiewia kan ong meteikan? (Menlau kilang parakrap 10)

10. Ia duwen atail kin paiekihda ni atail nsenohki pepehm en meteikan duwehte me Siohwa ketin wia?

10 Ia mehn kasukuhl kan ong kitail rahnwet? Ma kowe ohl pwopwoud, pahpa, de elder men, ke ahneki ekis manaman pohn meteikan. Pwehki kahrepe wet, e uhdahn kesempwal ken kahlemengih Siohwa sang ni omw kin kadek, kanengamah, oh nsenohki pepehm en omw pwoud, noumw seri kan, oh meteikan nan  mwomwohdiso. (Kol. 3:19-21; 1 Pit. 5:1-3) Ma ke kahlemengih Siohwa oh Sises Krais, me ketin wia laudsang dahme Moses wiahda, e pahn mengei ong meteikan en koasoiong uhk, oh ke pahn wia mehn kangoang ong irail. (Mad. 11:28, 29) Ke pahn pil wia mehn kahlemeng mwahu ehu ong irail.​—Ipru 13:7.

SOUNKOMOUR MEN ME MANAMAN AHPW NSENOHKI PEPEHM EN ARAMAS

11, 12. Dahme Siohwa ketin wia pwe mehn Israel kan en dehr perki mehkot ni eh ketin kahluwairailsang Isip?

11 Ele mehn Israel daulih silirar me kohkohsang Isip nan pahr 1513 mwohn Krais. Nan pwihn wet, mie seri kan, me mah, oh ele me kohwahki soumwahu de luwet. Soangen laud en pwihn wet anahne Sounkaweid men me kin nsenohki oh poakohng irail. Iei met me Siohwa ketin wia, ni eh ketin doadoahngki Moses. Eri, mehn Israel ko sohte perki mehkot ni arail kohkohsang wasao me re ahnlahr.​—Mel. 78:52, 53.

12 Dahme Siohwa ketin wia pwe sapwellime aramas akan en dehr perki mehkot? E ketin koasoanehdi wehin Israel nin duwen “koasoandi en pwihn en mahwen” ni arail mweselsang Isip. (Eks. 13:18NW) Pwehki irail uhdahn soandi mwahu, irail kak kilang ni sansal me arail Kohto kin ketin apwahpwalih irail. Siohwa pil ketikihda “depwek ehu” ni rahn oh “marain en kisiniei” nipwong pwehn katamankihong irail me e ketin ieiang, kaukaweid, oh perepere irail. (Mel. 78:14) Oh wehin Israel anahne soangen kangoang wet pwehki dahme pahn wiawi mwuhr.

Ia duwen Siohwa eh ketin apwalihala mehn Israel ko ni Sehd Weitahtao? (Menlau kilang parakrap 13)

13, 14. (a) Ia duwen Siohwa eh ketin apwalihala mehn Israel ko ni Sehd Weitahtao? (b) Ia duwen Siohwa eh ketin kasalehda me e uhdahn manaman sang mehn Isip ko?

13 Wadek Eksodus 14:19-22. Medewehla me ke iang mi rehn mehn Israel ko. Ke tengla nanpwungen nein Parao karis en sounpei ko oh Sehd Weitahtao. Koht eri ketin mwekid. Uhr en depweko me mi mwohmw uhd kohdihla mwurio nanpwungen kowe oh mehn Isip ko. Ahnsou wet re mi nan rotorot, ahpw wasa me ke mi ie inenen marain! Kowe eri kilang Moses kapahla peho pohn sehdo, oh kisinieng kehlail ehu sang palimese ipido oh katohrepeseng sehdo wiahla ahl tehlap ehu me lella pali teio. Eri kowe, omw peneinei, oh noumw mahn kan alu nan ngalangalo ni ahl ehu me soandi mwahu iangahki aramas ako koaros. Ke uhdahn pwuriamweikihla me wasao sohte pwelmatak oh likekiris. Wasao madada oh kekeluwak oh mengei en alu powe. Eri, me keieu wawai nanpwungamwail pil kak lella pali teio sohte lel apwal.

14 Wadek Eksodus 14:23, 26-30. Erein met eh wiewiawi, Parao, me kin pohnmwahso oh pweipwei, tepida pwakih iuk oh iengomw mehn Israel ko. Moses eri pil pwurehng kapahla peho pohn sehdo, oh kehl riau en sehdo pwurehng pwurpene. Sehdo pwilidohng pohn Parao oh nah sounpei ko oh sohte emen rehrail pitila!​—Eks. 15:8-10.

15. Dahme koasoipen Paipel wet padahkihong uhk duwen Siohwa?

15 Koasoipen Paipel wet padahkihong kitail pil soahng ehu duwen Siohwa. E kin wia Koht emen me soandi mwahu, oh irair wet sewese kitail en sohte perki mehkot. (1 Kor. 14:33) Duwehte sounsilepen sihpw men me kin poakohng oh apwalih nah sihpw, Siohwa kin ketin nsenohki sapwellime aramas akan ni ahl mwahu kan. E kin ketin apwalih oh pere irail sang arail imwintihti kan. Met kin uhdahn kangoange oh kansenamwahwih kitail ni atail kerenlahngehr imwin koasoandi suwed wet.​—Lep. Pad. 1:33.

16. Ia duwen atail kak paiekihda atail kousapahlih mwomwen Siohwa eh ketin kapitala mehn Israel kan?

16 Rahnwet, Siohwa pil kin ketin nsenohki sapwellime aramas akan nin duwen pwihn ehu. E kin ketin sewese irail en kolokolete arail nanpwungmwahu reh oh pere irail sang arail  imwintihti kan. Oh e pahn ketin wiewiahte met erein kahn kamakam kohwalapo me pahn kereniong leledo. (Kaud. 7:9, 10) Eri mehnda ma irail pwulopwul de mah, roson de soumwahu, sapwellimen Koht aramas akan sohte pahn saloh de masepwehkada erein kahn kamakam kohwalapo. * Ni mehlel, dahme irail pahn wia weksang! Irail pahn tamataman sapwellimen Sises mahsen kan: “Kumwail uhda oh sarada pwehki komourpamwail kerendohr.” (Luk 21:28) Pil ni ahnsou me Kok, pwihn en wehi kan me ahneki manaman laudsang ahn Parao, pahn uhwongada irail, sapwellimen Koht aramas akan pahn likih me Siohwa pahn ketin pere irail. (Esek. 38:2, 14-16) Dahme kahrehda? Pwehki re ese me Siohwa sohte kin ketin wekila. E pahn pil ketin pwurehng kadehdehda me e wia Sounkomour men me kin ketin poakohng oh nsenohki sapwellime aramas akan.​—Ais. 26:3, 20.

17. (a) Ia duwen atail kak paiekihda ni atail onopki koasoipen Paipel kan duwen mwomwen Siohwa eh kin ketin nsenohki sapwellime aramas akan? (b) Dahme kitail pahn koasoiapene nan iren onop en mwuhr?

17 Nan iren onop wet, kitail kilang karasaras kei duwen Siohwa eh ketin nsenohki oh kasalehda kadek ni eh ketin apwalih, kaukaweid, oh kapitala sapwellime aramas akan. Ni omw kin doudouloale koasoipen Paipel pwukat, song en sukuhlki soahng kapw ehu duwen Siohwa ni omw rapahki oaritik kan me ele ke sohte tehkada mwoweo. Ni omw kalaudehla omw sukuhlki duwen sapwellimen Siohwa irair kaselel kan, omw poakohng oh pwoson ih pahn kehlailla. Nan iren onop en mwuhr, kitail pahn sukuhlki duwen ahl akan me kitail kak kahlemengih Siohwa sang ni atail pahn nsenohki meteikan nan atail peneinei, nan mwomwohdiso, oh nan doadoahk en kalohk.

^ par. 3 Soupoad en mehn Suhs kan, Josephus, nda me Samuel sounpar 12 ni ahnsowo.

^ par. 16 Kitail kak kamehlele me ekei me pitsang Armakedon pahn kakete ohla de sohte kak wia mehkot. Ni ahnsou me Sises ketiket sampah, e ketin kamwahwihala aramas akan me ahneki “soangen soumwahu” oh luwet koaros. Dahme e ketin wiao kasalehiong kitail dahme e pahn ketin wiahiong irail ko me pitsang Armakedon. (Mad. 9:35) Irail kan me pahn kaiasada pahn ahneki roson mwahu.