Pa 25 aña kaba, Testigunan di Yehova tin un website riba Internet. Nos a anunsiá e website watchtower.org na públiko den un artíkulo di Nos Ministerio di Reino di novèmber 1997. E artíkulo a bisa: “Sosiedat a pone algun informashon eksakto tokante e kreensia i aktividatnan di Testigunan di Yehova riba Internet. . . . E propósito di nos website no ta pa presentá publikashonnan nobo, sino pa hasi informashon disponibel n’e públiko den forma elektróniko.”

For di e tempu ei, hende por a download algun tratado, foyeto i artíkulo di E Toren di Vigilansia i Spièrta! for di watchtower.org. E website watchtower.org tabata disponibel pa públiko for di 15 di yanüari 1997. Despues, na aña 1999, e website jw-media.org a bira disponibel. Einan, e miembronan di prensa por a haña notisia verídiko tokante Testigunan di Yehova. E website ei tabatin, entre otro, notisia tokante asuntu legal i otro desaroyo den nos organisashon.

Na aña 2005, jw.org a bira disponibel pa públiko. Poko despues, hende por a kuminsá download algun publikashon i oudio for di e website ei.

Den luna di ougùstùs 2012, jw.org a haña un diseño nobo, i el a remplasá e otro websitenan ku nos tabatin. Nos Ministerio di Reino di desèmber 2012 a bisa lo siguiente tokante jw.org: “Un terser parti di e poblashon mundial ta usa Internet. Pa hopi hende, spesialmente hóbennan, Internet a bira e fuente prinsipal di informashon. . . . Pa medio di e website akí, e bon notisia ta yega na áreanan di mundu kaminda hende tin masha tiki chèns di tende e mensahe di Reino.”

Despues ku JW.ORG a bira disponibel, mas informashon i publikashon a bira disponibel riba e website, entre otro, informashon skirbí, oudio i vidio. E tempu ei, e website tabatin publikashon disponibel pa download na 411 idioma. Mas o ménos 7 aña despues ku e website a haña su diseño nobo, JW.ORG tabatin literatura na 1.000 idioma, inkluso 100 idioma di seña. Esei tabata algu históriko.

JW.ORG tabata hopi útil durante e pandemia di COVID-19. Mas i mas hende tabata subi riba nos website despues ku nos a stòp di bai reunion en persona i ku a bira mas difísil pa prent i distribuí literatura. Dia 7 di aprel 2020 tabatin Konmemorashon di Kristu Su Morto. Riba e dia ei, tabata promé biaha ku e website a haña mas ku 7 mion bishitante riba un dia. (E kantidat di bishitante ei ta basá riba loke nan ta yama na ingles unique visitors.) Na 2020, e website a haña mas ku un mil mion (1.000.000.000) bishitante. Esei ta hopi mas ku na 2019. E aña ei tabatin 800 mion bishita. Desde yanüari 2022, na averahe, e website ta haña 3 mion bishitante pa dia.

E website ta yuda hende haña informashon korekto tokante Testigunan di Yehova. Esei ta yuda kaba ku hopi prehuisio ku ta eksistí kontra Testigunan di Yehova. Por ehèmpel, Tenesha Gordon a bisa: “M’a gusta kon fásil tabata pa mi haña informashon tokante Testigunan riba e website. Mi por a haña sa ken Testigunan di Yehova ta, kiko nan ta kere aden i e base pa nan kreensianan. Esei a yuda mi komprondé ku algun di e kosnan ku mi tabata pensa tokante Testigunan di Yehova no ta bèrdat.”

Tenesha a batisá na 2017. Awor, e ta traha na e ofisina di sukursal na Jamaica.

Ruman Clive Martin ta superintendente di e departamento ku ta mantené e website. El a bisa: “Ta masha bunita pa mira kon Yehova a usa jw.org pa yuda asina tantu hende te na e partinan mas leu di tera haña e bon notisia tokante e Reino di Dios.”

Nos ta masha gradisidu ku Yehova a duna nos jw.org pa yuda nos prediká, yuda nos keda na altura di kambio den nos organisashon i yuda nos keda uní ku nos rumannan rònt mundu. E website akí ta alabá nos Dios Yehova.—Salmo 145:1, 2.