“Kasi tur hende tin nan mes teoria tokante ken [Hesukristu] ta. Sea ku nos tin fe òf nò, ta yega e momento ku nos tur lo puntra nos mes, ‘Ken e hòmber akí ta?’”—ESKRITOR STAN GUTHRIE.

HOPI hende ke sa mas di Hesus. Buki- i pelíkulanan ku ta trata e bida di Hesus a bira masha popular. No opstante, ainda hopi hende tin pregunta tokante Hesus i diferente opinion enkuanto ken e tabata realmente.

Algun aña pasá, dos periodista a pone un pregunta tokante Hesus riba Internet pa hende por a duna nan opinion. Nan a puntra: “Ken Hesus tabata?” Esaki ta loke algun hende a kontestá:

● “Aparentemente e tabata un rabi (maestro) ku a pone un ehèmpel den mustra kompashon.”

● “E tabata un hòmber simpel pero ku a hiba un bida ekstraordinario.”

● “No tin prueba ku Hesus a eksistí.”

● “Hesus ta e Yu di Dios kende a nase, muri i lanta for di morto pa libra nos di piká. E ta na bida awe, i lo e bolbe na tera.”

● “Ami ta kere ku Hesukristu ta e úniko yu di Dios. E ta hende, pero na mes momento e ta dios.”

● “Hesus ta un figura den kuenta di ada pa mucha grandi.”

Klaru ku tur e diferente puntonan di bista akí no por ta basá riba realidat. Awor, tin un solo fuente di informashon konfiabel ku por duna nos kontesta konvinsente pa e preguntanan ku nos tin tokante Hesus? E editornan di e revista akí ta kere ku Beibel ta e Palabra di Dios i ku ta via Beibel so nos por haña sa e bèrdat kompleto tokante Hesus. *—2 Timoteo 3:16.

Den e siguiente artíkulo nos lo wak kon Beibel ta kontestá algun pregunta ku hopi hende sa hasi tokante Hesus. Hesus mes a bisa ku e kaminda pa salbashon ta habrí pa “tur ku pone fe den dje.” (Huan 3:16) Nos ta animá bo pa analisá e kontestanan i disidí pa bo mes si bo tin ku siña mas tokante Hesus i tambe kon pa pone fe den dje.

[Nota]