Spiritu Santu​—Dikon Hende Ta Konfundí?

KIKO spiritu santu ta? E pregunta ta parse simpel, pero pa haña un kontesta simpel kisas ta mas difísil. Papa Benedikto XVI a bisa un multitut di hende na Oustralia: “Ta kasi imposibel pa komprondé presis kiko e Spiritu ta.”

Ta klaru ku tin hopi opinion i duda ora bo hasi e pregunta: Kiko e spiritu santu ta? At’akí algun kontesta ku hende sa duna:

• Spiritu santu ta un berdadero persona ku ta biba den Kristu su disipelnan.

• Spiritu santu ta Dios su presensia na mundu.

• Spiritu santu ta e terser persona di e Trinidat.

Dikon tin konfushon tokante spiritu santu? E konfushon ei a kuminsá den siglo 4 di nos era, ora algun teólogo a pretendé ku spiritu santu ta un persona ku di un òf otro manera ta igual ku Dios. Sinembargo, esaki no tabata algu ku e Skritura ni e promé siguidónan di Kristu a siña. E obra katóliko Diccionario de la Biblia, editá pa Serafín de Ausejo, ta splika: “Tèstamènt Bieu no ta konsiderá Dios su spiritu un persona . . . E ta e forsa ku Yahweh [òf Yehova] ta usa pa aktua.” E mesun fuente ta bisa tambe: “Gran parti di Tèstamènt Nobo ta mustra ku Dios su spiritu (òf, Spiritu Santu) ta algu i no un hende.” I tambe e ta bisa: “Esaki ta keda bisto den e similaridatnan ku tin entre e ekspreshonnan ‘Spiritu Santu’ i ‘poder.’”

Ta di komprondé ku hende ta haña difísil pa kere ku poder ta un persona. P’esei, un enkuesta resien na Merka ta indiká ku mayoria di hende ta rechasá e idea ku spiritu santu ta un persona. Nan tin rason? Òf nos mester kere e teólogonan ku ta insistí ku “Spiritu Santu ta un persona separá for di e Tata i e Yu”?

Pa nos haña un kontesta konfiabel, nos tin ku akudí na Beibel, e Palabra di Dios. E ta splika nos detayadamente kiko spiritu santu ta. Apòstel Pablo a skirbi: ‘Henter Skritura ta inspirá pa Dios i ta útil pa duna siñansa i pa refutamentu.’​—2 Timoteo 3:16, BPK.

Dikon ta importante pa bo buska pa sa e bèrdat tokante spiritu santu? Pasobra ora bo sa kiko spiritu santu ta, esei por yuda bo haña yudansa for di Dios. Bo sa sinti tin bes ku bo no por mas? Hesus a primintí su disipelnan: “Pidi, i lo wòrdu duná na boso . . . Si boso . . . sa di duna kosnan bon na boso yunan, kuantu mas boso Tata selestial lo duna e spiritu santu na esnan ku pidié!”​—Lukas 11:​9, 13.

Den e siguiente artíkulonan, nos lo laga e Skritura splika nos kiko spiritu santu ta. I nos lo mira ku e por tin un bon efekto riba nos bida.

[Komentario na página 3]

E Skritura ta splika nos kiko spiritu santu ta