Bida—Balioso òf Barata?

“Siendo ku hende ta kreá den e imágen di Dios, kitamentu di un hende su bida ta destrukshon di e kos mas balioso i mas sagrado na mundu.”—The Plain Man’s Guide to Ethics, di William Barclay.

‘EKOS mas balioso na mundu.’ Abo tambe ta konsiderá bida asina? Pero e manera ku hende ta komportá nan mes ta mustra bon kla ku hopi di nan no ta di akuerdo ku e eskritor ei. Personanan violento ku ta purba alkansá metanan egoista sin tene ningun tiki konsiderashon ku bienestar di nan próhimo, a kita miónes di bida kruelmente.—Eklesiastés 8:9.

Fásil pa Remplasá i Desechabel

Promé Guera Mundial ta un ehèmpel klásiko. Bes tras bes durante e konflikto teribel ei, “e kurpanan di hende a ser sakrifiká pòrnada,” segun historiadó A.J.P. Taylor. Den nan empeño pa alkansá prestigio i gloria, lidernan militar a usa sòldánan komo si fuera nan no tabata bal nada i tabata masha fásil pa remplasá. Den e bataya pa e stat Verdun na Fransia, mas ku mei mion hende a wòrdu matá. Taylor a skirbi relashoná ku esei: “No tabatin ningun premio [di un balor stratégiko] pa gana ni pèrdè, solamente hende pa mata i gloria pa gana.”—The First World War (E Promé Guera Mundial).

Te awe ta reina tal falta di rèspèt pa balor di bida. Akadémiko Kevin Bales ta señalá ku den último tempu, un “oumento drástiko di poblashon . . . a inundá e merkadonan laboral di mundu ku miónes di hende pober i vulnerabel.” Nan ta konfrontá un lucha ku lo dura henter nan bida, un lucha pa simplemente sobrebibí den un sistema komersial opresivo den kua “bida a pèrdè balor.” Segun  Bales, e hendenan ku ta oprimí nan ta trata nan kasi manera katibu, manera “instrumentonan kompletamente desechabel ku ta ser usá pa traha plaka.”—Disposable People (Hende Desechabel).

“Korementu Tras di Bientu”

Tin hopi motibu mas pakiko miónes di hende ta sinti nan mes desesperá, ku nan no ta bal apsolutamente nada i ku ningun hende realmente tin kunes si nan biba òf muri. Fuera di guera i inhustisia, tin e dañonan kousá dor di sekura, hamber, malesa, morto di sernan kerí i kantidat di otro kos ku ta afligí henter humanidat, lokual ta pone hende puntra nan mes si bida ta bale la pena.—Eklesiastés 1:8, 14.

Klaru ku no ta tur hende ta pasa un bida di miseria i angustia ekstremo. Pero asta esnan ku no a pasa dor di tal opreshon severo, hopi bes ta ekspresá e mesun pensamentu ku Rei Salomon di antiguo Israel, kende a puntra: “Kiko hende ta haña den tur su trabou i den su lucha ku kual e ta traha duru bou di solo?” Despues di pensa riba e asuntu, hopi hende ta realisá ku gran parti di loke nan a hasi a resultá di ta “banidat i korementu tras di bientu.”—Eklesiastés 2:22, 26.

“Ta esaki ta tur loke tin?” Asina hopi hende ta puntra ora nan wak bèk riba nan bida. Si bo wak bon, ta kuantu hende tin ku na final di nan bida ta sinti nan mes berdaderamente ‘satisfecho di nan bida,’ manera e patriarka Abraham a sinti? (Génesis 25:8) Mayoria hende ta kana ku e sintimentu ku tur kos ta banidat. Pero bida no tin nodi ta banidat. Dios ta konsiderá delaster un bida humano balioso i ke pa nos kada un hiba un bida realmente yen i satisfecho. Kon esei lo ser realisá? Konsiderá loke e siguiente artíkulo tin di bisa riba e tópiko aki.