Informe di Proklamadónan di Reino

Yudansa pa Sigui Trata Sanger Komo Algu Sagrado

RÒNT mundu sirbidónan di Yehova a demostrá nan lealtat na Dios relashoná ku e santidat di sanger. (Echonan 15:28, 29) E klase di esklabo fiel i prudente a perkurá yudansa pa e hermandat kristian. (Mateo 24:45-47) Laga nos wak kiko tabata e resultadonan na Filipina.

E sukursal di Filipina ta informá: “Na 1990 nos a ser informá ku representantenan di Bètel Brooklyn lo tene un seminario aki na Filipina. Rumannan for di vários sukursal di Asia a ser invitá, entre kua tabatin Korea, Taiwan i Hong Kong. E propósito tabata pa yuda nan kuminsá ku un Servisio di Informashon di Hospital na nan respektivo sukursalnan i tambe forma Komiténan di Kontakto ku Hospital. Aki na Filipina, na promé instante nos a forma komité den e kuater suidatnan prinsipal.” E komiténan lo a hasi esfuerso pa lokalisá dòkternan ku ta dispuesto pa koperá ku nos relashoná ku nos posishon komo kristian enkuanto sanger. Tambe nan lo a yuda rumannan ora ku surgi difikultat relashoná ku sanger.

Un dje rumannan ku a ser selektá pa sirbi den e Komité di Kontakto ku Hospital na Baguio tabata Remegio. Segun ku tempu tabata pasa, dòkternan a kuminsá mira importansia di e servisio aki. Remegio ta kòrda un okashon ku un kantidat di dòkter a reuní ku un Komité di Kontakto ku Hospital pa haña sa kon pa trata ku pashèntnan Testigu ku a nenga sanger. Remegio a bisa: “E dòkternan a kuminsá hasi pregunta, pero mi a sinti mi frustrá pasobra nan preguntanan tabata masha tékniko.” El a hasi orashon pidi Yehova yud’é trata ku e problema aki. Remegio a sigui bisa: “Despues di kada pregunta, otro dòkternan a hisa man i konta kon nan a trata ku un situashon similar.” Remegio a keda kontentu ku e yudansa, spesialmente pasobra e seshon di pregunta i kontesta a dura dos ora largu.

Awor tin 21 komité den henter e pais, i tin un total di 77 ruman ta sirbi den nan. Danilo, un Testigu ku ta dòkter a bisa: “Dòkternan ta realisá ku nan pashèntnan Testigu tin apoyo di un organisashon ku ta perkurá amorosamente pa nan.” Tabatin un dòkter ku na prinsipio a vasilá pa operá un ruman hòmber sin transfushon di sanger. Sin embargo, e ruman a para firme. E operashon a tuma lugá i e tabata un éksito. Servisio di Informashon di Hospital ta informá: “E dòkter a keda asombrá p’e manera ku e ruman hòmber a rekuperá. El a bisa: ‘Basá riba loke a sosodé aki, si kualkier di boso miembronan tin ku hasi e tipo di operashon aki sin usa sanger, gustosamente lo mi hasié.’”