For di Nos Lektornan

Halloween Relashoná ku boso artíkulo “Selebrashonnan Popular Ta Dibertishon Inofensivo?” (8 di òktober 2001), lo mi kier klarifiká algu. Boso ta referí na “Anochi di Guy Fawkes,” tambe konosí popularmente komo anochi di kandela grandi na Gran Bretania. Anochi di Guy Fawkes sigur ta un fiesta ku kristiannan mester evitá. E ta un fiesta polítiko, ku ta glorifiká ehekushon di un hòmber. Pero ounke e fecha di e fiesta aki (5 di novèmber) ta pegá ku Halloween i tin algun similaridat entre anochi di kandela grandi i Halloween, anochi di kandela grandi no ta parti di e fiesta spiritista di Halloween.

P. B., Gran Bretania

“Spièrta!” ta kontestá: Nos a skohe Halloween komo un ehèmpel di un kustumber popular ku tin un orígen desagradabel. Anto nos a menshoná e Fiesta di Lanterna di Taiwan i Anochi di Guy Fawkes komo selebrashonnan ku ‘parse’ Halloween den algun aspekto. Sin embargo, no tabata nos intenshon pa konektá e dos selebrashonnan aki ku Halloween òf indiká ku nan tin mesun orígen. Pero, en bista di nan similaridat ku Halloween​—⁠un selebrashon ku klaramente tin konotashon spiritista​—⁠lektornan ta hasi bon di konsiderá e orígen di e fiestanan aki ora di disidí si nan lo partisipá den nan òf nò.

Danki pa mustra kon Halloween ta konektá ku spiritismo. Hende ta mir’é komo algu inofensivo i dibertido, pero tin personanan ku a haña nan den problema serio pa motibu di dje. Muchanan ku ta kana rònt anochi por hasi nan mes daño òf haña mangel ku kos malu aden. Tabatin un mucha muhé den mi bario ku nan mester a hiba hospital. Algun tiner ta sinti ku Halloween ta un okashon pa kana rònt riba kaya i kousa daño na kas di hende. Un doño di kas a parti mangel ku bon intenshon, pero su generosidat a salié di malu; un mucha a gaña riba dje i akus’é falsamente di ta parti mangel ku kos malu aden. Apesar di tur esaki, Halloween ainda ta un selebrashon grandi den mi bario. Mi ta spera ku tur mi bisiñanan lo lesa boso ekselente artíkulo.

G. H., Merka

Hende Muhé Maltratá Danki pa e seri di portada “Yudansa pa Hende Muhé Maltratá.” (8 di novèmber 2001) Na mucha mi a mira kon mi tata tabata maltratá mi mama tur dia. Anto despues el a kuminsá maltratá ami ku mi ruman muhénan. Mi a krese ku un odio profundo kontra hende hòmber. Pero ku tempu nos a kuminsá studia Beibel ku Testigunan di Yehova. No tabata fásil pa Tata kambia su manera, pero ku Yehova su yudansa el a bin realisá ku e no por agradá Dios si e ta maltratá Su bunita kreashon. E kambionan a tuma lugá pokopoko, pero awor mi tata ta mansu manera un karné. Mi por stim’é di kurason.

G. B., Merka

Leif Eriksson Mi kier gradisí boso pa e artíkulo “Leif Eriksson​—⁠Ta É A Deskubrí Amérika?” (8 di òktober 2001) Nos ta siñando tokante Kolumbus den nos lèsnan di historia. Ora mi mener di skol a bisa nos ku ta Kolumbus a deskubrí Amérika, mi a hisa man i a bisa ku mi a lesa ku podisé ta Leif Eriksson a deskubrí Amérika 500 aña mas promé. Mi a hasi algun investigashon mas, i a print otro artíkulonan di Spièrta! tokante Kolumbus. Mi mener a lesa nan tur i a keda impreshoná ku tur loke mi a haña.

M. D., Alemania

Lesamentu di Beibel Danki pa boso artíkulo “Hóbennan Sa Puntra . . . Kon Mi Por Hasi Lesamentu di Beibel Mas Plasentero?” (8 di sèptèmber 2001) Semper mi tabata pensa ku lesamentu di Beibel ta algu laf i ku nunka lo mi kaba di lesa henter un buki diki asina. Pero ora mi a purba lesa e Beibel​—⁠despues di a lesa e artíkulo aki​—⁠mi a ripará ku e ta masha interesante. Awor mi ta lesa Beibel ku regularidat.

M. S., Alemania