Lamentablemente, rònt di mi 13 aña mi amistat ku Yehova a kuminsá fria. Mi a haña e impreshon ku mi kompañeronan di skol tabatin tur libertat di mundu; mi tambe tabata ke esei. E reglanan di mi mayornan i e normanan kristian a kuminsá bira pisá pa mi i kosnan spiritual a bira un karga. Aunke nunka mi no tabata duda ku Yehova tabata eksistí, mi no tabata asina será kuné mas.

Mi tabata hasi nèt lo sufisiente den sirbishi pa mi no bira inaktivo. Nunka mi no tabata prepará pa sirbishi i mi no tabata bon den kuminsá òf sigui ku un kòmbersashon. I debí na esei, mi sirbishi no tabata produktivo, mi a pèrdè mi goso i mi tabatin ménos gana di sali den sirbishi. Mi tabata puntra mi mes: ‘Ta kon un ruman por hasi e kos akí dia aden, dia afó?’

Ku mi 17 aña, mi tabata ke ta riba mi mes. Pues, mi a piki tur mi kosnan i bai Australia. Esei a kibra kurason di mi mayornan. Nan tabata preokupá, pero nan a spera ku lo mi a sigui ku mi rutina spiritual.

 Na Australia, mi a bira mas suak spiritualmente. Apénas mi tabata bai reunion. E hóbennan ku mi tabatin amistat kuné tabata hasi meskos ku mi. Nos tabata bai reunion awe i pa mañan sali, bebe i baila den diskotèk. Awor mi ta realisá ku mi tabatin un pia den bèrdat i un pia den mundu, pero mi no tabata felis den niun di dos.

Rònt di dos aña despues, mi a konosé un ruman muhé ku sin ku el a realisá a laga mi para ketu na kon mi ta hibando mi bida. Nos tabata sinku ruman muhé soltera ta biba den un kas. I nos a invitá e superintendente di sirkuito i su kasá, Tamara, pa bin keda un siman serka nos. Miéntras su esposo tabata atendé asuntunan di kongregashon, Tamara tabata pasa tempu ku nos i tur ora bai nos tabata bou di harimentu. Bo por a papia masha trankil kuné. Mi a gusta esei mashá. Nunka mi no a spera ku un hende asina spiritual por ta asina gezellig.

Tamara tabata brota di entusiasmo. E amor ku e tabatin pa e bèrdat i sirbishi tabata kontagioso. E tabata felis di duna Yehova lo mihó, miéntras ami tabata infelis dunand’e lo mínimo. Su aktitut positivo i berdadero goso tabatin un impakto hopi profundo riba mi bida. Su ehèmpel a laga mi kòrda un bèrdat importante: Yehova ta deseá pa nos tur sirbié “ku goso” i ku gritu di alegria.—Sal. 100:2.

Mi ke tabatin e mesun goso ku Tamara, pero pa mi por a haña esei mi mester a hasi kambionan grandi. A tuma tempu, pero mi a kuminsá hasi algun kambio chikitu. Mi a kuminsá prepará pa sirbishi, anto ratu ratu mi tabata traha pionero ousiliar. Esei a yuda mi ta ménos nèrvioso i sinti mi mas sigur di mi mes. Debí ku mi tabata usa Beibel mas, mi a disfrutá mas di sirbishi. No a tarda mashá ku mi a kuminsá traha pionero ousiliar tur luna.

 Mi a sera amistat ku rumannan di tur edat ku tabata duna Yehova lo mihó i tabata disfrutá di nan sirbishi na Yehova. Nan bon ehèmpel a yuda mi analisá mi prioridatnan i kuminsá lesa Beibel tur dia. Mi a kuminsá gusta sirbishi mas ainda i ku tempu mi a bira pionero regular. Pa promé biaha despues di hopi aña mi a sinti mi bon i felis den e kongregashon.

Un aña despues mi a konosé Alex, un ruman masha amabel i ku di bèrdat tabata stima Yehova i sirbishi. E tabata sirbidó ministerial i tabatin seis aña komo pionero. El a yega di bai Malawi pa prediká kaminda tabatin nesesidat. Einan el a pasa tempu ku algun misionero ku tabata bon ehèmpel p’e, i nan a anim’é pa sigui pone e Reino na promé lugá.

Na 2003 nos a kasa, i for di e tempu ei nos a sigui den sirbishi di tempu kompleto. Nos a siña hopi lèsnan bunita i Yehova a bendishoná nos sin fin.

Na 2009, nos a haña invitashon pa bira misionero na Ost Timor, un pais chikitu den tur e islanan di Indonesia. Nos tabata sorprendí, kontentu i nèrvioso; tur kos pareu. Sinku luna despues nos a yega na e kapital, Dili.

E bida na Ost Timor tabata kompletamente diferente for di loke nos tabata kustumbrá kuné. Tur kos tabata nobo pa nos, kultura, idioma, kuminda i e manera di biba. E hendenan den teritorio tabata hopi pober, tabatin masha tiki edukashon i tabata oprimí. Hopi di nan tabatin problema físiko i emoshonal debí na e guera i violensia ku nan a eksperensiá. *

 Pero sirbishi tabata masha dushi! Por ehèmpel, mi a topa Maria, * un mucha di 13 aña ku tabata hopi tristu. Un par di aña promé su mama a muri, i apénas e tabata mira su tata. Meskos ku hopi mucha di su edat, e no tabata sa kiko e ke den bida. Mi ta kòrda un biaha ku e tabata konta mi ku awa na wowo tur loke e tabatin den su kurason. Pero mi no por a komprondé ni un pia di palabra di loke e tabata bisa mi pasobra mi no tabata sa su idioma masha bon. Mi a pidi Yehova yuda mi anim’é, i despues mi a kuminsá lesa tekstonan ku tabata konsol’é. Ku tempu mi por a mira kon e bèrdat a kambia Maria su aktitut, su manera di bisti i asta su bida. El a batisá, i awor e ta dirigí su mes estudionan di Beibel. Awe, Maria tin un famia spiritual grandi ku ta stim’é mashá.

Yehova ta bendishonando e trabou na Ost Timor. Aunke mayoria di e publikadónan a batisá den e último dies añanan, hopi di nan ta pionero, sirbidó ministerial òf ansiano. Algun ta traha na e ofisina di tradukshon i ta yuda tradusí publikashonnan bíbliko na e idiomanan lokal. Mi tabata kontentu pa mira nan kanta na reunion, pa mira nan smail i pa mira nan krese den sentido spiritual.

Ta bèrdat ku bida na Ost Timor tabata hopi diferente for di Australia. Pero, mi no por imaginá un bida mas dushi ku esei. Tabatin biaha nos tabata den bùs chikitu yen yen di hende tur primí riba otro, meimei di piská seku i stapel di bèrdura for di plasa lokal. Otro biaha, nos tabata dirigí estudio den kasnan chikitu ku tabatin flur di tera. Paden tabata hasi hopi kalor i galiña tabata kore rònt. Apesar di tur difikultat, hopi biaha mi tabata pensa: ‘No tin un bida mas dushi ku esaki!’

Ora mi pensa bèk, mi ta gradisidu na e esfuerso ku mi mayornan a hasi pa siña mi Yehova su kaminda i pa yuda mi asta durante e tempunan difísil di mi hubentut. Loke Proverbionan 22:6 ta bisa a konta pa mi. Tantu Mama komo Tata ta orguyoso di ami ku Alex, i nan ta kontentu pa mira kon Yehova ta usa nos. Desde 2016, nos ta sirbiendo den e trabou di sirkuito den e teritorio di e sukursal di Australasia.

Mi no por kere ku un tempu mi no tabata gusta sirbishi pasobra awor mi gust’é un mundu! Mi a realisá ku sin importá kiko pasa den bo bida, sea bon òf malu, berdadero goso ta bini solamente ora bo sirbi Yehova ku henter bo kurason. Anto bèrdat, e último 18 añanan ku mi a sirbi Yehova huntu ku Alex tabata e añanan di mas felis di mi bida. Awor mi ta komprondé ku loke e salmista David a bisa Yehova ta bèrdat: “Laga tur esnan ku ta tuma refugio den bo alegrá nan mes; laga nan kanta di alegria pa semper. . . . Laga esnan ku ta stima bo nòmber regosihá den bo.”—Sal. 5:11.