▪ Библи куыд дзуры, афтӕмӕй Хуыцауӕн райдиан нӕй. Хуыцау алкӕддӕр уыд. Хуыцау ӕнусты дӕргъы кӕй ис, уый кӕд адӕймаг зынтӕй ӕмбары, уӕддӕр уый ууыл дзурӕг нӕу, ӕмӕ уымӕн гӕнӕн нӕй.

Адӕймаг Хуыцауы хъуыддӕгтӕ кӕронмӕ никуы бамбардзӕн. Апостол Павел фыста: «О, куыд ӕнӕкӕрон сты Хуыцауы хорздзинӕдтӕ, йӕ зонд ӕмӕ йӕ зонындзинӕдтӕ! Кӕй зонд аххӕсдзӕн йӕ уынаффӕтыл, ӕмӕ йын чи раиртасдзӕн йӕ хъуыддӕгтӕ!» (Ромӕгтӕм 11:33). Мах Хуыцауы стыр зонд ӕмӕ зонындзинӕдтӕ кӕронмӕ никуы бамбардзыстӕм, гыццыл сывӕллон йӕ ныййарджыты хъуыддӕгтӕ кӕронмӕ куыд нӕ фембары, афтӕ. Ацы стихы Павел сӕйраджыдӕр кӕны Хуыцауы ӕмбисонды зонд ӕмӕ фӕлмӕнзӕрдӕдзинады кой, фӕлӕ уӕддӕр йӕ ныхӕстӕй бӕрӕг у, нӕ зонд Йегъовӕ Хуыцауы миниуджытыл ӕмӕ хъуыддӕгтыл кӕй никуы аххӕсдзӕн. Уыдонмӕ ахӕссӕн ис, Хуыцауӕн райдиан кӕй нӕй, уый дӕр. Фӕлӕ нӕ бон у, Библи Хуыцауы тыххӕй цы дзуры, ууыл фидарӕй ӕууӕндын. Йесо Чырысти Сыгъдӕг Фыстады тыххӕй афтӕ загъта: «Дӕ ныхас у ӕцӕгдзинад» (Иоанны 17:17).

Моисей Йегъовӕмӕ куы куывта, уӕд загъта: «Ды алкӕддӕр уыдтӕ ӕмӕ алкӕддӕр уыдзынӕ» (Псалом 90:2, «The Holy Bible, New Century Version»). Моисей загъта, Йегъовӕ ӕнустӕм кӕй уыдзӕн. Йегъовӕ у, «ӕнусӕй-ӕнусмӕ чи цӕры», уыцы Хуыцау (Раргомад 4:10). Стӕй алкӕддӕр уыдзӕн ӕмӕ цӕрдзӕн ӕнустӕм. Моисей ма ноджыдӕр загъта, Хуыцау раздӕр дӕр кӕй уыди, ома йӕ ничи сфӕлдыста, никӕй фӕрцы фӕзынд. Йегъовӕ раздӕры заманты алкӕддӕр уыди.

Ӕрмӕстдӕр Хуыцауы ис схонӕн «ӕнусты Паддзах» (1 Тимофеймӕ 1:17). Йесо Чырыстийӕн, ӕнӕнымӕц уӕларвон зӕдтӕн ӕмӕ адӕмӕн та ис райдиан, уымӕн ӕмӕ сӕ Хуыцау сфӕлдыста (Колоссӕгтӕм 1:15, 16). Хуыцауы та ничи сфӕлдыста. Кӕд хъуыды кӕнӕм, Хуыцауы чидӕр сфӕлдыста, зӕгъгӕ, уӕд афтӕ нӕ уайы, ӕмӕ йын йӕхи дӕр чидӕр кӕй хъуамӕ сфӕлдыстаид? Ӕрмӕстдӕр Йегъовӕ у «ӕнусӕй-ӕнусмӕ» (Псалом 90:2). Ӕндӕр ныхасӕй, Йегъовӕ уыди «ӕнусты размӕ дӕр» (Иудӕйы 25).

Йегъовӕ ӕнусон Хуыцау кӕй у, уый адӕймагӕн у ныфсы хос. Моисейы ныхӕстӕм лӕмбынӕг куы ’ркӕсӕм, уӕд ӕй фендзыстӕм, ӕнусон Хуыцау зӕрдӕ цы ӕнӕкӕрон цардӕй ӕвӕры, уый кӕй нӕ фӕмӕнг уыдзӕни. Ӕмӕ кӕд нӕ цард у тынг цыбыр, уӕддӕр Хуыцау у «нӕ фидар мӕсыг фӕлтӕрӕй-фӕлтӕрмӕ». Нӕ уарзӕгой Фыд Йегъовӕ йӕ адӕмимӕ алкӕддӕр уыд, ис ӕмӕ алкӕддӕр уыдзӕн. Ацы диссаджы хабар дын дӕ зӕрдӕйы ныфс нӕ уадзы? (Псалом 90:1).