Wulu kɔ nuhua edwɛkɛ ne azo

wulu kɔ menu ngyikyi ne azo

Gyihova Alasevolɛ

Nzema

Nyamenle Belemgbunlililɛ Ne A Le Duzu?

Nyamenle Belemgbunlililɛ Ne A Le Duzu?

Baebolo ne mualɛ

Nyamenle Belemgbunlililɛ le arane mɔɔ wɔ ɛkɛ mɔɔ Gyihova Nyamenle ɛhyehyɛ a. Eza bɛfɛlɛ “Nyamenle Belemgbunlililɛ ne” “anwuma Belemgbunlililɛ” wɔ Baebolo ne anu, ɔluakɛ ye tumililɛ ne vi anwuma. (Maake 1:14, 15; Mateyu 4:17, King James Version) Ninyɛne mɔɔ ɔyɛ la bie mɔ nee sonla tumililɛ le ko, noko ye tumililɛ ne kpogya tɛla bɛ.

  • Menli mɔɔ ɔ nee bɛ bali tumi. Nyamenle ɛkpa Gyisɛse Kelaese kɛ ye Belemgbunlililɛ ne azo Belemgbunli yɛɛ yemaa ye tumi yedɛla alesama mɔɔ ɛlɛdi tumi la amuala. (Mateyu 28:18) Gyisɛse ɛva tumi ɛhye ɛli gyima kpalɛ, ɔluakɛ yelimoa yela ye ali kɛ ɔle adekilevolɛ mɔɔ se anwunvɔne yɛɛ bɛkola bɛfa bɛ nwo bɛto ɔ nwo zo. (Mateyu 4:23; Maake 1:40, 41; 6:31-34; Luku 7:11-17) Gyisɛse ɛlua Nyamenle adehilelɛ zo yekpa menli mɔɔ vi maanle maanle kɔsɔɔti anu la kɛ bɛ nee ye ɛli tumi wɔ anwuma na ‘bɛyɛ arelemgbunli wɔ azɛlɛ ye azo.Yekile 5:9, 10.

  • Mekɛ tendenle. Ɔnle kɛ sonla arane mɔɔ bɛkakyi bɛ la, ‘awie ɛnrɛhola ɛnrɛzɛkye Nyamenle Belemgbunlililɛ ne kenle bie maanle nu.Daneɛle 2:44.

  • Maanlema. Awie biala mɔɔ yɛ mɔɔ Nyamenle kulo la bavea Nyamenle Belemgbunlililɛ ne abo ɔnva nwo ɛleka mɔɔ bɛwole ye anzɛɛ ɔvi la.Gyima ne 10:34, 35.

  • Mɛla. Mɛla mɔɔ Nyamenle Belemgbunlililɛ ne fa maa la ɛndua ɛbɛla ɛtane ala. Ɔmaa ye maanlema ne bɔ ɛbɛla kpalɛ. Kɛ neazo la, Baebolo ne ka kɛ: “Fa wɔ ahonle muala, wɔ ɛkɛla muala, nee wɔ adwenle muala kulo Awulae wɔ Nyamenle ne. Ɛhye a le mɛla titile kpalɛ mɔɔ hyia a. Mɔɔ tɔ zo nwiɔ la le kɛ ɛhendeɛ ne la, ɔse: ‘Kulo ɛ gɔnwo kɛ ɛdawɔ ɛ nwo la.’” (Mateyu 22:37-39) Ɛlɔlɛ mɔɔ Belemgbunlililɛ ne maanlema lɛ maa Nyamenle nee bɛ gɔnwo mɔ la maa bɛboa bɛ nwo ngoko.

  • Ndetelɛ. Nyamenle Belemgbunlililɛ ne ɛva ngyinlazo mɔɔ kpogya la ɛmaa ye maanlema, na ɔkilehile menli ɔmaa bɛdi ngyinlazo ɛhye mɔ azo.Ayezaya 48:17, 18.

  • Bodane. Nyamenle Belemgbunlililɛ ne ɛmmaa menli mɔɔ sie ye maanlema la ɛnsisi bɛ. Emomu, ɔbamaa Nyamenle ɛhulolɛdeɛ nee ɛwɔkɛ mɔɔ yebɔ kɛ menli mɔɔ kulo ye la badɛnla aze dahuu wɔ paladaese la ara nu.Ayezaya 35:1, 5, 6; Mateyu 6:10; Yekile 21:1-4.