Twalyandile kale ukusayiwa nikemo lya kitabulilo kya Kristu. Mwakifwanikisyo, ukwendela nkitabulilo, Yehova ikutuhobokela ubutulanongwa bwitu. Umwene atikufimbilisiwa itolo ukuti atuhobokele. Loli ikulonda ukutuhobokela. (Sa 103:​3, 10-13) Bamo babaghile ukuketa ukuti bakabaghila ukuhobokeliwa na Yehova. Bwanaloli ukuti tukabaghile ukuhobokeliwa. Untumiwa Pauli asyaghenie ukuti ‘akabaghile nukuyobiwa ukuya ntumiwa.’ Loli pope atile: “Loli mwipyana lya Kyala ndi bo mumo njilile.” (1 Kor. 15:​9, 10) Linga tulapile ubutulanongwa bwitu, Yehova ikutuhobokela. Nongwa yafiki? Komma panongwa yakuti syo tukulondiwa loli panongwa yakuti atughanile. Linga mukutamiwa naminong’ono panongwa yakwiketa ukuti mukaya bakulondiwa, mukumbukeghe ukuti Yehova abikile ikitabulilo ku bandu abatulanongwa aba balapile komma ku bandu abagholofu.—Luka 5:32; 1 Tim. 1:15. w25.01 26-27 ¶3-4

Tukabaghila ukubakanisya abandu ukuti baleke ukutubombela nukutuyobela ifindu ifibibi. Kangi ikindu ikyakulondiwa fiyo ko kuhobokelana. Nongwa yafiki? Panongwa yakuti tunganile Yehova kangi ikulonda ukuti tubahobokeleghe abangi. Linga tutikubahobokela abangi, tukabaghila ukubomba ifindu mwamahala kangi tubaghile ukwanda ukutamiwa naminong’ono. Linga tubahobokile abinitu sikututula ukuti twipilikeghe kanunu mundumbula. Sikututula kangi ukuti tuleke ukwinong’onela fiyo isi syabombiwe nukwanda ukuhoboka nubumi. Ngimba findu fiki fibaghile ukubatula ukuti mungakalalagha? Injila yimo ko kwitikisya ukuti akabalilo kakindepo. Linga umundu ambilile ubutuli ubwakukipatala ikulondiwa akabalilo ukuti abumbuluke nukwanda ukwipilika kanunu. Mwakufwana itolo, tukulondiwa akabalilo ukuti twande ukwipilika kanunu mundumbula bo tukali ukunhobokela umwinitu yumo ukufuma pasi pandumbula. (Ndumbi. 3:3; 1 Pet. 1:22) Munsumeghe Yehova ndwiputo ukuti abatule ukuti mubahobokeleghe abangi. w25.02 16-17 ¶8-11

Ifimanyisyo ifi twamanyile pakwanda, fikongelelapo ukuchenja utuyilo twitu, ulwitiko, ulosyo nukusyuka kwa bafwe. (Hib. 6:​1, 2) Ifimanyisyo ifi fyo ifi Abakristu bosa bikusubila. Yonongwa yake untumiwa Peteri afiyobile ifimanyisyo ifi pakabalilo aka afumusyagha kukilundilo pa Pentekosti. (Imbo. 2:​32-35, 38) Tukulondiwa ukumanyila ifimanyisyo ifi ukuti tunkongeghe Kristu. Mwakifwanikisyo, Pauli ayobile ukuti linga tutikusubila ukuti ukusyuka kwisakuyako, ko kuti tukaya Bakristu banaloli. (1 Kor. 15:​12-14) Ukuti tukule mwambepo, tukulondiwa ukumanya nyingi pankhani iyi ukukinda isi tumanyile. Mwakukindana nifimanyisyo fyapakwanda, ifyakulya ifikafu fikongelelapo ukusimanya indaghilo sya Yehova nifundo syake, isi sikututula ukumanya aminong’ono ghake. Ukuti ifyakulya ifi fitutule, tukulondiwa ukumanyila, ukwinong’onelapo, nukukonga isi tukumanyila Mmasyu gha Kyala. Linga tukubomba isi, ko kuti tukwimanyisya ukuti tusaleghe ifindu ifi fikunhobosya Yehova. w24.04 5 ¶12-13

Kyala alinkumbwisye Yona ukuti abandu ba ku Ninive “basita nongwa nayimo.” (Yona 1:​1, 2; 3:10; 4:​9-11) Ukufuma apo, Yesu abombile ikifwanikisyo iki ukuti abamanyisye abandu isyakufwana nubugholofu bwa Yehova nikisa kyake. Loli ngimba amasyu aghakuti Abaninive “bisakusumukagha mbulongi,” ghikusanusya isyafiki? Yesu ayobagha isya aba “bisakusyukilagha kukulongiwa.” (Yoh. 5:29) Umwene ayobagha isya Bulaghili Bwake Ubwa Fyinja 1000, pakabalilo aka bosa “abagholofu nabasitabugholofu” bisakusyukagha. (Imbo. 24:15) Abandu abasitabugholofu, “bisakusyukilagha kukulongiwa.” Isi sikusanusya ukuti linga abandu aba basyukile, Yehova na Yesu bisakuketagha linga abene bikupilikila nukukonga isi bisakumanyilagha. Linga yumo Mwabaninive isakukana ukumwiputa Yehova, atisakwikala nubumi kwa bwila na bwila. (Yes. 65:20) Loli bosa aba basalile ukumwiputa Yehova mbusubiliwa, bisakuya nulusako ulwakwikala kwa bwila na bwila.—Dan. 12:2. w24.05 5 ¶13-14

Yesu abanangisyagha abandu ikisa mwakufwana itolo na Tata wake. (Yoh. 14:9) Muno Yesu abombelagha ifindu nabandu, sikutumanyisya ukuti Yehova wakisa kangi abaghanile abandu abatulanongwa nukuti ikulonda ukuntula aliwesa ukulimbana nubutulanongwa. Yesu abatulile abandu abatulanongwa ukuti bachenje nukwanda ukunkonga. (Luka 5:​27, 28) Yesu asimenye isi ayagha pakwaghana nasyo. Mwakwandisania, ababulagha abafundiwa bake ukuti isakubikiwa mmaboko ghabalughu nukughoghiwa pampiki uwakutamiliwapo. (Mat. 17:22; 20:​18, 19) Umwene asimenye ukuti ikemo lyake lisakusosyapo ubutulanongwa bwa nkisu. Kangi Yesu ayobile ukuti linga abikile ubumi bwake, ‘isakubakwabilagha kumyake bosa.’ (Yoh. 12:32) Abandu abatulanongwa bayagha pakunhobosya Yehova linga bitikisyagha ukuti Yesu yo Mwalafyale wabo nukukonga amakato ghake. Linga babombile isi, pabumalilo bayagha ‘pakwabuliwa kubutulanongwa.’ (Rom. 6:​14, 18, 22; Yoh. 8:32) Yonongwa yake Yesu alondiwagha ukunangisya ubukifu ukuti afwe inifwa iyakubaba ukuti abapoke abandu.—Yoh. 10:​17, 18. w24.08 5 ¶11-12

Amwinong’onele muno mwalipilikile bo mumanyile ubwanaloli. Mwaketile ukuti Tata winu wakumwanya abaghanile, ikulonda ukuti muye ku lubafu lwake, umwene ikuya pakusosyapo indamyo syosa isi mukwaghana nasyo kangi aba bafwile bisakusyuka. (Mrk 10:​29, 30; Yoh. 5:​28, 29; Rom. 8:​38, 39; Ubuset. 21:​3, 4) Ukumanya ubwanaloli kwabatulile ukuya balusekelo. (Luka 24:32) Mubughanile ubwanaloli kangi mukulonda ukubabulako abangi. (Fwanikisya na Yeremiya 20:9) Linga tubughanile ubwanaloli ubwakufuma mu Baibolo tukuya pakubabulako abangi. (Luka 6:45) Tukukolelana nabafundiwa ba Yesu aba bayobile ukuti: “Buno uswe tukabaghila ukuleka ukusiyoba isi tusibwene nisi tusipilike.” (Imbo. 4:20) Tubughanile ubwanaloli yonongwa yake tukuya pakukindilila ukubabulako abangi. w24.05 15 ¶5; 16 ¶7

Pakuya babombi ba Yehova, tukufumusya kubandu panongwa yakuti tunganile Tata witu wakumwanya kangi tukulonda ukubatula abandu ukuti bammanye. Loli bamo bikuketa ukuti kukafu fiyo ukuti bahobokeghe nubufumusi. Nongwa yafiki? Bamo babaghile ukuya nisoni nukuketa ukuti bakaya bamanyisi banunu. Bamo batikuya babuke ukubuka kunyumba sya bandu kisitakukoleliwa. Lumo bamo batikulonda ukuti abandu babasusyeghe. Abakamu na balumbu aba, bikuketa ukuti kukafu ukuyobesania amasyu amanunu nabandu aba bakabamanya. Ngimba utubalilo tumo kukuya kukafu ukuya balusekelo mubufumusi pafifukwa ifi? Linga mo siyilile, komma ukuwa amaka. Ukwikayikila kwinu kukunangisya ukuti mutikulonda ukwiketa ukuya bakulondiwa fiyo kangi mutikulonda ukuti mulimbaneghe nabandu. Kangi akayapo uyu ikulonda ukuti abakalalisyeghe abangi, fiyofiyo linga ikughelaghela ukubabombela inunu. Tata winu wakumwanya ikumanya muno mukwipilikila kangi ikulonda ukubatula.—Yes. 41:13. w24.04 14 ¶1-2

Bo mukubelenga Ibaibolo, mmalo mwakubombesyela imbombo fyosa ifi mubelengile pakabalilo kamokene, muketeghe isi mubaghile ukufwanisya ukukonga. Mugheleghe ukubomba isi: Lemba ifindu ifi mukulondiwa ukubomba. Ukufuma apo, musalepo kimokyene pamo fibili nukwanda ukufibomba. Ifindu ifingi musafibombe akabalilo akangi. Ngimba mubaghile ukwandila poki? Mubaghile ukusala ukwanda ukubomba ifindu ifinandinandi ifi mubaghile ukufwanisya. Mubaghile ukwanda ukuchenja ifighaba ifi mukuketa ukuti fyakulondiwa fiyo ukuchenja. Linga musalile ukubomba simo, mufufuzeghe mmabuku ghitu. Mwiputeghe kwa Yehova kangi munsumeghe ukuti abapepo “isi mukulonda na isi mukubomba.” (Filip. 2:13) Ukufuma apo, mubombeghe isi mumanyile. Linga ifindu fyandile ukwenda kanunu panongwa yakuti mufwanisye ukuchenja ikindu ikyakwanda, mukuya pakukasiwa ukuti muchenje ifingi. w24.09 6 ¶13-14

Mubaghile ukutamiwa kangi naminong’ono panongwa ya findu fimo ifibibi ifi mwabombile kunyuma ifi fyabakalalisye abangi. Ngimba findu fiki fibaghile ukubatula? Mubombeghe syosa isi mubaghile ukufwanisya ukuti mutendekesye ifi mwalyonangile pakwanda nukupepesya. Munsumeghe Yehova ukuti abatule aba bapalamasiwe panongwa ya findu ifibibi ifi mwababombile. Yehova abaghile ukubatula umwe na aba mwabonangile ukuti mukindilileghe ukumbombela umwene nukuya palutengano. Mumanyilengepo simo pa isi musobile kangi mwitikisyeghe ukuti Yehova ababombesyele imbombo munjila yiliyosa iyi ikulonda. Inong’onela ikifwanikisyo kya nsololi Yona. Mmalo mwakubuka ku Ninive kuno Kyala alintumile, umwene abukile kubungi. Yehova alimfundile kangi Yona amanyilepo simo pa isi asobile. (Yona 1:​1-4, 15-17; 2:​7-10) Yehova akalekile ukumbombesyela Yona pakuya nsololi. Alimpele ulusako ulungi ukuti abuke ku Ninive kangi Yona apilikile. Akalitikisye ukuti isi asobile kunyuma sintolesye ukubomba ububombeli ubu Yehova alimpele.—Yona 3:​1-3. w24.10 8-9 ¶10-11

Yehova atikusosyapo ingongole pamo imbibi itolo loli ikusyomola syosa. Mwakifwanikisyo, inong’onela ukuti umundu uyu mukopileko indalama, abahobokile kangi agwalile unzele pandalama iyi mukopile. Nalinga ukuti aliwesa abaghile ukuketa indalama isi sikuboneka panzele, loli linga afufutile sikabaghila ukuboneka. Ukuti tupilikisye kanunu isi, tukulondiwa ukukumbuka ukuti nkabalilo kakunyuma babombelagha inki iyi yapangiwe na carbon, lubani, kangi namisi. Umundu ayagha pakufufuta mwanakalinga ifi balembagha. Polelo, ingongole yafufutiwagha yosa. Abandu batoliwagha ukuketa ifi fyalembiwe pakwanda. Syafwanagha itolo ukuti ingongole yikalipo. Syakuhobosya fiyo ukumanya ukuti linga Yehova atuhobokile imbibi syitu, atikusikumbukila kangi.—Sa 51:9. w25.02 10 ¶11

Linga bamo bikutuketa ububibi pamo bikutunyoza, tusubileghe ukuti Yehova yo asimenye syosa. Isi sibaghile ukututula ukwifimbilisya kufindu ifisitabugholofu panongwa yakuti tusimenye ukuti Yehova ikuya pakusosyapo ifindu ifisitabugholofu fyosa. Linga tukunsubila Yehova nukughulila ukuti amasye indamyo syosa tutikuya pakukalala nukubabenga abangi. Ukubakalalila abangi kubaghile ukupangisya ukuti tubombe ifindu ifibibi, kukutupoka ulusekelo lwitu, nukonanga ubumanyani bwitu na Yehova. Bwanaloli ukuti tukabaghila ukufwanisya ukukonga fyosa ifi Yesu abombagha. Utubalilo tumo, tubaghile ukubomba pamo ukuyoba simo isi panyuma pake tubaghile ukwiyipa inongwa. (Yak. 3:2) Kangi ifindu fimo ifisitabugholofu, fibaghile ukutupangisya ukuti tutamiweghe naminong’ono kangi kubaghile ukuya kukafu ukwifimbilisya. Linga momuno siyilile kumyinu, mukulondiwa ukumanya ukuti Yehova asimenye isi mukwaghana nasyo. Kangi Yesu uyu yope alyaghenepo nifindu ifisitabugholofu, abaghile ukubapilikisya muno mukwipilikila. (Hib. 4:​15, 16) Tukuhoboka fiyo linga Yehova ikutupa ubulongosi ubu bukututula ukwifimbilisya kufindu ifisitabugholofu. w24.11 6 ¶12-13

Tukulondiwa ukuya nulwitiko mwa Yesu ukuti “tusabwaghe ubumi bwa bwila.” (Yoh. 3:​16-18, 36; 17:3) Abayuda bingi bakasubilagha ifimanyisyo fya Yesu ifyakufwana nukuya nulwitiko mmyake. Abene balindalusisye ukuti: “Kupelagha kika kiliku lelo ukuti tukibone tukwitikeghe?” (Yoh. 6:30) Ukufuma apo, bayobile ukuti abandu bankabalilo ka Mose bambililagha amana mwakuswighisya ukuya fyakulya fyabo fya isiku ni siku. (Nehe. 9:15; Sa 78:​24, 25) Sikuboneka ukuti binong’onelagha fiyo isya fyakulya fya kumbili. Kangi batoliwe ukundalusya Yesu ukuti abalinganie kanunu isi ayobile isyakufwana “nikisyesye ikya naloli ikifuma kumwanya,” iki kyafwene itolo namana aghakufuma kumwanya aghakupa ubumi. (Yoh. 6:32) Abene binong’onelagha fiyo isya findu fyakumbili nukuleka ukupilikisya ku isi Yesu abamanyisyagha isyakufwana nubumi bwa bwila na bwila. w24.12 5-6 ¶10-11

Linga ali kusukulu umwaninu abaghile ukumanyila isya findu fya nkipeliwa ifi fikuboneka mwakufwana itolo. Mwakifwanikisyo, imipiki mingi isamba syake sikuboneka mwakufwana itolo. Linga umpiki ghukukula ghundakwa ukwiyabania nukuya samba. Isi sikukoleliwa ukuti fractal. Uluko ulungi lwa fractal lukwaghiwa kangi mu findu ifingi fya nkipeliwa. Loli ngimba yonani uyu apelile ifindu ifi ukuti fibonekeghe finunu bo ulu? Linga umwaninu ikwinong’onela amalalusyo bo agha, sikuya pakuntula ukusubila ukuti Kyala yo uyu apelile ifindu fyosa. Utubalilo tumo mubaghile ukunndalusya ilalusyo ilyakuti, “Linga Kyala yo uyu atupelile uswe, ngimba sikaya syakupilikiwa ukuyoba ukuti atupele ubulongosi ubwa muno tubaghile ukuyila balusekelo?” Ukufuma apo, mubaghile ukuyoba kangi ukuti ubulongosi ubununu ubu bukwaghiwa mu Baibolo. w24.12 16 ¶8

Ukwendela mwambepo mwikemo, untumiwa Pauli alembile kalata nukulingania ukuti uyu atikulapa epusiwe nkipanga. (1 Kor. 5:13) Ngimba Abakristu balondiwagha ukubomba nawe bulebule? Pauli ababulile ukuti “bangonganagha” nawe. Ngimba isi syasanusyagha isyafiki? Pauli alingenie ukuti ululaghilo ulu lukongelelapo ukuti “nafi fyakulya mungalyagha nawe.” (1 Kor. 5:11) Ukulya pampene numundu bo uyu ifyakulya kubaghile ukupangisya ukuti mwande ukwangala nawe. Pauli asanusyagha ukuti ikipanga kikalondiwagha ukubomba nawe pampene ifindu. Isi syayagha pakukifighilila ikipanga kufindu ifibibi. (1 Kor. 5:​5-7) Kangi isi syayagha pakuntula ukuti asyaghanie ukuti abombile ifindu ifibibi kwa Yehova kangi abaghile ukukosiwa isoni nukulapa. w24.08 15 ¶4-5

Ukuti Abaisraeli bayeghe pabumanyani ubununu nawe, Yehova abikile ulubatiko lwa kabalilo akapimba ulwakuti imbibi syabo sihobokeliweghe. Abaisraeli balondiwagha ukusekela isiku limo ikyinja kilikyosa. Isiku ili lyakoleliwagha ukuti Isiku lya Kwikemesya. Pisiku ili, umputi unkulumba abikagha amakemo gha finyamana mmalo mwa bandu. Loli amakemo gha finyamana, ghakasosyangapo ubutulanongwa bosa ubwa mundu panongwa yakuti ifinyamana fikaya fyakulondiwa fiyo ukukinda abandu. Loli linga Abaisraeli aba batulile inongwa balapile ukufuma pasi pandumbula nukubika ikemo ili Yehova alondagha, Kyala abahobokelagha imbibi syabo syosa. (Hib. 10:​1-4) Amakemo agha babikagha Pisiku lya Kwikemesya ghabatulagha Abaisraeli ukumanya ukuti abene batulanongwa. Loli Yehova abikile ulubatiko ulwakuti abahobokeleghe abandu imbibi syabo syosa. Kyala atendekisye ukuti Umwanake unganiwa uyu “alikemesisye kamokene itolo, abusosyepo ubutulanongwa bwa bingi.” (Hib. 9:28) Yesu abikile “ubumi bwake ukuya kitabulilo kya bingi.”—Mat. 20:28 NWT. w25.02 4 ¶9-10

“Imbepo sya nkati syo sitike, loli umbili gho monywa.” (Mat. 26:41b) Amasyu agha, ghikulingania ukuti Yesu ikupilikisya ukuti tuli basitabugholofu. Loli amasyu ghake ghikutusoka ukuti: Tungisubilagha ukuti akabalilo kosa tukuya pakubomba inunu. Pisiku lila, abafundiwa bayobile ukuti batikuya pakundeka Yesu. (Mat. 26:35) Abene balondagha ukubomba inunu. Loli bakamenye ukuti linga baghene nindamyo babaghile ukutoliwa ukubomba inunu. Yonongwa yake, Yesu abasokile mwakubombela amasyu agha ghikwaghiwa mwilemba lya mwisyughu. Syakitima ukuti abafundiwa batoliwe ukuya maso. Pakabalilo aka Yesu apinyiwe, ngimba abafundiwa balindekile Yesu pamo bali nawe? Panongwa yakuleka ukuya maso, abene balindekile mwene Yesu.—Mat. 26:56. w24.07 14 ¶1-2

Adamu na Eva, balyonangile ubumanyani bwabo na Tata wabo, Yehova. Pakwanda Adamu na Eva bali mumbumba ya Kyala. (Luka 3:38) Loli bo batoliwe ukupilikila, Yehova abasosisyemo mumbumba iyi bo bakali ukwanda ukuya nabana. (Bwa. 3:​23, 24; 4:1) Pakuya banabo, twalondiwagha ukusayana na Yehova. (Rom. 5:​10, 11) Mmasyu aghangi, twalondiwagha ukuya pabumanyani na Kyala. Ibuku limo likuti ilisyu lya Nkigiriki ili balibombile ukuti “ukusayana” libaghile ukusanusya ukuti “ukuya pabumanyani ubununu nundughu wako.” Syakuhobosya fiyo ukuketa ukuti Yehova yo uyu atalile ukubombapo simo ukuti tuye nawe pabumanyani. Ngimba abombile bulebule? Ukwendela ndubatiko lwa ikemo ulu Yehova abikile ukuti aghomolelepo ubumanyani ubununu pakati pamwene nabandu abatulanongwa. Isi sikongelelapo ukughomolelapo ikindu iki kifwene itolo na iki kyataghiwe. Munjila bo iyi, ikindu iki kiyongile pamo kyonangiwe kibaghile ukughomokesiwapo. w25.02 3-4 ¶7-8

Untumiwa Pauli ayobile ukuti “umundu bo yuyuyu lumfwene ulufundo ulu afundiwe nabandu ba bingi.” (2 Kor. 2:​5-8) Mmasyu aghangi, ulufundo ulu lwalimbaghile umundu uyu pabwandilo aghonile nunkasi wa tata wake. (1 Kor. 5:1). Nongwa yafiki? Ukuti alape ubutulanongwa bwake. (Hib. 12:11) Yonongwa yake Pauli akibulile ikipanga ukuti: “Munsweghe nukunsubisya” unkamu uyu onangile, kangi “munangisyeghe ulughano lwinu.” Mukulondiwa ukumanya ukuti Pauli alondagha ukuti ikipanga kibombeghe nyingi ukukinda ukumwambilila itolo umundu nkipanga. Pauli alondagha ukuti abakamu banangisyeghe ukuti banganile nukunhobokela ukwendela mfyakubomba nifyakuyoba. Isi sibaghile ukunangisya naloli ukuti ambililiwe nkipanga. w24.08 15 ¶4; 16-17 ¶6-8

Untumiwa Pauli amenye kanunu isi umundu alondiwagha ukubomba ukuti ifimbilisyeghe. Umwene abakumbwisye Abakristu ukuti linga bikwifimbilisya kundamyo, batikulondiwa ukwisubila bene loli bansubileghe Yehova. Isi syo syalintulile Pauli ukuti aye nkifu, yonongwa yake ayobile ukuti: “Yehova yo ntuli wangu; Ndisakutilagha nafimo.” (Hib. 13:6) Amasiku agha, abakamu na balumbu bamo bikwifimbilisya panongwa yakufwimiwa. Injila yimo iyi tubaghile ukubanangisya ulughano ko kubiputila. Kangi utubalilo tumo tubaghile ukubatula mwakubapa ifi bikulondiwa. Ibaibolo likuyoba mwakupilikiwa kanunu ukuti “bosa aba bikulonda ukuya nubumi bwa kuntila Kyala mwa Kristu Yesu, bo bisakufwimiwagha.” (2 Tim. 3:12) Pakifukwa iki, twesa tukulondiwa ukwitendekesya akabalilo akapalapala aka kikwisa. Lino isagha tukindilileghe ukunsubila Yehova nukuya nulusubilo losa ukuti umwene ikuya pakututula ukwifimbilisya kundamyo yiliyosa iyi tubaghile ukwaghana nayo. Pakabalilo kake, umwene isakubapa ubutusyo ababombi bake bosa abasubiliwa.—2 Tes. 1:​7, 8. w24.09 13 ¶17-18

Ngimba findu fiki fyabatulile Abakorinti ukuti bosiwe? (2 Kor. 10:​4, 5.) Amasyu gha Kyala na mbepo wake mwikemo fyabatulile ukuchenja ifindu fingi pabumi bwabo. (Hib. 4:12) Abandu ba ku Korinti aba balitike amasyu amanunu gha Kristu, bafwanisye ukuleka utuyilo twabo utubibi bo ukughala ubwalwa, ubuhiyi nukughonana kwa banyambala pamo abakikulu benebene. (1 Kor. 6:​9-11) Mukulondiwa ukumanya ukuti nalinga ukuti Abakorinti bamo bali nutuyilo utubibi utu balondiwagha ukumalana nato loli bakinong’onagha ukuti kubaghile ukuya kukafu kumyabo ukuti baye Bakristu. Abene baliyipile fiyo ukuti bende panjila iyakubuka ku bumi bwa bwila na bwila. (Mat. 7:​13, 14) Ngimba mukutamiwa ukumalana nakayilo kinu akabibi pamo ifyakubomba fibibi ukuti mosiwe? Mutikulondiwa ukuwa amaka. Munsumeghe Yehova ukuti abapeko mbepo mwikemo ukuti ghubatule ukuti mungabombagha ifindu ifibibi. w25.03 6 ¶15-17

Yehova afingile ukuti ikuya pakutupa amahala ghamuno tubaghile ukusalila ifindu ifyakunhobosya. Umwene ikubapa amahala “bosa itolo kisitakwilamwa, kangi kisitakulumbusya.” Linga musumile ubutuli kwa Yehova, muketeghe muno ikuya pakwamulila. Mwakifwanikisyo: Linga muli pabulendo kangi mukayimanya injila, mubaghile ukunndalusya umundu uyu ikwikala ku malo agha ukuti abatule. Loli ngimba mubaghile ukusokapo bo akali ukubatula? Hayi. Mubaghile ukupilikisya kanunu bo ikubanangisya injila. Mwakufwana itolo, linga musumile ubutuli kwa Yehova mughelegheleghe ukughagha amaansala nifundo sya mu Baibolo pankhani iyi. Mwakifwanikisyo, bo mukusala ikyakubomba pankhani yakubuka, mubaghile ukwinong’onela isi Ibaibolo likuyoba pankhani ya fyakusangalusya ifibibi, abamanyani ababibi, nukubika ifindu fya Bunyafyale pamalo aghakwanda mmalo mwa findu fyakumbili.—Mat. 6:33; Rom. 13:13; 1 Kor. 15:33. w25.01 16 ¶6-7

Ubusololi bwa Yesaya, bukuyoba isyakukindana uku kulipo pakati pa bandu aba bali mwa paladaiso wamwambepo na aba bali panja. Yehova ikubapa abandu bake ubutuli bwamwambepo na isi bikulondiwa. Tuli nambepo mwikemo, Amasyu ghake, kangi ni fyakulya fya mwambepo ifi ikutupa ukuti tulyeghe, . . . ukunwa, . . . [kangi] nukuya balusekelo.” (Fwanikisya na Ubusetuli 22:17.) Abandu aba bakayamo mwa paladaiso wamwambepo uyu, “bikuya ni njala . . . , bikumilwa . . . , [kangi] nukutamiwa.” Abandu aba batikummanya Yehova. (Amosi 8:11) Yehova ikubapa abandu bake ifi bikulondiwa ukongelelapo ifyakulya fya mwambepo. (Yoeli 2:​21-24) Mwakifwanikisyo, umwene ikutupa Amasyu ghake ukwendela mu Baibolo na mabuku ghitu agha ghikulingania isya Ibaibolo, iwebusayiti yitu, ingomano syakipanga, isya dela nisya kighaba. Tukukasiwa fiyo panongwa yakuya nifindu ifyamwambepo ifi isiku lililyosa. Yonongwa yake tukuya nu bumi ubununu kangi nubutusyo. w24.04 21 ¶5-6

Linga mukulonda ukwanda ikibwezi numundu yumo, mubaghile ukwitendekesya ukuti muyobesanie numundu uyu maso na maso pamo pafoni. Mulinganie kanunu muno mukwipilikila isyakufwana numwene. (1 Kor. 14:9) Linga kwakulondiwa, mumpe akabalilo ukuti inong’onelepo tasi bo akali ukubamula. (Mbu. 15:28) Kangi linga atikulonda ukuti muye nawe pakibwezi, mughindikeghe aminong’ono ghake. Loli bule linga umundu yumo ikubalonda ukuti muye nawe pakibwezi? Bwanaloli ukuti umundu ikulondiwa ukuya nkifu ukuti ayobesanie nanumwe, yonongwa yake mukulondiwa ukwamula mbololo kangi mwalughindiko. Linga mukulonda ukuti mukinong’onelepo tasi bo mukali ukumwamula mumbule. Loli mughelegheleghe ukumwamula mwanakalinga. (Mbupi. 13:12) Linga mutikulonda ukuya nawe pakibwezi, mundinganie mbololo kangi mwakupilikiwa kanunu. Linga mukulonda ukuya pakibwezi numundu yumo, muyobesanie muno mukwipilikila na isi mukughulila linga mwandile ikibwezi. Isi mukughulila sibaghile ukukindana nisya mwininu. w24.05 23-24 ¶12-13

Bo wakilumyana, Davidi abukile ku musasa wa balwabwite ba ku Israeli. Abalwabwite ba ku Israeli, bali nulutende panongwa yakuti Umfilisiti yumo uyu ali yo Goliyati ayobile ukuti, “nikubaywelula abalwabwite bosa mbanya Israeli.” (1 Samu. 17:​10, 11) Abalwabwite bali nulutende panongwa yakutila muno Goliyati abonekelagha kangi na isi ayobagha. (1 Samu. 17:​24, 25) Loli mukaya momuno Davidi aketelagha. Umwene aketagha ukuti Goliyati akabatukagha Abaisraeli loli antukagha “Kyala umumi.” (1 Samu. 17:26) Davidi inong’onelagha isya Yehova. Kangi asubilagha ukuti Kyala uyu alintulile pakabalilo kabutimi, yo uyu ayagha pakuntula napakabalilo kala. Panongwa yabutuli bwa Kyala, Davidi alwile na Goliyati kangi alintolile.—1 Samu. 17:​45-51. w24.06 21 ¶7

Inong’onela muno ubumi bwitu bwayagha pakuyila linga tukambombelagha Yehova. Ukubomba isi, kubaghile ukututula ukuya basubiliwa nukuyoba bo muno ayobile uwamasalimo ukuti: “Loli une, isyene inunu ukukinda syo syakuya mbupipi mwa Kyala.” (Sa 73:28) Tubaghile ukwaghana nindamyo nyingi nkabalilo kakubumalikisyo aka panongwa yakuti tusalile ukuti “tumbombeleghe Kyala umumi uwa naloli.” (1 Tes. 1:9) Kyala witu atughanile kangi ikuya pakututula akabalilo kosa. Umwene abatulagha ababombi bake abakunyuma, kangi ikuya pakuya nanuswe amasiku agha. Mwalululu, ubutolwe ubukulumba bukuya pakwanda. Loli tutikuya pakuya twibene, Yehova ikuya pakuya nanuswe. Tukulondiwa “ukuyoba nubukifu ukuti: ‘Yehova yo ntuli wangu; ndisakutilagha nafimo.’”—Hib. 13:​5, 6. w24.06 25 ¶17-18

Ibaibolo likutubula ingamu isyakukinda 40 isya banyambala aba bali banyafyale ba Israeli. Abanyafyale abanunu bope babombile ifindu fimo ifibibi. Inong’onela isya Mwalafyale unnunu Davidi. Yehova atile: “Umbombi wangu Davidi . . . endagha mu ndaghilo syangu kangi asikongagha ni ndumbula yake yosa.” (1 Banyaf. 14:8) Loli Davidi abombile ubulowe nunkasi wamundu kangi atendekisye injila isyakuti angoghe undume wa nkikulu uyu kubwite. (2 Samu. 11:​4, 14, 15) Ibaibolo likutubula kangi isya banyafyale abangi aba bali banunu loli bakakindilile ukuya basubiliwa kwa Yehova. Inong’onela isya Rehoboamu. Yehova alinjobile Rehoboamu ukuya mwalafyale uyu “alinkubomba imbibi.” (2 Sya. 12:14) Loli Rehoboamu abombile ifindu fimo ifinunu. Mwakifwanikisyo, alimpilikile Yehova bo ikumbula ukuti angalwagha ubwite nifikolo 10 ifya Israeli nukubabula ukuti basale umwalafyale uyungi. Umwene apangisye kangi ukuti utwaya twingi tuye twamaka fiyo mbunyafyale bwake ukuti abafighilile ababombi ba Kyala ku balughu babo. (1 Banyaf. 12:​21-24; 2 Sya. 11:​5-12) Ngimba Yehova amanyagha bulebule ukuti umwalafyale uyu nsubiliwa? Syanangisyagha ukuti umwene aketile mundumbula yake muno alapile kangi na muno iyipilagha pakwiputa kwa bwanaloli w24.07 20 ¶1-3

Ngimba abakulumba babaghile ukubomba isyafiki linga umwana uyu osiwe kangi akafwanisya ifyinja 18 abombile ubutulanongwa ubunywamu? Akabughatila kabakulumba kikuya pakupanga imbatiko ukuti abakulumba babili baghane numwana uyu nabapapi bake Abakristu. Abakulumba bikuya pakubalalusya abapapi isi babombile ukuti bantule umwanabo ukuti achenje nukulapa. Linga umwana uyu ikunangisya akayilo akanunu kangi ikupilikila ubulongosi ubwakufuma ku bapapi, abakulumba babili babaghile ukusala ukuti bangakindililagha kangi ninkhani iyi. Kangi abakulumba bikumanya ukuti Yehova abapele ubudindo abapapi ukubafunda abanabo mwalughano. (Kukumbu. 6:​6, 7; Mbupi. 6:20; 22:6; Ef. 6:​2-4) Ukufuma apo, abakulumba bikulondiwa ukubalalusya abapapi ukuti bamanye linga umwanabo ikwambilila ubutuli ubwakulondiwa. Loli bule linga umwana uyu osiwe atikulapa kangi ikukindilila ukubomba utuyilo utubibi? Linga momuno siyilile, abakulumba batatu bikuya pakwaghana nawe pampene na bapapi bake. w24.08 24 ¶18

Tusimenye ukuti twesa tukuya balusekelo linga twambilile ikyabupe. Loli tukuya balusekelo fiyo linga tukubapa abangi. Panongwa yakuti Yehova atupelile munjila iyi, tukongelela ulusekelo lwitu. Tubaghile ukongelela ulusekelo lwitu linga tukulwaghilapo ulusako lwakubatula abangi. Syakuhobosya fiyo ukuti Yehova atupelile munjila inunu bo iyi. (Sa 139:14) Amalemba ghikutubula ukuti ukupa kukutwala ulusekelo, yonongwa yake tutikuswigha ukuti Ibaibolo likunjoba Yehova ukuya “Kyala walusekelo.” (1 Tim. 1:11 NWT) Yehova yo wakupa kangi wamaka. Bo muno untumiwa Pauli ayobile ukuti panongwa ya Yehova, “tuli bumi, tukwenda, kangi tuliko.” (Imbo. 17:28) Bwanaloli ukuti, “ifyabupe fyosa ifinunu, nifyabupe fyosa ifipelelesye” fyo fikufuma kwa Yehova. (Yak. 1:17) Twesa tukulonda ukuya nulusekelo ulu lukwisa panongwa yakupa. Tubaghile ukubomba isi mwakukonga akayilo akakupa aka Yehova.—Ef. 5:1. w24.09 26 ¶1-4

Panyuma pakuyobesania utuyilo utu umundu ikulondiwa ukuya nato ukuti imikiwe ukuya nkulumba wakipanga, abatuli bakipanga babaghile ukwipilika ukuti bakabaghiliwa ukuya bakulumba bakipanga. Loli mukumbukeghe ukuti Yehova pamo igulu lyake, batikulonda ukuti munangisyeghe utuyilo tosa utu mbugholofu. (1 Pet. 2:21) Mwakongelelapo, mbepo wa Yehova ughu wamaka fiyo, gho ughu ghukuntula umundu ukuya nutuyilo bo utu. (Fil 2:13) Ngimba kalipo akayilo kamo aka mukwiyipa fiyo ukuti muye nako? Munsumeghe Yehova ukuti abatuleghe. Mufufuzeghe ukuti mumanye nyingi isya kayilo aka mukulonda ukuya nako kangi munsume yumo mwa bakulumba ukuti abapepo amasakisyo gha muno mubaghile ukubombela ukuti muye nakayilo aka mukulonda. Munsumeghe Yehova ukuti abatuleghe nukubamanyisya ukuti mumbombeleghe nyingi umwene nikipanga. (Yes. 64:8) Yehova abasayeghe pasyosa isi mukubomba ukuti mubaghiliwe ukwimikiwa ukuya nkulumba wakipanga. w24.11 25 ¶17-18

Tutikulondiwa ukwinong’ona ukuti Yehova ikulondiwa ukutuhobokela panongwa yakuti tumbombile kwa fyinja fingi. Bwanaloli ukuti Yehova ikundaghisya panongwa yabusubiliwa bwitu. Umwene atupele Umwanake ukuya kyabupe kya itolo, komma ukuti atuhombe panongwa yakuti tukumbombela. Yonongwa yake kubaghile ukuya kubibi fiyo ukwinong’ona ukuti Yehova ikulondiwa ukutuhobokela panongwa yakuti tumbombile ifindu fingi. Linga tukwinong’ona bo ulu, kokuti tukusanusya ukuti Yesu akalondiwagha ukutufwila.—Fwanikisya na Bagalatiya 2:21. Untumiwa Pauli asimenye ukuti akabaghiliwe ukuhobokeliwa na Yehova. Loli nongwa yafiki iyipagha fiyo ukumbombela? Umwene abombile isi ukuti anangisye ukunndaghisya Yehova panongwa ya kisa kyake ikikulumba. (Ef. 3:7) Mwakufwana itolo na Pauli, tukukindilila ukwiyipa pakumbombela Yehova komma ukuti atunangisye ikisa loli ukuti tunangisye ukundaghisya. w25.01 27 ¶5-6