Okubatizibwa Niki?
Eki Baibuli erikugarukamu
Okubatizibwa n’okwibikira kimwe omuntu omu maizi maingi. a Okubatizibwa kwingi nikugambwaho omu Baibuli. (Ebyakozirwe 2:41) Kumwe aharikwo n’okwa Yesu, owaabatiziibwe omu Mugyera Yorudaani. (Matayo 3:13, 16) Bwanyima y’emyaka, omushaija Omwesiopia akabatizibwa omu ‘maizi’ agaabaire gari haihi n’oruguuto oru yaabaire naarabamu.—Ebyakozirwe 8:36-40.
Yesu akeegyesa ngu abakuratsi be nikibeetengyesa kubatizibwa. (Matayo 28:19, 20) Entumwa Petero akahamiiriza enyegyesa egyo.—1 Petero 3:21.
Omu kicweka eki
Okubatizibwa nikimanyisa ki?
Okubatizibwa n’ekikorwa ekirikureebwa, nari okworeka muranga ngu omuntu ayeteisize ebibi bye, kandi yaaraganisa Ruhanga kukora ebi arikukunda. Eki nikitwariramu okuguma nooyorobera Ruhanga na Yesu. Omuntu yaabatizibwa, naaba yaaza omu muhanda gw’okutunga amagara agatahwaho.
Okwibikwa omu maizi n’akamanyiso kahikire akarikworeka empinduka ezi omuntu arikuba akozire. Mu muringo ki? Baibuli neegyeragyeranisa okubatizibwa n’okuziikwa. (Abarooma 6:4; Abakolosai 2:12) Ku arikwibikwa omu maizi, naaba ari nk’owaafa aha bikwatiraine n’emitwarize ye ey’enyima. Ku arikutuuhuuka omu maizi, naaba ari nk’owaatandika embeera nsya nk’Omukristaayo oyehaireyo.
Baibuli neegamba ki aha kubatiza abeereere?
Baibuli terikugamba aha kubatizibwa kw’abeereere. b Kandi terikugira ngu abeereere baaba batabatiziibwe nibaba bari abakaafiire.
Okubatiza abeereere tikirikuhikaana n’Ebyahandiikirwe. Baibuli neeyegyesa ngu omuntu orikwenda kubatizibwa aine kugira ebi yaahikiiriza. Nk’eky’okureeberaho, aine kuba naayetegyereza enyegyesa ezirikutandikirwaho eziri omu Kigambo kya Ruhanga, kandi arikukora ebirikuhikaana n’enyegyesa ezo. Naaba ayeteisize ebibi bye. Kandi kurabira omu kushaba, naahayo amagara ge ahari Ruhanga. (Ebyakozirwe 2:38, 41; 8:12) Abeereere tibarikubaasa kukora ebintu ebi.
Nikimanyisa ki okubatiza omu iziina rya Tataitwe n’Omwana, n’omwoyo gurikwera?
Yesu akaragiira abakuratsi be ‘kuhindura abantu abeegi babatize omu iziina rya Isheboona n’ery’Omwana n’ery’omwoyo gurikwera, n’okubeegyesa kworobera byona ebi yaabaragiire.’ (Matayo 28:19, 20) Okubatizibwa “omu iziina rya” nikimanyisa ngu ogwo orikuza kubatizibwa naayetegyereza obushoboorozi n’omwanya gwa Isheboona, n’Omwana, n’omwoyo ogurikwera. Nk’eky’okureeberaho: Entumwa Petero akagambira omushaija owaabaire amugire kuruga omu buto ati: “Omu iziina rya Yesu Kristo owa Nazareesi, imuka ogyende!” (Ebyakozirwe 3:6) Eki nikimanyisa ngu Petero akaba naamanya obushoboorozi bwa Kristo, kandi yaareeba ngu niwe araakore eky’okutangaaza eki.
“Isheboona” ni Yehova c Ruhanga. Obu Yehova ari Omuhangi, Obukomooko bw’Amagara, kandi ow’Obushoboorozi bwona niwe arikukirayo.—Okutandika 17:1; Okushuuruurwa 4:11.
“Omwana” ni Yesu Kristo, owaahaireyo amagara ge ahabwaitu. (Abarooma 6:23) Titurikubaasa kujunwa twaba tutamanyire omwanya gwa Yesu, kandi tukamwikiriza omu kigyendererwa eki Ruhanga ainiire abantu.—Yohaana 14:6; 20:31; Ebyakozirwe 4:8-12.
‘Omwoyo gurikwera’ n’amaani ga Ruhanga agarikukora. d Ruhanga akakoresa omwoyo gurikwera kuhanga ebintu, kubiha amagara, kuha baanabi be n’abandi obutumwa, n’okubaha amaani g’okukora ebi arikwenda. (Okutandika 1:2; Yobu 33:4; Abarooma 15:18, 19) Kandi Ruhanga akakoresa omwoyo gwe gurikwera, kuhwera abaahandiikire Baibuli kuhandiika ebiteekateeko bye.—2 Petero 1:21.
Okubatizibwa omurundi ogundi shi n’ekibi?
N’ekintu ekirikukira kubaho omuntu yaahindura ediini ye. Kandi shi omuntu ku yaakuba yaabatiziibwe omu kanisa ye? Naaba yaakora ekibi yaagaruka akabatizibwa? Abamwe nibagira ngu eego barikwihirira aha biri omu Abaefeso 4:5, aharikugira hati: “Omukama omwe, okwikiriza kumwe, okubatizibwa kumwe.” Kwonka, ekyahandiikirwe eki tikirikumanyisa ngu omuntu tarikubaasa kugaruka kubatizibwa. Kita shi?
Ebikyetooroire. Ebyetooroire Abaefeso 4:5 nibyoreka ngu entumwa Paulo akaba naayoreka ngu ni kikuru Abakristaayo kugira obumwe omu bi barikwikiriza. (Abaefeso 4:1-3, 16) Obumwe nk’obwo bukaba nibwija kubaho baaba nibakuratira Mukama omwe Yesu Kristo, baaba baine okwikiriza kumwe, nari barikwetegyereza eki Baibuli erikwegyesa, kandi barikukuratira emisingye y’Ebyahandiikirwe niyo emwe erikukwata aha kubatizibwa.
Entumwa Paulo akahiga bamwe abaabaire baabatiziibwe kugaruka kubatizibwa ogundi. Eki kikaba nikyetengyesa ahabw’okugira ngu bakabatizibwa batarikwetegyereza gye enyegyesa z’Ekikristaayo.—Ebyakozirwe 19:1-5.
Enshonga ehikire erikureetera omuntu kubatizibwa. Kubaasa kusiimwa Ruhanga, okubatizibwa kushemereire kuba nikwegamira aha kumanya amazima ga Baibuli. (1 Timoseo 2:3, 4) Omuntu yaabatizibwa arikwihirira aha nyegyesa z’ediini ezitarikuhikaana na Baibuli, okubatizibwa okwo nikuba kutarikusiimwa Ruhanga. (Yohaana 4:23, 24) Omuntu ogwo naabaasa kuba yaabaire aine ebigyendererwa birungi, kwonka naaba atarakikozire kurugiirira aha kumanya okuhikire. (Abarooma 10:2) Kubaasa kusiimwa Ruhanga, naaba aine kwega amazima ga Baibuli, akagyendera aha bi ayegire, akahayo amagara ge ahari Ruhanga, kandi akagaruka akabatizibwa ogundi. Omu mbeera nk’ezi, okugaruka kubatizibwa ogundi nikiba kitari kibi. Nangwa, nikiba kiri ekintu ekihikire kukorwa.
Okubatizibwa okundi okurikugambwaho omu Baibuli
Baibuli neegamba aha kubatizibwa okundi okurikutaana aha kw’abakuratsi ba Kristo. Yetegyereze eby’okureeberaho ebimwe.
Okubatiza kwa Yohaana. e Abayudaaya n’Abaahindukire, Yohaana akababatiza nk’akamanyiso akarikworeka ngu beeteise ebibi byabo ahabw’okushobya ebiragiro bya Musa. Okubatiza kwa Yohaana kukatebeekanisa abantu ngu bamanye Mesia Yesu owa Nazareesi, kandi bamwikirize.—Luka 1:13-17; 3:2, 3; Ebyakozirwe 19:4.
Okubatizibwa kwa Yesu. Okubatizibwa kwa Yesu arikubatizibwa Yohaana Omubatizi kukaba kuri okw’omutaano. Yesu akaba ahikiriire kandi tarakozire bibi. (1 Petero 2:21, 22) N’ahabw’ekyo, okubatizibwa kwe kukaba kutarikutwariramu okweteisa, nari okugira “omutima ogutarikweshinja.” (1 Petero 3:21) Kureka, kukaba nikworeka ngu ariyo naayehayo ahari Ruhanga nka Mesia owaabaire araganisiibwe nari Kristo. Eki kikatwariramu okuhayo amagara ge ahabwaitu.—Abaheburaayo 10:7-10.
Okubatizibwa n’omwoyo gurikwera. Bombi Yohaana Omubatiza na Yesu Kristo bakagamba aha kubatiza n’omwoyo gurikwera. (Matayo 3:11; Luka 3:16; Ebyakozirwe 1:1-5) Okubatiza oku tikyo kimwe n’okubatiza omu iziina ry’omwoyo gurikwera. (Matayo 28:19) Ahabw’enki eki kiri kityo?
Bakye aha bakuratsi ba Yesu nibo barikubatizibwa n’omwoyo gurikwera. Aba nibashukwaho omwoyo gurikwera ahabw’okugira ngu nibeetwa kuza kuheereza na Kristo omu iguru nk’abagabe kandi abanyamurwa. f (1 Petero 1:3, 4; Okushuuruurwa 5:9, 10) Nibaija kuba nibategyeka obukaikuru bw’abantu abarikukurata Yesu, kandi abaine amatsiko g’okutunga amagara agatahwaho omu Paradiso omu nsi.—Matayo 5:5; Luka 23:43.
Okubatizibwa kutaaha omuri Yesu Kristo n’okufa kwe. Abarikubatizibwa n’omwoyo gurikwera kandi nibabatizibwa “kutaaha omuri Kristo Yesu.” (Abarooma 6:3) N’ahabw’ekyo okubatizibwa oku nikukwata aha bakuratsi ba Yesu abashukirweho omwoyo gurikwera, abarikwija kutegyeka nawe omu iguru. Ahabw’okubatizibwa kutaaha omuri Yesu, nibahinduka ekibiina eky’abashukirweho omwoyo gurikwera. Yesu niwe mutwe, kandi bo n’omubiri.—1 Abakorinso 12:12, 13, 27; Abakolosai 1:18.
Abakristaayo abashukirweho omwoyo gurikwera kandi nibabatizibwa “kutaaha omu kufa [kwa Yesu].” (Abarooma 6:3, 4) Barikutooreza Yesu, niboorobera Ruhanga kandi beefeerereza omugisha gw’okutunga amagara agatahwaho omu nsi. Nibataaha omu kubatizibwa oku okw’akamanyiso baaheza kufa reero bakazooka bakaza omu iguru nk’ebihangirwe eby’omwoyo.—Abarooma 6:5; 1 Abakorinso 15:42-44.
Okubatizibwa n’omuriro. Yohaana Omubatiza akagira ati: ‘[Yesu] we naija kubabatiza n’omwoyo gurikwera n’omuriro. Orugari rwe ruri omu ngaro ze, naija kweyerera gye embuga ye, ahunikye oburo [engano] omu kitara kye, kwonka ebishushunga naija kubyotsya omu muriro ogutarikuraara.’ (Matayo 3:11, 12) Yetegyereze ngu okubatiza n’omuriro nikutaana n’okubatiza n’omwoyo gurikwera. Yohaana akaba naamanyisa ki okukoresa eky’okureeberaho eki?
Oburo nari engano nikimanyisa abarikuhurikiza Yesu bakamworobera. Baine amatsiko g’okubatizibwa n’omwoyo gurikwera. Ebishushunga nibijwekyera abatarikuhurikiza Yesu. Muheru yaabo n’okubatizibwa n’omuriro, ekirikujwekyera okucwekyererezibwa kimwe.—Matayo 3:7-12; Luka 3:16, 17.
a Ekigambo ky’Orugriika ekirikwetwa “okubatizibwa” nikimanyisa “okwibikirwa kimwe, n’okutuuhuuka,” kurugiirira ahari kashoboorozi Vine’s Complete Expository Dictionary of Old and New Testament Words.
b Omu kubatiza omwereere nibamwitirira amaizi nari bagamushuka aha buso, kworeka ngu hati yaayezibwa takiri mukaafiire.
c Yehova n’eiziina rya Ruhanga. (Zaaburi 83:18) Reeba ekicweka, “Yehova n’Oha?”
d Reeba ekicweka, “Omwoyo Gurikwera Niki?”
e Reeba ekicweka, “Yohaana Omubatizi Akaba Ari Oha?”
f Reeba ekicweka, “Ni Baahi Abarikuza omu Iguru?”
g Baibuli neekoresa ekigambo “okubatizibwa” kumanyisa emigyenzo emwe ey’okweza ebintu nk’ebirikukoresibwa aha ka. (Mako 7:4; Abaheburaayo 9:10) Kwonka eki nikitaana aha kwibikirwa kimwe kwa Yesu n’abakuratsi be.
Noobaasa Kukunda n'Ebi
EBIBUUZO EBI BAIBULI ERIKUGARUKAMU
Ediini Zoona shi Nizishushana? Zoona Nizihitsya Ahari Ruhanga?
Enshonga ibiri eziri omu Baiburi nizooreka eky’okugarukamu.